កសិករចំនួន150នាក់ ដែលត្រូវបានជ្រើសមកពីឃុំចំនួន15 ស្រុកត្រាំកក់នោះ បានមកទទួលការរៀនសូត្រលើបច្ចេកទេសដាំបន្លែ។ ពួកគេក៏នឹងក្លាយជាកសិករបង្គោល ជួយបង្រៀនដល់កសិករដទៃទៀត នៅពេលគេត្រឡប់ទៅភូមិឋានរបស់ពួកគេវិញផងដែរ។ ការរៀនសូត្រតាមរបៀបជាក់ស្តែងនេះ បានធ្វើឡើងនៅផ្ទះកសិករ ឡុង យ៉ន នៅភូមិត្រពាំងឈូក ឃុំលាយបូរ។
ឡុង យ៉ន ជាកសិករគំរូមួយនៅក្នុងស្រុកនេះដែលមានពិសោធន៍ និងទទួលផលជាច្រើនតាមរយៈការដាំបន្លែរបស់គាត់។ ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញទៅចូលរួម ស្តាប់ និងមើលដំណើរការរៀនសូត្រនេះដោយផ្ទាល់ កាលពីដើមសប្តាហ៌កន្លងមកនេះ។
នៅទីនោះឯកឧត្តមរដ្ឋមន្ត្រី បានលើកទឹកចិត្តដល់អ្នករៀបចំកម្មវិធីបង្រៀន សរសើរដល់កសិករ ដែលចូលរួម និងសរសើរដល់ការផ្តល់នូវការឧទេ្ទសនាមជាក់ស្តែងរបស់កសិករ ឡុង យ៉ន និង មន្ត្រីជំនាញកសិកម្ម។ឯកឧត្តមរដ្ឋមន្ត្រី បានបញ្ជាក់នេះជាការចាប់ផ្តើម ដ៏ល្អមួយដែលស្របទៅតាមគោលនយោបាយកសិកម្មរបស់ក្រសួង ហើយក៍ស្របទៅ នឹងស្ថានភាពជាក់ស្តែងក្នុងការជំរុញផលិតផលកសិកម្ម។
ការជួបជុំផ្តល់ជាមេរៀន ផ្តល់ជាបទពិសោធន៌ឱ្យគ្នាទៅវិញទៅមកកាន់តែញឹកញាប់ គឺការកាន់តែប្រសើរ ហើយមិនមែនធ្វើត្រឹមតែការដាំបន្លែទេ តែក៏ត្រូវជំរុញការធ្វើរបៀបនេះលើវិស័យផ្សេងទៀតដូចជា ស្រូវ ចិញ្ចឹមសត្វ ចិញ្ចឹមត្រី ឫមុខរបរផ្សេងទៀត ដែលអាចជួយផ្សព្វផ្សាយឱ្យគ្នាបាន។ បន្លែមិនត្រឹមតែជាមុខរបរបន្ថែមរបស់កសិករប៉ុណ្ណោះទេ តែបន្លែអាចរកចំណូលបាន ច្រើនការធ្វើស្រូវទៀតផង។
ខណៈនេះបន្លែរបស់យើងជាច្រើនត្រូវបាននាំចូលមកពី ប្រទេសក្រៅ ដូចនេះកសិករយើង ត្រូវតែប្រឹងប្រែងរួមគ្នាដាំបន្លែ ដើម្បីឈានទៅជំនួស បន្លែដែលនាំចូល។ ឯកឧត្តមរដ្ឋមន្ត្រីណែនាំឱ្យនាយកដ្ឋានសាកវប្បកម្ម ត្រូវរៀបចំឱ្យមានសន្និបាតឫការជួបជុំកសិករ ដើម្បីពិនិត្យវាយតម្លៃ និងជំរុញផលិតផលបន្លែក្នុងប្រទេសឱ្យការរីកចម្រើន កាត់បន្ថយការនាំចូលពីបរទេស។ ឯកឧត្តមរដ្ឋមន្ត្រី ចង់ឱ្យការប្រឡងប្រណាំនេះចេញពីស្រុកត្រាំកក់នេះទៅ។