ឯកឧត្តមរដ្ឋលេខាធិការ ម៉ាន សុគ្រី អញ្ជើញជាអធិបតីភាព ក្នុងកិច្ច​ប្រជុំ​បូកសរុបលទ្ធផល និងលើកទិសដៅការងារឆ្នាំ២០២៦ របស់មន្ទីរ​កសិកម្ម រុក្ខាប្រមាញ់ និងនេសាទខេត្តកំពង់ធំ

ចេញ​ផ្សាយ​ ៤ មីនា ២០២៦ 610

នៅថ្ងៃទី៤ ខែមីនា ឆ្នាំ២០២៦ ឯកឧត្តមរដ្ឋលេខាធិការ ម៉ាន សុគ្រី រដ្ឋ​លេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជា​អធិបតីភាព ក្នុងកិច្ចប្រជុំបូកសរុបលទ្ធផលការងារកសិកម្ម រុក្ខា​ប្រមាញ់ និងនេសាទ ប្រចាំឆ្នាំ២០២៥ និងលើកទិសដៅការងារឆ្នាំ​២០២៦ របស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ។
នាឱកាសនោះ ឯកឧត្តមរដ្ឋលេខាធិការ បានជម្រាបជូនអង្គពិធី​ទាំង​មូលថា នេះជាការផ្តល់ឱកាសដល់គ្រប់តួអង្គពាក់ព័ន្ធទាំងអស់ បាន​ជួប​ជុំគ្នា និងរួមគ្នាពិនិត្យ និងវាយតម្លៃអំពីសមិទ្ធផលនានា ការ​ដោះ​ស្រាយបញ្ហាប្រឈម និងកាលានុវត្តភាពក្នុងការដាក់ចេញ​នូវ​ទិសដៅ​ការងារ ឱ្យបានគ្រប់ជ្រុងជ្រោយសម្រាប់អនុវត្តបន្តក្នុង​ឆ្នាំ២០២៦ ប្រកប​ដោយប្រសិទ្ធភាព និងស័ក្តិសិទ្ធិភាពខ្ពស់។
បន្ថែមពីនេះទៀត ឯកឧត្តមរដ្ឋលេខាធិការ បានផ្តល់ជាអនុសាសន៍​មួយ​ចំនួនរួមមាន ១. ត្រូវបន្តដោះស្រាយបញ្ហាប្រឈម ដែលនៅ​សេស​សល់ក្នុងឆ្នាំ២០២៥ ២. ប្រមូលផ្តុំនូវយោបល់ អនុសាសន៍ បញ្ហា​ប្រឈម និងសំណូមពរនានាពីគ្រប់មជ្ឈដ្ឋាន ដើម្បីតាមដាន និងដោះ​ស្រាយ​ឱ្យបានទាន់ពេលវេលា ​ករណីមិនអាចដោះស្រាយ​បាន​ត្រូវស្នើ​សុំការណែនាំបន្ថែមពីរដ្ឋបាលខេត្ត និងក្រសួងកសិកម្ម រុក្ខាប្រមាញ់ និងនេសាទ ជៀសវាងទុកបញ្ហាចោល ។
៣.បង្កើនកិច្ចសហការ​ជាមួយ​​មន្ទីរ អង្គភាព អង្គការដៃគូ​ពាក់ព័ន្ធ​បន្ថែម​ទៀត។ ៤.បន្តពង្រឹង​ការគ្រប់​គ្រងធនធានជលផល ធនធានព្រៃ​ឈើ និង​សត្វព្រៃ​ប្រកប​ដោយនិរន្តភាព ដោយសហការយ៉ាងជិតស្និទ្ធជា​មួយ​​​ស្ថាប័ន​អយ្យការ កងកម្លាំង​​ប្រដាប់អាវុធគ្រប់លំដាប់ថ្នាក់ ដើម្បី​បង្រ្កាប​បទ​ល្មើស​ក្នុង​ដែន​សមត្ថកិច្ចរបស់ខ្លួន។ 
៥.ត្រូវខិតខំស្រាវជ្រាវ និងបង្ការទប់ស្កាត់ការផ្សព្វផ្សាយព័ត៌មានមិនពិត ពាក់ព័ន្ធវិស័យកសិកម្ម។ ៦.ត្រូវចូលរួមការអនុវត្តគោលនយោបាយ​កែទ្រង់វិមជ្ឈការ និងវិសហមជ្ឈការ ដែលជាកំណែទម្រង់មួយ​ដ៏មាន​សារៈសំខាន់ ដើម្បីធានាការផ្តល់រដ្ឋបាលក្នុងវិស័យ​កសិកម្ម​ជូនប្រជា​ពលរដ្ឋ និងធុរជន បានឆាប់ និងទាន់ពេលវេលា ប្រកបដោយ​តម្លាភាព គណនេយ្យភាព ប្រសិទ្ធភាព និងបរិយាបន្ន៕