ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារ ចូលរួមក្នុងពិធីចាប់ត្រីបែបបុរាណ នៅបឹងបង្កោង ក្នុងភូមិបង្កោង ស្រុកប្រាសាទបាគង ខេត្តសៀមរាប
ចេញផ្សាយ ៩ កុម្ភៈ ២០២៦ 1380
នៅថ្ងៃទី៨ ខែកុម្ភៈ ឆ្នាំ២០២៦ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារ ចូលរួមក្នុងពិធីចាប់ត្រីបែបបុរាណ ស្ថិតនៅបឹងបង្កោង ក្នុងភូមិបង្កោង ស្រុកប្រាសាទបាគង ខេត្តសៀមរាប។
ពិធីចាប់ត្រីបែបបុរាណតាមទំនៀមទំលាប់ពីដូនតារបស់ប្រជាពលរដ្ឋអ្នកភូមិ ស្ថិតនៅក្នុងបឹងបង្កោង ដោយមានការចូលរួមពីប្រជាពលរដ្ឋ ក្មេង-ចាស់ ប្រុស-ស្រីយ៉ាងច្រើនកុះករ មកពីគ្រប់រាជធានីខេត្តក្នុងព្រះរាជាណាចក្រកម្ពុជា ។
គួររំលឹកថាកាលពីអំឡុងខែកក្កដា ឆ្នាំ២០២៥ កន្លងទៅ ឯកឧត្តម ឃុន សាវឿន បាននាំយកនូវពូជកូនត្រីប្រមាណ ៥ម៉ឺនកូន ដែលជាអំណោយរបស់ឯកឧត្តមរដ្ឋមន្ត្រី ឌិត ទីណា យកទៅលែងចូលក្នុងបឹងបង្កោង ស្រុកប្រាសាទបាគង ដើម្បីបង្កើនផលត្រីធម្មជាតិ ក្នុងនោះរួមមាន៖ កូនត្រីផ្ទក់ អណ្ដែង ឆ្ពិន ព្រលូង ប្រា។ល។
សូមជម្រាបជូនថា ប្រជាពលរដ្ឋ ដែលចូលរួមក្នុងពិធីចាប់ត្រីបានសម្តែងនូវក្តីរីករាយ ព្រមទាំងថ្លែងអំណរគុណយ៉ាងជ្រាលជ្រៅគោរពជូនចំពោះឯកឧត្តមរដ្ឋមន្ត្រី ឌិត ទីណា ដែលបានឧបត្ថម្ភកូនពូជត្រីលែងចូលក្នុងបឹងបង្កោងកន្លងមក ដោយធ្វើឱ្យទិន្នផលត្រីក្នុងបឹងនេះមានការកើនឡើង ហើយតាមការប៉ាន់ស្មានទិន្នផលត្រីដែលបងប្អូនប្រជាពលរដ្ឋ ប្រមូលផលបានសរុបប្រមាណ៨តោន៕
