ឯកឧត្តមរដ្ឋលេខាធិការប្រចាំការ អ៊ឹម ស៊ីថុល អញ្ជើញជាអធិបតីភាពក្នុងពិធីបើកកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៥​ និងលើកទិសដៅការងារឆ្នាំ២០២៦

ចេញ​ផ្សាយ​ ៤ កុម្ភៈ ២០២៦ 1143

នាព្រឹកថ្ងៃទី៤ ខែកុម្ភៈ ឆ្នាំ២០២៦ ឯកឧត្តមរដ្ឋលេខាធិការប្រចាំការ អ៊ឹម ស៊ីថុល តំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបើកកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៥​ និងលេីកទិសដៅការងារឆ្នាំ២០២៦ នៅទីស្ដីការក្រសួងកសិកម្ម​ រុក្ខាប្រមាញ់​ និងនេសាទ។
ថ្លែងក្នុងពិធី​បើក ឯកឧត្តម ងិន ឆាយ​ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានរាយការណ៍នូវសមិទ្ធផលសម្រេចបាន​ ការបង្កើនផលិតភាពដំណាំសក្តានុពល​ កំណើននៃការនាំចេញ ការសិក្សាវាយតម្លៃប្រភេទពូជដំណាំ​បច្ចេកទេសផលិតកម្មដំណាំ និងការពង្រឹងសេវាកម្មគាំទ្រ​ ក្នុងគោលដៅពង្រឹងប្រសិទ្ធភាពខ្សែចង្វាក់ផលិតកម្មកសិកម្ម ប្រកបដោយនិរន្តរភាព​ ភាពធន់​ បរិយាប័ន្ន សំដៅធានាសន្តិសុខស្បៀង និងលើកកម្ពស់ជីវភាពប្រជាពលរដ្ឋ ក្នុងទស្សនទាន “មានហូប មានប្រើ មានបាន និងមានរហូត”។
ឯកឧត្តមរដ្ឋលេខាធិការប្រចាំការ បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានកសិកម្ម ដែលបានខិតខំបំពេញតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងសម្រេចបានលទ្ធផលការងារជាច្រើនគួរជាទីមោទនៈ។
ឯកឧត្តមរដ្ឋលេខាធិការប្រចាំការ បានសង្កត់ធ្ងន់ថា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នៅតែចាត់ទុកវិស័យកសិកម្មជាវិស័យអាទិភាពក្នុងការធានាបាននូវសន្តិសុខស្បៀង ប្រកបដោយនិរន្តរភាព ផ្តល់ឱកាសការងារនៅជនបទ និងការទ្រទ្រង់កំណើនសេដ្ឋកិច្ចជាតិ។ ម្យ៉ាងវិញទៀត ក្រោមការដឹកនាំរបស់ ឯកឧត្តមរដ្ឋមន្រ្តី ឌិត ទីណា បាននិងកំពុងអនុវត្តយ៉ាងសកម្មនូវកម្មវិធីគោលនយោបាយអាទិភាពទី៥ និងទី៦ និងផែនការយុទ្ធសាស្ត្រអភិវឌ្ឍន៍វិស័យកសិកម្ម និងបានដាក់ចេញកម្មវិធីចំនួន ៣រួមមាន៖ ការអភិវឌ្ឍខ្សែច្រវាក់ផលិតកម្មកសិកម្ម ការគ្រប់គ្រងធនធានធម្មជាតិកសិកម្ម និងការពង្រឹងសមត្ថភាពនិងសមិទ្ធកម្មស្ថាប័ន និងការអភិវឌ្ឍធនធានមនុស្ស។
តាមរយៈកិច្ចប្រជុំរយៈពេល២ថ្ងៃនេះ ឯកឧត្តមរដ្ឋលេខាធិការប្រចាំការ មានសង្ឃឹមយ៉ាងមុតមាំក្នុងការប្រមូលធាតុចូលសំខាន់ៗថែមទៀតសម្រាប់ជាមូលដ្ឋានក្នុងការកសាងផែនការសកម្មភាពសម្រាប់ឆ្នាំ២០២៦ និងឆ្នាំបន្តបន្ទាប់ សំដៅទទួលបានកំណើនក្នុងអនុវិស័យដំណាំ ធានាបាននូវសន្តិសុខស្បៀង ការផ្តល់ឱកាសការងារកាន់តែច្រើន ព្រមទាំងឆ្លើយតបទៅនឹងគោលនយោបាយអាទិភាពទី៥ និងទី៦ ​របស់រាជរដ្ឋាភិបាល ប្រកបដោយប្រសិទ្ធភាព និងប្រសិទ្ធផលខ្ពស់៕