មជ្ឈមណ្ឌលស្រាជ្រាវនេសាទបឹងទឹកសាប របស់រដ្ឋបាលជលផល ស្ថិតនៅឃុំផាត់សណ្ដាល ស្រុកកំពង់ស្វាយ ត្រូវបានសម្ពោធដាក់ឱ្យដំណើរការ កាលពីដើមសប្ដាហ៏នេះ ក្រោមការអញ្ជើញចូលរួមពីសំណាក់ ឯកឧត្តមបណ្ឌិតច៏ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ។
ឯកឧត្តម ណៅ ធួក ប្រតិភូរាជរដ្ឋាភិបាលកម្ពុជា ទទួលបន្ទុករដ្ឋបាលជលផល បានបញ្ជាក់ពីមូលហេតុនៃការក៏កើតមជ្ឈមណ្ឌលនេះឡើង គឺដើម្បីស្រាវជ្រាវពូជត្រី ធនធានមច្ឆជាតិ និងប្រភេទព្រៃលិចទឹក ក្រៅពីនេះក៏ជាកន្លែងសម្រាប់និស្សិត មកធ្វើការស្រាវជ្រាវទាក់ទង នឹងវិស័យជលផលផងដែរ។ មជ្ឈមណ្ឌលនេះបានចំណាយទឹកប្រាក់សរុបចំនួន៥ម៉ឹនដុល្លារអាមេរិក។
មានប្រសាសន៏ក្នុងឱកាសនោះ ឯកឧត្តមរដ្ឋមន្ដ្រី បានកោតសរសើរដល់មន្ដ្រី និងថ្នាក់ដឹកនាំរដ្ឋបាលជលផលគ្រប់លំដាប់ថ្នាក់ ដែលបានយកអស់កម្លាំងកាយចិត្ដរួមគ្នាកសាងសមិទ្ធផលនេះឡើង សម្រាប់ទុកជាប្រយោជន៏ដល់កូនចៅជំនាន់ក្រោយ និងជាពិសេសក្នុងពេលបច្ចុប្បន្ន សម្រាប់ធ្វើការសិក្សាស្រាវជ្រាវផ្នែកមច្ឆជាតិ ទាំងត្រី សត្វ ល្មូន និងព្រៃលិចទឹក។ ឯកឧត្តមបានសង្កត់ធ្ងន់ថា ការងារស្រាវជ្រាវនៅតែដើរតួនាទីយ៉ាងសំខាន់ក្នុងការអភិវឌ្ឍន៏វិស័យជលផលទាំងក្នុងពេលបច្ចុប្បន្ន ក៏ដូចជាក្នុងពេលអនាគត។
ឯកឧត្តមរដ្ឋមន្ដ្រី ក៏បានលើកឡើងនូវការងារសំខាន់២សម្រាប់មន្ដ្រី និងថ្នាក់ដឹកនាំរដ្ឋបាលជលផលយកទៅអនុវត្ដនោះ។ គឺទី១-ការងារស្រាវជ្រាវលើវិស័យជលផល។ ឯកឧត្តមបានពន្យលថា ប្រជាជនកម្ពុជាភាគច្រើនប្រកបរបរនេសាទ ខណៈដែលព្រៃលិចទឹក ដែលជាជម្រកត្រីពងកូនមានការបាត់បង់។ អាកាសធាតុមានការប្រែប្រួល។
ប្រភេទត្រីមួយចំនួនមានការថយចុះ។ នេះគឺជាហេតុផលចាំបាច់ ដែលយើងត្រូវនាំគ្នាយកចិត្ដទុកដាក់ធ្វើការស្រាវជ្រាវ និងជំរុញការងារចិញ្ចឹមត្រី លែងមេត្រីពូជតាមបឹងធម្មជាតិ ធ្វើយ៉ាងណាឱ្យការនេសាទមាននិរន្ដរភាព ជាពិសេសរក្សាឱ្យបាននូវពាក្យបុរាណថា ទីណាមានទឹកទីនោះមានត្រី។ ត្រូវកៀរគរធនធានមនុស្ស និស្សិត ធនធានថវិកាគ្រប់មជ្ឈដ្ឋាន ដើម្បីពង្រីកការងារស្រាវជ្រាវ។
ទី២-កម្ដៅកើនឡើង ភ្លៀងប្ដូររដូវ ខ្យល់ព្យុះ ទឹកជំនន់កម្រិតទន្លេសាបស្រកចុះខុសប្រក្រតី ការធំធាត់របស់សត្វ និងរុក្ខជាតិ ត្រី ជាពិសេសការបន្ដពូជផលដំណាំដែលជាអាហាររបស់មនុស្សនិងសត្វ ដំណាំចំណីសត្វ(ស្មៅ) ត្រូវបានទទួល រងនូវផលប៉ះពាល់ពីការបម្រែបម្រួលអាកាសធាតុ និងជាពិសេសជំងឺឆ្លងថ្មីៗបានកើតឡើងទៅលើសត្វ រុក្ខជាតិ និងមនុស្ស។ ប្រភេទសត្វព្រៃ និងត្រីមួយចំនួនត្រូវទទួលរងនូវការថមថយបរិមាណ និងខ្លះទៀតទទួលរងនូវការផុតពូជទាំងស្រុង។ បញ្ហាចម្បងៗទាំងអស់នៅ គឺជាប្រធានបទសម្រាប់អ្នកស្រាវជ្រាវ សិស្ស និស្សិត គ្រប់អង្គភាពពាក់ព័ន្ធ ដែលត្រូវលើកយកមកសិក្សា ដោយត្រូវតម្រង់ទិសធ្វើយ៉ាងណាស្វែងរកបន្ដការមួយសមស្របខ្ឡួនឱ្យបានទៅនឹងស្ថានភាពនៃការប្រែប្រួលអាកាសធាតុ។
ជាមួយនឹងពិធីនេះ លោករដ្ឋមន្ដ្រីបានលែងមេត្រីពូជចំនួន៥០០គីឡូក្រាមនៅទីនោះផងដែរ៕