កូនត្រី និងវារីសត្វផ្សេងៗប្រមាណជាង ១ លានក្បាល រួមមានទាំងអណ្ដើក កន្ធាយកង្កែប អន្ទង់ បង្កង និងត្រីជាច្រើនប្រភេទ ត្រូវបានលែងនៅក្នុងអាងទឹកម្លេចដែលស្ថិតនៅក្នុងភូមិត្រពាំងឈើទាល ឃុំច្រេស ស្រុកជុំគិរី ខេត្ដ កំពត ដើម្បីឱ្យអាងនេះសម្បូរត្រីវិញ និងដើម្បីបម្រើតម្រូវការហូបចុករបស់ប្រជាពលរដ្ឋនៅតំបន់នេះ។
លោកឧបនាយករដ្ឋមន្ដ្រីប៊ិន ឈិន ប្រធានអាជ្ញាធរជាតិដោះស្រាយទំនាស់ដីធ្លី បានអញ្ជើញជាអធិបតី និងជាតំណាងរបស់សម្ដេចអគ្គមហាសេនាបតីតេជោ ហ៊ុនសែន នាយក រដ្ឋមន្ដ្រីនៃព្រះរាជាណាចក្រកម្ពុជានាព្រឹកថ្ងៃទី១ ខែកក្កដា ឆ្នាំ២០១។
ឯកឧត្តមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៏ឱ្យដឹងថា ប្រវត្ដិអាងទឹកម្លេចនេះ តាមការស្រាវជ្រាវ និងពត៌មានទទួលបានពីព្រឹទ្ធាចារ្យអាយុ៧៥ឆ្នាំមួយរូប ដែលមានទីកំណើតរស់នៅជិតអាងទឹកនេះតាំងពីធំដឹងក្ដីមកត្រពាំងទឹកនេះមានឈ្មោះថា ត្រពាំងម្លេចដែលចាស់ៗបានហៅតៗគ្នាមកទល់ ពេលនេះ។ អាងទឹកម្លេចនេះត្រូវបានកសាងឡើងវិញនៅឆ្នាំ១៩៧៨ ក្នុងសម័យប៉ុល ពត ។បន្ទាប់មកនាខែកញ្ញាឆ្នាំ ២០០៣ ក្រសួងធនធានទឹក និងឧតុនិយមបានកសាងទំនប់បង្ហៀរនេះឡើងវិញជាថ្មីម្ដងទៀតដែលមានទំហំ ៥៥៧ ហិកតាអាចផ្ទុកទឹកបានប្រមាណជាង ១១លានម៉ែត្រគូបស្រោចស្រពលើផ្ទៃដីបាន ២.០០០ហិកតានារដូវវស្សា និង ៨០០ ហិកតានារដូវប្រាំង។
ការប្រារព្ធទិវាមច្ឆាជាតិនាថ្ងៃទី ១ខែ កក្កដា ឆ្នាំ ២០១០ នៅអាងទឹកម្លេចនេះ គឺជាការយកចិត្ដទុដាក់ខ្ពស់របស់រាជរដ្ឋាភិបាលកម្ពុជា ដើម្បីបំផុសចលនាប្រជាពលរដ្ឋគ្រប់ជាន់ថ្នាក់ឱ្យចូលរួមយ៉ាងសម្មក្នុងការថែរក្សាពូជត្រីមានក្នុងដែនទឹកធម្មជាតិផង និងបង្កើនផលត្រីនៅតំបន់ឆ្ងាយពីដែននេសាទផងជាពិសេសតំបន់ភ្នំ និងទំនាបវាលស្រែ ដែលស្ថិតនៅជុំវិញភូមិសាស្ដ្រនេះផង។
នៅក្នុងទិវានាថ្ងៃនេះ យើងនឹងរៀបចំលែងកូនត្រី និងវារីសត្វផ្សេងៗប្រមាណជាង ១ លានក្បាលរួមមានទាំងអណ្ដើក កន្ធាយ កង្កែប អន្ទង់ បង្កង និងត្រីជាច្រើនប្រភេទទៀត ដើម្បីធ្វើឱ្យអាងទឹកម្លេចនេះសម្បូរត្រីឡើងវិញ និងដើម្បីបម្រើតម្រូវការហូបចុករបស់ប្រជាពលរដ្ឋនៅតំបន់នេះ។
ឯកឧត្តមរដ្ឋមន្ដ្រីបានបន្ដថា ការថែរក្សាការពារអភិរក្ស និងទប់ស្កាត់បទល្មើសជលផលជាភារកិច្ចរួមដែលទាមទារកិច្ចសហការយ៉ាងជិតស្និទ្ធពីគ្រប់ភាគីដែលពាក់ព័ន្ធទាំងអស់ ជាពិសេសអាជ្ញាធរដែនដី កងកម្លាំងប្រដាប់អាវុធ និង ប្រជាពលរដ្ឋនៅមូលដ្ឋាន ព្រោះសមត្ថកិច្ចជលផលមិនមានកម្លាំងគ្រប់គ្រាន់ធ្វើការងារទាំងនេះតែម្នាក់ឯងឡើយ។
