ខណៈដែលភ្លៀងបានធ្លាក់ជាបន្ដបន្ទាប់ក្ដី ក៏ឯកឧត្ដមបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ នៅតែបង្ហាញនូវក្ដីបារម្ភ ក្នុងការងារបង្កបង្កើនផល ប្រសិនបើកសិករមិនប្ដូរទម្លាប់និងពូជទេ។ ឯកឧត្ដមបានជំរុញឱ្យកសិករប្រើប្រាស់ពូជស្រូវស្រាល ស្រូវកណ្ដាលវិញ។
ឯកឧត្ដមរដ្ឋមន្ដ្រី បានប្រាប់ដល់កសិករនៅឃុំស្រែរនោង ស្រុកត្រាំកក់ ក៏ដូចជាសារទៅកាន់កសិករ នៅទូទាំងប្រទេស ដោយក្រើនរំលឹក ឱ្យប្រើពូជស្រូវ មិនប្រកាន់រដូវសម្រាប់ការបង្កបង្កើនផលនៅឆ្នាំនេះ។
ឯកឧត្ដមបញ្ជាក់ថា ការធ្វើស្រូវស្រាលមិនប្រកាន់រដូវ គឺសមស្របសម្រាប់ស្ថានភាពធាតុអាកាសនៅកម្ពុជា។ ស្រូវស្រាលមិនប្រកាន់រដូវរយះ ពេលដាំដុះតែ១.១៥ថ្ងៃ ទៅ១២០ថ្ងៃ តែប៉ុណ្ណោះហើយការអនុវត្ដន៏បច្ចេកទេស ប.វ.ស នឹងធ្វើឱ្យទិន្នផលកាន់តែកើនឡើងថែមទៀត ។
ជាពិសោធន៏ជាច្រើនឆ្នាំចុងក្រោយនេះ បង្ហាញថាការប្រើពូជស្រូវស្រាលមិនប្រកាន់រដូវ ការប្រើពូជស្រូវកណ្ដាល គឺអាចធ្វើឱ្យដំណាំស្រូវចៀសផុតបានពីគ្រោះធម្មជាតិ បានច្រើនជាងការប្រើពូជស្រូវធ្ងន់ ។
ឯកឧត្ដមបានប្រាប់កសិករនៅទីនោះទៀតថា ប្រសិនជាកសិករណាយល់ព្រមធ្វើស្រូវស្រាលដោយអនុវត្ដប.វ.ស ឯកឧត្ដម នឹងផ្ដល់ស្រូវពូជជូន១២គីឡូក្នុងមួយហិកតា ដោយមិនគិតថ្លៃ ។
ឯកឧត្ដមរដ្ឋមន្ដ្រី បានទៅទីនោះ កាលពីដើមសប្ដាហ៏នេះ ដើម្បីចូលរួមក្នុងការសម្ពោធស្រះទឹកដ៏ធំបង្គួរមួយ ដែលមានទំហំ៦០ម៉ែត្រ ។ ឯកឧត្ដមបានក្រើនរំលឹកផងដែរឱ្យកសិករយកចិត្ដទុកដាក់ក្នុងការគ្រប់គ្រងទឹក ការប្រើប្រាស់ទឹកការបង្កើតប្រភពទឹក នៅតាមគ្រួសារ ភូមិ សហគមន៏។ ជាមួយនេះ ការដាំដើមឈើនៅតាមផ្ទះ ភូមិ វត្ដអារាម ទីកន្លែងទំនេរ។ល។ ដែលទាំងនេះ នឹងជួយបង្កើតបរិស្ថាន ជួយជាទម្លាប់ជាការទាក់ទាញ់ទឹកភ្លៀងផងដែរ។
ឯកឧត្ដមរដ្ឋមន្ដ្រីបានផ្ដល់កូនឈើប្រភេទបេង ឈើទាលជាច្រើនរយដើមសម្រាប់យកទៅដាំនៅវត្ដចំនួន៣នៅក្នងឃុំ៕