លិខិតថ្វាយព្រះពរ
ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ
នៃព្រះរាជាណាចក្រកម្ពុជា ក្នុងឱកាសបុណ្យខួបលើកទី៧
នៃការគ្រងព្រះបរមរាជសម្បត្តិ
ទូលព្រះបង្គំយើងខ្ញុំទាំងអស់គ្នាជារដ្ឋមន្ត្រី រដ្ឋលេខាធិការ អនុរដ្ឋលេខាធិការ មន្ត្រីរាជការ និយោជិត កម្មករ ទាំងអស់នៃក្រសួងកសិកម្ម រុក្ខាប្រមាញ់ និងនេសាទ សូមទ្រង់ព្រះមេត្តាប្រោស និងសូមទ្រង់ព្រះរាជានុញ្ញាតឱ្យទូលព្រះបង្គំយើងខ្ញុំទាំងអស់គ្នាបានសម្តែងនូវកត្តញ្ញូតាធម៌ និងមនោសញ្ចេតនារំភើបរីករាយជាទីបំផុត ដើម្បីចូលរួមអបអរសាទរបុណ្យខួបលើកទី៧ នៃការគ្រងព្រះបរមរាជសម្បត្តិរបស់ព្រះករុណាជាអម្ចាស់ជីវិតតម្កល់លើត្បូងជាទី គោរពសក្ការៈដ៏ខ្ពង់ខ្ពស់បំផុត។
ថ្ងៃទី២៩ ខែតុលា ឆ្នាំ២០១១ គឺជាថ្ងៃគម្រប់ខួបលើកទី៧ នៃព្រះរាជពិធីគ្រងរាជសម្បត្តិរបស់ព្រះករុណាជាអម្ចាស់ ទួលព្រះបង្គំយើងខ្ញុំជារដ្ឋមន្ត្រី រដ្ឋលេខាធិការ អនុរដ្ឋលេខាធិការ មន្ត្រីរាជការ និយោជិក កម្មករទាំងអស់ នៃក្រសួងកសិកម្ម រុក្ខាប្រមាញ់ និងនេសាទ សូមលើកហត្ថអញ្ជលិបង្គំទូលថ្វាយព្រះពរសព្វសាធុការ បវរមហាប្រសើរ និងសូមទូលថ្វាយព្រះរាជកុសល ចំពោះព្រះករុណាជាអម្ចាស់ជីវិតតម្កល់លើត្បូងជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គទ្រង់ប្រកបដោយព្រះបញ្ញាញាណវាងវៃ ព្រះរាជសុខភាពមាំមួន ព្រះកាយពលខ្លាំងខ្លា ព្រះជន្មាយុយឺនយូរជាងរយព្រះវស្សា ដើម្បីទ្រង់គង់ប្រថាប់ក្នុងព្រះបរមសិរីរាជសម្បត្តិជារៀងរហូត សូមទ្រង់ឈ្នះអស់មារសត្រូវ សព្វទិសានុទិស និងសូមទ្រង់គង់នៅជាមហាម្លប់ដ៏សែនត្រជាក់ និងដ៏សុខក្សេមក្សាន្ត សម្រាប់ដល់អស់ប្រជានុរាស្ត្រ របស់ព្រះអង្គជានិច្ចនិរន្តរ៍ស្ថិតស្ថេរចីរកាលតរៀងទៅ។
សេចក្តីគួរពុំគួរ សូមព្រះករុណាជាអង្គម្ចាស់ជីវិតតម្កល់លើត្បូងទ្រង់ព្រះមេត្តាប្រោស។
ក្រាបបង្គំទូលថ្វាយនៅរាជធានីភ្នំពេញ, ថ្ងៃទី២៧ ខែតុលា ឆ្នាំ២០១១
តំណាងមន្ត្រីរាជការ និយោជិក កម្មករ
រដ្ឋមន្ត្រី
ច័ន្ទ សារុន
| File | ការពិពណ៌នា |
|---|---|
 លិខិតថ្វាយព្រះពរ | លិខិតថ្វាយព្រះពរដើម្បីចូលរួមអបអរសាទរបុណ្យខួបលើកទី៧ នៃការគ្រងព្រះបរមរាជសម្បត្តិរបស់ព្រះករុណាជាអម្ចាស់ជីវិតតម្កល់លើត្បូងជាទី គោរពសក្ការៈដ៏ខ្ពង់ខ្ពស់បំផុត |