សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ បណ្ឌិតប៊ុនរ៉ានី ហ៊ុន សែន បានផ្ដល់អំណោយជាដំរីមួយគូដល់រដ្ឋាភិបាល និងប្រជាជននៃសាធារណរដ្ឋកូរ៉េដើម្បីយកទៅបង្កាត់ពូជ និងដាក់តាំងបង្ហាញនៅសួនឧទ្យានកុមារសេអ៊ូល។
ពិធីប្រគល់សត្វដំរីមួយគូនេះបានប្រព្រឹត្តទៅកាលពីរសៀលថ្ងៃទី០៧ ខែកក្កដា ឆ្នាំ២០១០ នៅសួនសត្វភ្នំតាម៉ៅក្រោមអធិបតីភាពឯកឧត្តមបណ្ឌិតច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ របស់សម្តេចអគ្គមហាសេនាបតីតេជោហ៊ុន សែន និងឯកឧត្តម លី ក្យុងស៊ូ អគ្គរដ្ឋទូតនៃសាធារណៈរដ្ឋកូរ៉េប្រចាំនៅប្រទេសកម្ពុជា។
ឯកឧត្តមបណ្ឌិតច័ន្ទ សារុន បានមានប្រសាសន៍ថា អំណោយសត្វដំរីញី ឈ្មោលមួយគូនេះ ជានិមិត្តរូបនៃទំនាក់ទំនងអមតៈរវាងប្រទេសទាំងពីរ។ នេះជាលើកទីមួយហើយដែលប្រទេសទាំងពីរបង្កើតនូវវប្បធម៌រួមគ្នាសំរាប់ធ្វើការអភិរក្ស និងវិបុលកម្មសត្វព្រៃប្រភេទកំពុងរងគ្រោះថ្នាក់លើពិភពលោក។
ឯកឧត្តម បន្តទៀតថា ភ្ញៀវទេសចរណ៍ដែលនឹងចូលទស្សនាសត្វមួយគូនេះ នៅសួនឧទ្យានកុមារសេអ៊ូល ប្រាកដជាជ្រាបអំពីចំនងមិត្តភាព និងភាពសំបូរបែបនៃធនធានធម្មជាតិប្រទេសខ្មែរ។
ឯកឧត្តម លី ក្យុងស៊ូ បានសំដែងនូវក្ដីរំភើបឥតឧប្បមា ដល់រដ្ឋាភិបាលកម្ពុជា ជាពិសេស សម្តេចអគ្គមហាសេនាបតីតេជោហ៊ុន សែនចំពោះ កាបរិច្ចាកនេះ ហើយឯកឧត្តមបានវាយតំលៃថា សត្វដំរីនេះ ជាកំរងប្រវត្តិសាស្ត្រថ្មី នៃទំនាក់ទំនងសហប្រតិបត្តិការដ៏ល្អរវាងប្រទេសទាំងពីរ។
លោកឆេង គឹមស្រ៊ុន ប្រតិភូរាជរដ្ឋាភិបាល ទទួលបន្ទុកប្រធានរដ្ឋបាលព្រៃឈើ បានប្រាប់ថា ដំរីឈ្មោល ឈ្មោះព្រៃនប់ ដែលសង្រ្គោះយកចេញ ពីចំការដូងប្រេងឧកញ៉ាម៉ុង រិទ្ធី នៅខេត្តព្រះសីហនុកាលពីឆ្នាំ២០០៣។ វាមានអាយុ១៦ឆ្នាំ, កំពស់២,៤១មែត្រ និងទំងន់២៥០០គីឡូក្រាម។ មេញីឈ្មោះ អ៊ីតូ យកពីភូមិកាចាញ ឃុំល្បាំង២ ស្រុកលំផាត់ ខេត្តរតនគិរី។ អ៊ីតូ កំពស់២,៤៤មែត្រ, ទំងន់២៣០០គីឡូក្រាម។ សត្វទាំង២កំពុងស្ថិតនៅក្នុងវ័យបន្តពួជយ៉ាងល្អ។
តាមការស្រាវជ្រាវថ្មីៗនេះបានបង្ហាញថា មានដំរីនៅកម្ពុជាទាំងអស់ប្រមាណ៤៥០-៥០០ក្បាល។ ប៉ុន្តែមាន ១០១ក្បាល, ៣៣ក្បាលជាឈ្មោល ដែលជាសត្វដំរីស្រុក៕