ឯកឧត្តមរដ្ឋមន្ដ្រីក៏បានលើកឡើងអំពីរបាយការណ៏សង្ខេបអំពី ការ អភិវឌ្ឍន៏វិស័យជលផលរយះពេល១០ឆ្នាំក្រោយកំណែទម្រង់ ជាពិសេស១ឆ្នាំចុងក្រោយនេះថា រដ្ឋបាលជលផលក្រុមការងារបច្ចេកទេសជលផលចម្រុះបានពិភាក្សាគ្នាយ៉ាងផុសផុល ដើម្បីរៀបចំផែនការយុទ្ធសាស្ដ្រជលផលរយះពេល១០ឆ្នាំ (២០១០-២០១៩) និងក្រុមប្រតិបត្ដិជលផលកម្ពុជាដោយទទួលខុសត្រូវ ស្របតាមសេចក្ដីថ្លែងការណ៏របស់រាជរដ្ឋាភិបាលស្ដីពីគោលនយោបាយវិស័យជលផលជាតិ និងផែនការយុទ្ធសាស្ដ្រអភិវឌ្ឍន៏ជាតិ ២០០៩-២០១៣ បច្ចុប្បន្នភាព និងយុទ្ធចតុកោណរបស់រាជរដ្ឋាភិបាល។ ផែនការយុទ្ធសាស្ដ្រនេះនឹងសម្រេចក្នុងចុងឆ្នាំ២០១០ នេះ។
ការធ្វើអាជីវកម្មនេសាទក្នុងរដូវនេសាទឆ្នាំ ២០០៩ កន្លងទៅនេះផលនេសាទសរុប ចំនួនប្រមាណ ៥១៥ ពាន់តោន ដែលក្នុងនោះផលនេសាទទឹកសាបមានចំនួន ៣៩០ ពាន់តោនផលនេសាទសមុទ្រមានចំនួន ៧៥ ពាន់តោន និងផលវារីវប្បកម្មមានចំនួន ៥០ ពាន់តោន ដែលអាចបំពេញតម្រូវការត្រីសាច់ជូនប្រជាពលរដ្ឋបានគ្រប់គ្រាន់ និងមានសេសសល់សម្រាប់ នាំចេញទៅកាន់ទីផ្សារអន្ដរជាតិបានមួយចំនួនទៀតផង។
ការងារវារីវប្បកម្ម គឺជាអាទិភាពដ៏ចម្បង ដែលក្រសួងបានយកចិត្ដទុកដាក់ជំរុញឱ្យរដ្ឋបាលជលផលគ្រប់លំដាប់ថ្នាក់បំផុសមុខព្រួញនេះឱ្យបានខ្លាំងក្លាជាក់ស្ដែងរដ្ឋបាលជលផលបានបើកវគ្គបណ្ដុះបណ្ដាលបច្ចេកទេសចិញ្ចឹមត្រី ចំនួន២៦៨វគ្គជូនដល់កសិករចំនួន៥.៦៦៨គ្រួសារ និងបើកវគ្គបណ្ដុះបណ្ដាលចំនួន៦០វគ្គទៀតសម្រាប់គ្រូបង្គោលផ្សព្វផ្សាយវារីវប្បកម្ម១.៨០០នាក់ និងជំរុញការសាងសង់កន្លែងភ្ញាស់ត្រីបានចំនួន២២៥កន្លែង ដែលមានសមត្ថភាពផលិតកូនត្រីគ្រប់ប្រភេទប្រមាណ១០០លានក្បាលក្នុង១ឆ្នាំ។
ការអភិរក្សជលផលរដ្ឋបាលជលផលក៏បានខិតខំរៀបចំផែនការសកម្មភាព និងការទទួលខុសត្រូវច្បាស់លាស់ ដែលក្នុងនោះសកម្មភាពជាសំខាន់ គឺបានផ្ដោតទៅលើការចងក្រងច្បាស់ និងលិខិតបទដ្ឋានផ្សេងៗដែលពាក់ព័ន្ធនឹងការងារអភិរក្ស និងពង្រឹងកិច្ចសហប្រតិបត្ដិការជាមួយដៃគូដើម្បីធានាការអភិរក្សប្រកបដោយនិរន្ដរភាព។
ជាក់ស្ដែងរដ្ឋបាលជលផលក៏បានខិតខំការពារ និងអភិរក្សប្រភេទត្រី និងវារីសត្វជិតផុតពូជមួយចំនួន ដូចជាត្រីរាជ ត្រីគល់រាំង ត្រីត្រសក់ ផ្សោត ក្រពើ ពស់ អណ្ដើក កន្ធាយ ។ល។ ទន្ទឹមនេះរដ្ឋបាលជលផលក៏បានរៀបចំផែនការអភិរក្ស និងគ្រប់គ្រងតំបន់ផ្កាថ្មស្មៅសមុទ្រ សេះសមុទ្របានចំនួន២.៥០០ហិកតា និងបានបោះបង្គោលបេតុងចំនួន១.៤៥០ដើម និងប្រអប់បេតុងចំនួន៦០០ប្រអប់នៅខេត្ដកំពត និងខេត្ដកោះកុង ហើយបានបង្កើតក្រុមល្បាត ដើម្បីការពារកន្លែងអភិរក្សទាំងនេះផងដែរ។
