ឯកឧត្ដមបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម បានស្នើឱ្យកសិករសាកល្បងប្រើប្រាស់ ប្រភពទឹកក្រោមដី និងប្រើទឹកដោយសន្សំសំចៃ ដើម្បីសង្គ្រោះស្រូវស្រែដែលកំពុងជួបភាពរាំងស្ងួត
កាលពីថ្ងៃទី៧ ខែសីហា ឯកឧត្ដមរដ្ឋមន្ដ្រីក្រសួងកសិកម្ម និងសហការីបានទៅពិនិត្យតំបន់រាំងស្ងួត និងសំណេះសំណាលជាមួយប្រជាកសិករ ចំនួន១២០គ្រួសារ មកពីឃុំចំនួន២ គឺឃុំស្វាយជ្រុំ និងឃុំពង្រ ស្រុករលាប្អៀរ។
ឯកឧត្ដមរដ្ឋមន្ដ្រី បានចុះដល់វាស្រែដែលទទួលរងភាពរាំងស្ងួត ដើម្បីមើលពីស្ថានភាព និងក្រោយមកក្នុងឱកាសសំណេះសំណាល ឯកឧត្ដមរដ្ឋមន្ដ្រីបានផ្ដល់ឱកាសប្រជាកសិករឡើងមានមតិពីបញ្ហាលំបាកដែលបានជួបប្រទះ។ នៅចំពោះកសិករ ឯកឧត្ដមរដ្ឋមន្ដ្រីបានផ្ដល់ជាអនុសាសន៏មួយចំនួន ។
ឯកឧត្ដមបញ្ជាក់ថា បើនៅតែអត់ទាន់មានទឹកភ្លៀង សូមសាកល្បងទាញយកទឹកក្រោមដីមកប្រើប្រាស់ (ជីកអណ្ដូង) ដើម្បីដោះទាល់ បានទឹកដកសំណាប ។សូមឱ្យប្រជាជនចេះប្រើប្រាស់ទឹកឱ្យចំគោលដៅ ដោយសន្សំសំចៃ និងឱ្យមានប្រសិទ្ធភាព ។ ឈប់ប្រើទីសំណាបធំៗ មកប្រើទីសំណាបតូចៗវិញ ប្រើពូជតិចប្រើទឹកតិច ។
ឯកឧត្ដមបន្ដថា ប្រធានការិយាល័យកសិកម្មគ្រប់ស្រុកទាំងអស់ជាពិសេស ស្រុករលៀប្អៀរ ស្រុកកំពង់ត្រឡាច ស្រុកកំពង់លែង ត្រូវជំរុញឱ្យប្រជាកសិករភ្ជួរដាស់ដី ត្រូវតាមដានយកចិត្ដទុកដាក់សភាពការណ៏ទឹកភ្លៀងជាប្រចាំ (បើរយះពេលកន្លះខែទៀតនៅមិនទាន់មានទឹកភ្លៀងទេ ត្រូវសហការជាមួយមន្ទីរ ពិភាក្សាប្ដូរពូជទាំងអស់ចេញ ដោយប្ដូរមកប្រើពូជស្រូវស្រាលមិនប្រកាន់រដូវ និងទាញយកទឹកក្រោមដីកមប្រើប្រាស់។
ស្រែដែលមានទួលខ្ពស់ធ្វើស្រូវមិនបានសូម ឱ្យប្ដូរមុខដំណាំភ្លាម (ពោត សណ្ដែក ល្ពៅ។ល។ ដំណាំដែលត្រូវការទឹកតិច)។ការិយាល័យកសិកម្មស្រុកមានភារកិច្ចស្រង់ឡើងវិញ ពីព័ត៌មាននៃការប្រើប្រាស់ពូជស្រូវតាមផ្ទះប្រជាជន។ ជាមួយគ្នានេះមន្ទីរកសិកម្មក៏ត្រូវប្រយ័ត្នប្រយែងរឿងមមាចត្នោតផងដែរ ៕