ឯកឧត្ដម បណ្ឌិត ច័ន្ទ សារុន រដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទ បានជំរុញបានអំពាវនាវ ឱ្យវិនិយោគិនវៀតណាមកាន់តែច្រើនមកបោះទុនលើវិស័យកសិកម្មនៅកម្ពុជា។ សំណូមពរនេះត្រូវបាន ឯកឧត្ដមរដ្ឋមន្ដ្រីផ្ដាំផ្ញើតាមគណបក្សប្រតិភូជាន់ខ្ពស់វៀតណាមមួយក្រុម ដែលកំពុងបំពេញទស្សនកិច្ចនៅប្រទេសកម្ពុជា។
កាលពីរសៀលថ្ងៃទី៦ មិថុនា ម្សិលមិញឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានទទួលជួបគណៈប្រតិភូនៃប្រទេសវៀតណាមដែលដឹកនាំដោយ លោកដាង វូមិញ (Dang Vu Minh) ជាសមាជិកគណៈកម្មាធិការមជ្ឈិមបក្សកុម្មុនីសវៀតណាម និងជាប្រធានគណៈកម្មការវិទ្យាសាស្ដ្របច្ចេកទេស និងបរិស្ថាននៃសភាវៀតណាម។ ជំនួបបានអនុញ្ញាតឱ្យភាគីទាំងពីរផ្លាស់ប្ដូរយោបល់គ្នា និងផ្ដោតអារម្មណ៏ទៅលើការពង្រឹងកិច្ចសហប្រតិបត្ដិការរវាងប្រទេសជិតខាងទាំងពីរក្នុងវិស័យកសិកម្ម។
នៅចំពោះមុខប្រតិភូវៀតណាម ឯកឧត្ដមបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម បានជម្រាបជួនភ្ញៀវអំពីស្ថានភាពនៃការផលិតស្រូវនៅកម្ពុជា។ ឯកឧត្ដម រដ្ឋមន្ដ្រីបានមានប្រសាសន៏ថារដ្ឋាភិបាលកម្ពុជាក្លាយជាជង្រុកស្រូវនៃការនាំចេញស្រូវ និងអង្ករចេញទៅកាន់ពិភពលោកនៅឆ្នាំ២០១៥ ។ ត្រង់ចំណុចនេះប្រធានគណៈប្រតិភូវៀតណាម លោកដាង វូមិញ ក៏បានអត្ថាធិប្បាយស្រដៀងគ្នាដែរ។ លោក ដាង វូមិញ បានថ្លែងថា លោកសង្ឃឹមថាប្រទេសទាំងពីរកម្ពុជាវៀតណាម នឹងក្លាយជាជង្រុកស្រូវដ៏ធំរបស់ពិភពលោក។
ស្ដីពីស្ថានភាពផលិតផលស្រូវរបស់កម្ពុជា ឯកឧត្ដមរដ្ឋមន្ដ្រី បានបញ្ជាក់ថា នៅឆ្នាំ២០០៩ កម្ពុជាសម្រេចបានទិន្នផលស្រូវចំនួន៧,៥៨លានតោត នៅលើផ្ទៃដីបង្កបង្កើនផល២,៩លានហិកតា។ ក្នុងនោះក្រៅពីការប្រើប្រាស់បរិភោគកម្ពុជានៅសល់ស្រូវប្រមាញ់៣,៥លានតោនគិតជាអង្ករ គឺជាង២លានតោនសម្រាប់នាំចេញ។
ទាក់ទងនឹងការវិនិយោគរបស់ប្រទេសវៀតណាមក្នុងវិស័យកសិកម្មនៅកម្ពុជា ឯកឧត្ដមរដ្ឋមន្ដ្រី បានរំលឹកដល់ការបោះទុនវិនិយោគ លើការផលិតជីរបស់ក្រុមហ៊ុនវៀតណាមហើយ ថាក្នុងក្របខ័ណ្ឌនៃកិច្ចសហប្រតិបត្ដិការ ក្រសួងកសិកម្ម នៃប្រទេសទាំងពីរ រដ្ឋាភិបាលកម្ពុជាបានសម្រេចផ្ដល់ដីសម្បទានសេដ្ឋកិច្ចដល់ក្រុមហ៊ុនវៀតណាមដើម្បីដាំកៅស៊ូ ។ តាមផែនការក្នុងឆ្នាំ២០១២ក្រុមហ៊ុនវៀតណាម ក្រោមសម្ព័ន្ធសហគ្រាសកៅស៊ូវៀតណាមនឹងដាំកៅស៊ូឱ្យបានគ្រប់១០០.០០០ហិកតា ។ ក្រុមហ៊ុនវៀតណាមទាំងនោះគ្រោងនឹងបង្កើតរោងចក្រក្នុងតម្លៃ៨០០លានដុល្លារផងដែរ។
ជាការឆ្លើយតប លោកដាង វូងមិញ បានកោតសរសើរអំពីសហប្រតិបត្ដិការ ដែលមានរួចហើយរវាងប្រទេសទាំងពីរក្នុងវិស័យកសិកម្ម។ ទាក់ទងនឹងបញ្ហាស្បៀង លោកដាង វូមិញ បានថ្លែងថាលោកបាននឹកឃើញដល់ស្ថានភាព នៃប្រទេសទាំងពីរកាលពី២៥ឆ្នាំមុនដែលខ្វះខាតស្បៀងសម្រាប់បរិភោគ។ ប៉ុន្ដែក្នុងពេលបច្ចុប្បន្ននេះប្រទេសទាំងពីរមានស្រូវអង្ករសម្រាប់នាំចេញទៀត។ ប្រធានគណៈប្រតិភូវៀតណាមបានថ្លែងថាលោក នឹងខិតខំធ្វើយ៉ាងណាជំរុញសហប្រតិបត្ដិការបន្ថែមទៀតរវាងប្រទេសទាំងពីរក្នុងវិស័យកសិកម្មនេះ៕