នាពេលបច្ចុប្បន្ននេះ ក្រសួងកសិកម្មរុក្ខាប្រមាញ់ និងនេសាទក៏បានបំផុសឱ្យសហគមន៏នេសាទរៀបចំកន្លែងអភិរក្សបានចំនួន២២៩កន្លែងថែមទៀត និងបំផុសឱ្យមានកន្លែងលែងត្រីមេពូជ និងកូនត្រីនៅតាមបណ្ដាលឡូត៏នេសាទ និងតាមកន្លែងនេសាទសហគមន៏បានចំនួនជាង៤លានក្បាលផងដែរ។
រដ្ឋបាលជលផលក៏បានខិតខំរៀបចំបង្កើតសហគមន៏សរុប ចំនួន៤៦៩សហគមន៏ ហើយមានសមាជិកចូលរួមចំនួនសរុប១២៦.៥៥០គ្រួសារស្មើនឹង២៧៧.៣៥០នាក់ ដែលមានទីតាំងក្នុងដែននេសាទទឹកសាបចំនួន៤៣៤សហគមន៏ និងតំបន់ឆ្នេរសមុទ្រចំនួន៣៥សហគមន៏។
ឯកឧត្តមរដ្ឋមន្ដ្រីបានឱ្យដឹងទៀតថា នៅប៉ុន្មានថ្ងៃទៀតនេះរដ្ឋបាលជលផលនឹងសហការរៀបចំពិធីលែងត្រីឆ្លងដែនរួមគ្នា ជាមួយអគ្គនាយកដ្ឋានជលផលវៀតណាម និងគណៈកម្មាធិការទន្លេមេគង្គនៅព្រំដែនកម្ពុជា-វៀតណាម ក្នុងខេត្ដតាកែវ និងខេត្ដអានយ៉ាង ដោយក្នុងថ្ងៃនេះទៀតសោតតំណាងលេខាធិការដ្ឋាន នៃគណៈកម្មការទន្លេមេគង្គ ក៏បានអញ្ជើញចូលរួមជាភ្ញៀវកិត្ដិយស និងដកបទពិសោធន៏ក្នុងទិវាមច្ឆាជាតិថ្ងៃនេះផងដែរ។ នេះជាជំហានថ្មីមួយទៀតឈានទៅរកការអនុវត្ដន៏កិច្ចសហប្រតិបត្ដិការឆ្លងដែនក្នុងការអភិរក្សធនធានជលផល ដែលកើតចេញពីបទពិសោធន៏នៃទិវាមច្ឆាជាតិដែលយើងកំពុងរៀបចំពេលនេះនឹងបានរៀបចំជាប្រពៃណីកន្លងមក។
លោក ប៊ិន ឈិន បានមានប្រសាសន៏នៅក្នុងឱកាសនោះ ដោយធ្វើការអំពាវនាវឱ្យមានការទប់ស្កាត់ការកាប់រានព្រៃលិចទឹក វាតយកដី ព្រមទាំអជំរុញឱ្យបន្ដរក្សាការពារ ព្រៃលិចទឹក ដើម្បីរក្សាជម្រកសម្រាប់ត្រីពងកូនការជីកស្រះអាងនៅក្នុងតំបន់ព្រៃលិចទឹក និងការកាប់រានព្រៃលិចទឹកដើម្បីយកដី ជាមួយនេះក៏ត្រូវយកចិត្ដទុកដាក់លើការទប់ស្កាត់បទល្មើសនេសាទ។
លោកបានមានប្រសាសន៏ថា មានព្រៃលិចទឹក គឺមានត្រី អស់ព្រៃលិចទឹកគឺអស់ត្រី ដូចនេះត្រូវតែថែរក្សាព្រៃលិចទឹក លោកក៏បានលើលឡើងផងដែរថា សកម្មភាពកាប់ដើមរាំងនាពេលកន្លងមកក៏ជាសកម្មភាពកាប់បំផ្លាញព្រៃលិចទឹកផងដែរ ដូចនេះលោកក៏បានអំពាវនាវ ឱ្យមន្ដ្រីមានអំណាចទាំងអស់ ដែលប្រព្រឹត្ដបទល្មើសសូមឱ្យគោរពចំពោះច្បាប់ដែលមានរួចមកហើយដើម្បីជាគំរូសម្រាប់ប្រជាពលរដ្ឋ។
ជាមួយនេះ លោកក៏បានលើកទឹកចិត្ដផងដែរ ដល់ការបង្កើនការយកចិត្ដទុកដាក់ខ្លាំងថែមទៀតក្នុងការងារវារីវប្បកម្មនិងការរក្សាមេត្រីពូជឱ្យមានបម្រុងនៅក្នុងដែនឡូត៏ នេសាទ៕