ឯកឧត្ដម បណ្ឌិត ច័ន្ទ សារុន រដ្ឋមន្រ្ដីក្រសួងកសិកម្មរុក្ខាប្រមាញ់ និងនេសាទ បានជំរុញឱ្យមានចលនាដាំដើមឈើឱ្យបានទូទាំងប្រទេស ពិសេសនៅតាមវត្ដអារាម ។ នាពាក់កណ្ដាលសប្ដាហ៏នេះឯកឧត្ដមរដ្ឋមន្រ្ដី រួមជាមួយលោកជាអនុរដ្ឋលេខាធិកា និងមន្រ្ដីថ្នាក់ដឹកនាំនាយកដ្ឋានជំនាញមួយចំនួន បានអញ្ជើញចូលរួមជាអធិបតីក្នុងពិធីចែក និងដាំកូនឈើ ដោយមានការចូលរួមពីលោក ខូយ សុខា អភិបាលខេត្ដ និងមន្រ្ដីទូទាំងខេត្ដប្រមាណ ២៥០ នាក់ ។
នាឱកាសនោះលោកអភិបាលខេត្ដ បានថ្លែងថាការងារដាំកូនឈើនេះ គឺយើងទទួលខុសត្រូវទាំងអស់គ្នា មិនមែនក្រសួងណាមួយ ឬស្ថាប័នណាមួយទេ។ លោកបានអំពាវនាវដល់ជនដែលកំពុងប្រព្រឹត្ដអំពើខុសច្បាប់កាប់ព្រៃទន្រ្ទានយកដីធ្វើជាកម្មសិទ្ធិ ការធ្វើអាជីវកម្មខុសច្បាប់សុំឱ្យឈប់ជាបន្ទាន់ និងរួមមកជួយការពារព្រៃឈើយើងវិញ ។
មានប្រសាសន៏នាឱកាសនោះ ឯកឧត្ដមរដ្ឋមន្រ្ដីបានផ្ដាំផ្ញើសួរសុខទុក្ខពីសំណាក់សម្ដេចទាំងបី ហើយបានរំលឹកបន្ទូលរបស់សម្ដេចព្រះករុណាព្រះមហាក្សត្រកម្ពុជាក្នុងឱកាសរុក្ខទិវា ៩ កក្កដា ទាក់ទងទៅនឹងបញ្ហាព្រៃឈើ ។ ឯកឧត្ដមបានបន្ដដោយលើកឡើងពីសារសំខាន់របស់ព្រៃឈើ សម្រាប់មនុស្សនិងសេដ្ឋកិច្ច។ ឯកឧត្ដមអំពាវនាវឱ្យភ្ញាក់រលឹកដាំឈើឱ្យបានទូទាំងប្រទេស និងគ្រប់ពេលវេលា ។ គ្រប់ខណ្ឌរដ្ឋបាលព្រៃឈើត្រូវសហការជាមួយព្រះសង្ឃគ្រប់វត្ដយកកូនគគីរ និងឈើទាលទៅដាំតាមវត្ដឱ្យបានគ្រប់វត្ដទូទាំងប្រទេល ។
មន្រ្ដីគ្រប់រូបត្រូវមានឯកសារស្ដីពីច្បាប់ព្រៃឈើក្នុងដៃ ដើម្បីជាត្រីវិស័យក្នុងការបំពេញការងារ ។ ត្រូវខិតខំរៀនសូត្របន្ថែមទៀត រៀនឱ្យចេះប្រាកដទើបអនុវត្ដការងារមានប្រសិទ្ធភាព ។ បទល្មើសចាប់ផ្ដើមកើតមានឡើងវិញមន្រ្ដីគោលដៅត្រូវចាត់ការរឿងនេះឱ្យមានប្រសិទ្ធភាព និងទាន់ពេលវេលា។ត្រូវគ្រប់គ្រង និងតាមដានដីសម្បទានដែលរដ្ឋបានដកហូតមកជាសម្បត្ដិរដ្ឋវិញនោះឱ្យបានច្បាស់លាស់ ។ ត្រូវជំរុញឱ្យម្ចាស់ដីសម្បទានបង់សួយសារអាករជូនរដ្ឋឱ្យបានទាន់ពេលវេលា ។
មន្រ្ដីគ្រប់លំដាប់ថ្នាក់ត្រូវសហការឱ្យបានល្អ ជាមួយអាជ្ញាធរដែនដី និងស្ថាប័នពាក់ព័ន្ធ ធ្វើយ៉ាងណាអនុវត្ដភារកិច្ចរបស់យើងឱ្យបានជោគជ័យ ។ ឯកឧត្ដមរដ្ឋមន្រ្ដីបានរំលឹកជាចុងក្រោយថា គ្រប់សង្កាត់រដ្ឋបាលព្រៃឈើទាំងអស់ ត្រូវធ្វើថ្នាលបណ្ដុះកូនឈើ និងត្រូវរៀបចំធ្វើពិធីប្រគល់កូនឈើ ដល់ប្រជាកសិករឱ្យបានគ្រប់ៗសង្កាត់ទាំងអស់ទូទាំងប្រទេសក្នុងឆ្នាំ ២០១០ នេះ ៕