កាលពីថ្ងៃទី០៩ ខែកក្កដា ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និង នេសាទ អមដំណើរដោយអនុរដ្ឋលេខាធិការ ទីប្រឹក្សាក្រសួង ថ្នាក់ដឹកនាំនាយកដ្ឋានពាក់ព័ន្ធ និងមន្ត្រី បច្ចេកទេសមួយចំនួន បានអញ្ជើញចុះពិនិត្យមើលការធ្វើស្រូវប.វ.ស និងចែកពូជស្រូវសែន ពិដោរព្រម ទាំងសំណេះសំណាលជាមួយប្រជាជនចំនួន៧៨គ្រួសារ នៅភូមិត្រពាំងព្រះ សង្កាត់កណ្តោលដុំ ក្រុង ច្បារមន។
នៅទីនោះឯកឧត្តមបានស្តាប់នូវអ្វីដែលមន្ត្រីជំនាញ អាជ្ញាធរ និងកសិករ ដែលលើកឡើងអំពី ការងារបង្កបង្កើនផលរបស់ពួកគេ ព្រមទាំងបញ្ហាប្រឈមមួយចំនួន ដែលតែងតែកើតឡើងនៅក្នុងរដូវ បង្កបង្កើនផលម្តង។ ឯកឧត្តមរដ្ឋមន្ត្រីបានសម្តែងការកោតសរសើរ ចំពោះកសិករនៅភូមិត្រពាំងព្រះ ដែលបានផ្លាស់ប្តូរទម្លាប់នៅក្នុងការធ្វើស្រែ ពិសេសការអនុវត្តប.វ.ស។ លោកជម្រុញឱ្យពង្រីកការធ្វើ ប.វ.ស នេះទៅកាន់កសិករផ្សេងទៀតនៅក្នុងមូលដ្ឋាន។
ក្នុងជំនួបនោះដែរ ឯកឧត្តមរដ្ឋមន្ត្រីបាន ជម្រាបពីប្រវិត្ត និងអត្ថន័យពូជស្រូវសែន ពិដោរ ដែលពូជនោះជាពូជស្រូវស្រាលក្រអូប ដែលបានធ្វើ ការបញ្ចេញ និងផ្សព្វផ្សារឱ្យប្រើប្រាស់នាឆ្នាំ២០០។ ពូជស្រូវនេះផ្តល់ទិន្នផលខ្ពស់ មានក្លិនក្រអូប គុណភាពអង្ករល្អបាយទន់ឆ្ងាញ់។
ឯកឧត្តមរដ្ឋមន្ត្រីបានពន្យល់អំពីវិធិសាស្ត្រកំចាត់ខ្យងមាស និងផ្តល់នូវមតិមួយចំនួន ដែលក្នុង នោះឯកឧត្តមបានអំពាវនាវដល់កសិករនៅទីនោះ ក៏ដូចជាកន្លែងផ្សេងទៀត សុំកុំពឹងផ្អែកតែលើស្រូវតែមួយមុខ។ នៅជុំវិញផ្ទះគួរដាំដំណាំបន្លែ គ្រឿងទេសគ្រប់មុខ។ កសិករត្រូវសន្សំជីធម្មជាតិ ដែលមាននៅជុំវិញខ្លួន ដូចជាសំរាម កាកសំណល់ផ្ទះបាយ ស្លឹកសង្កែ លាមកសត្វ។ល។ ហើយធ្វើ រោងដាក់ជី។ ធ្វើស្រែត្រូវចុះស្រែជាប្រចាំ សំខាន់តាមដានសុខភាព និងការវិវត្តន៍ស្រូវ។ កុំសម្លាប់សត្វ ល្អិតមានប្រយោជន៍។ ក្នុងពិធីនោះ រដ្ឋមន្ត្រីបានផ្តល់ពូជស្រូវសែនពិដោរ១២គីឡូក្រាមក្នុងមួយគ្រួសារ៕