កសិករដាំបន្លែនៃសហគមន៏នៅភូមិវាល សង្កាត់ច្រកម្ទេស ក្រុងបាវិតបានទទួលការលើកទឹកចិត្ដពីសំណាក់ឯកឧត្ដមរដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទខណៈដែល ឯកឧត្ដមបានអញ្ជើញទៅទីនោះកាលពីចុងសប្ដាហ៏កន្លងទៅនេះ ។
មន្ដ្រីខុទ្ទកាល័យ ឯកឧត្ដមរដ្ឋមន្ដ្រីបានប្រាប់កាល ពីថ្ងៃទី២៦ ខែកក្កដា នេះថាឯកឧត្ដម បណ្ឌិត ច័ន្ទ សារុន រដ្ឋមន្ដ្រីកសិកម្ម បានអញ្ជើញទៅពិនិត្យដំណាំបន្លែ និងសំណេះសំណាលជាមួយប្រជាកសិករចំនួន១០០គ្រួសារ និងប្រគល់ម៉ាស៊ីនកិនស្រូវ ១ គ្រឿងដល់សហគមន៏នៅភូមិវាល ។
មន្ដ្រីដដែលបានបន្ដថា ដោយមានការចូលរួមពីលោកអភិបាលរងខេត្ដកែវសាមឿនផង នេះជាផ្នែកមួយលើកទឹកចិត្ដ និងជម្រុញដល់កសិករដាំបន្លែនៅទីនោះ ដែលជាមុខរបរបន្ថែមរបស់ពួកគេ ។ នៅចំពោះមុខកសិករ ឯកឧត្ដមរដ្ឋមន្ដ្រីបានកោតសរសើរដល់កសិករ ដែលយកចិត្ដទុកដាក់ខិតខំក្នុងការរៀបចំបង្កើតសហគមន៏ទោះស្ថេតជាបុរេសហគមន៏នៅឡើយក៏ដោយ ។ ឯកឧត្ដមពន្យល់ ថានេះជាការគិតដ៏ត្រឹមត្រូវមួយ ។
ឯកឧត្ដមរដ្ឋមន្ដ្រី បានបញ្ជាក់ថា បានបង្កើតមុខរបរបន្ថែម គឺជាប្រភពចំណូលថ្មីមួយទៀត ។ ជាមួយគ្នានេះការចិញ្ចឹមសត្វក៏ជាមុខរបរប្រពៃណីមួយទៀតដែលមានជាយួរយារមកហើយ ។ ប៉ុន្ដែអ្វីដែលត្រូវគិតគូរពេលនេះគឺការផ្លាស់ប្ដូតម្លាប់ ។ ការចិញ្ចឹមសត្វត្រូវចិញ្ចឹមដោយផ្លាស់ប្ដូរពីការចិញ្ចឹមសត្វសម្រាប់តែផ្គត់ផ្គង់សម្រាប់គ្រួសារឱ្យទៅជាការចិញ្ចឹមដើម្បីធ្វើពាណិជ្ជកម្មមានន័យថា ចិញ្ចឹមសម្រាប់លក់ ។
ត្រូវឈប់ចិញ្ចឹមគោ ក្របី លែងពាសវាលពាសកាល ។ ត្រូវដាំស្មៅឱ្យជាចំណីសត្វ។ ប្ដូរពូជគោដោយត្រូវជ្រើសរើសពូជដែលមានតម្លៃ ។ បង្កាត់ពូជគោដោយសិប្បនិម្មិតដែលធ្វើឱ្យទទួលផលខ្ពស់ ។ ទាក់ទិនការដាំបន្លែ ឯកឧត្ដមរដ្ឋមន្ដ្រីសំណូមពរដោយសូមឱ្យសហគមន៏បន្ដដាំបន្លែ ហើយអគ្គនាយកដ្ឋានកសិកម្ម ត្រូវជួយជំរុញដើម្បីឱ្យសហគមន៏នេះក្លាយជាសហគមន៏ពេញសិទ្ធិនិងមានភាពជាម្ចាស់ ។ កុំដាំដំណាំតែមួយមុខត្រូវដាំគ្រឿងទេសផង ។ ជំរុញឱ្យផលិតកម្មបន្លែនេះឱ្យឆ្លើយតបទីផ្សារសម្រាប់ផ្គត់ផ្គង់បានក្នុងតំបន់សេដ្ឋកិច្ចពិសេសក្រុងបានវិត ។
ជាការលើកទឹកចិត្ដ ឯកឧត្ដមរដ្ឋមន្ដ្រីបានផ្ដល់ជូននូវម៉ាស៊ីនកិនស្រូវខ្នាតតូចមួយនិងស្មៅចំណីសត្វ ។ ឯកឧត្ដមបានស្នើឱ្យសមាជិកសហគមន៏ទាំងអស់ត្រូវចេះ ថែរក្សាម៉ាស៊ីនកិនស្រូវដែលប្រគល់ជូននេះប្រយោជន៏ដើម្បីប្រើប្រាស់បានយូរអង្វែង ។
រដ្ឋមន្ដ្រីក៏បានបញ្ជាក់ផងដែរថា មកទល់ពេលនេះអ្វីដែលដូនតាបានបន្សល់ទុកឱ្យដូចគ្រាប់ប្រភេទពូជស្រូវប្រភេទពូជឈើទាំងអស់ និងពូជត្រីគ្រប់ប្រភេទមិនទាន់មានប្រភេទណាមួយត្រូវបានបាត់បង់ទេ មានតែបណ្ដុះនិងការពារថែមទៀត ៕