ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចុះពិនិត្យស្ថានភាពស្រូវប្រាំង និងការបូមទឹកជួយសង្គ្រោះស្រូវដែលប្រឈមនឹងការខ្វះទឹក នៅក្រុងសៀមរាប ខេត្តសៀមរាប
ចេញផ្សាយ ៥ កុម្ភៈ ២០២៥ 2622
នៅថ្ងៃទី០៤ ខែកុម្ភៈ ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក អ៊ឺង គឹមលាង អភិបាលរង នៃគណៈអភិបាលខេត្តសៀមរាប លោក ប៉ែន ប៊ុនធឿន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក នួន គ្រឹស្នា ប្រធានមន្ទីរធនធានទឹក និងឧតុនិយមខេត្ត ព្រមទាំងមានការចូលរួមពីថ្នាក់ដឹកនាំ និងមន្ត្រីជំនាញនៃរដ្ឋបាលក្រុងសៀមរាប និងអាជ្ញាធរសង្កាត់សៀមរាប បានចុះពិនិត្យស្ថានភាពដំណាំស្រូវប្រាំង និងការបូមទឹកជួយសង្គ្រោះបន្ថែម ដល់ដំណាំស្រូវដែលប្រឈមនឹងការខ្វះទឹក ស្ថិតនៅក្នុងសង្កាត់សៀមរាប ក្រុងសៀមរាប ខេត្តសៀមរាប។
ដំណើរបេសសកម្មនោះ ធ្វើឡើងក្នុងគោលបំណង ដើម្បីពិនិត្យមើលពីស្ថានភាពប្រភពទឹកស្ទឹងសៀមរាប ដែលបានបើកជូនតាមការស្នើសុំរបស់ប្រជាកសិករ ការបូមចែកចាយទឹករបស់ប្រជាកសិករ តម្រូវការទឹកសម្រាប់ដំណាំស្រូវ និងពិនិត្យទៅលើស្ថានភាពនៃការលូតលាស់របស់ដំណាំស្រូវនៅតំបន់រងគ្រោះ។
ជាមួយគ្នានោះដែរ ដោយមានការជួយអន្តរាគមន៍ទាន់ពេលវេលាពីសំណាក់ ឯកឧត្តមអភិបាលខេត្ត មន្ទីរជំនាញពាក់ព័ន្ធ និងអាជ្ញាធរជាតិអប្សរា នៅក្នុងការបញ្ជូនទឹកពីទំនប់អាងក្រពើ តាមដងស្ទឹងដែលកំពុងធ្វើការស្តារ និងជួសជុល បានធ្វើឱ្យដំណាំស្រូវដែលកំពុងត្រូវការទឹក ទទួលបានទឹកជាបន្តបន្ទាប់ រហូតមកដល់ថ្ងៃនេះ គឺពុំមានការខូចខាតនោះទេ ។
នាឱកាសនោះ ឯកឧត្តមរដ្ឋលេខាធិការ បានណែនាំ និងផ្តល់អនុសាសន៍ដល់ប្រជាកសិករសូមប្រើប្រាស់ទឹកដោយសន្សំសំចៃ សហការចែកចាយគ្នាឱ្យបានល្អ ជាពិសេសចំពោះមន្ត្រីជំនាញ និងអាជ្ញាធរមូលដ្ឋានសូមបន្តការតាមដាន និងសម្របសម្រួលស្នើសុំទឹកបន្តនៅពេលខាងមុខ។
មុននឹងបញ្ចប់កម្មវិធីចុះពិនិត្យ ឯកឧត្តមរដ្ឋលេខាធិការ បានពន្យល់ណែនាំ ផ្សព្វផ្សាយ អំពីអត្ថប្រយោជន៍នៃការចូលរួមចងក្រងជាសហគមន៍កសិកម្មទំនើប ដល់ប្រជាកសិករ អាជ្ញាធរភូមិ ឃុំ ស្រុក ឱ្យបានជ្រាប ដើម្បីជួយជំរុញប្រជាកសិករក្នុងមូលដ្ឋានឱ្យបានយល់ នឹងចូលរួមចងក្រងបង្កើតជាសហគមន៍កសិកម្មទំនើបនេះឡើងនាពេលឆាប់ៗខាងមុខ។ ជាមួយគ្នានោះដែរ ប្រជាកសិករបង្ហាញការសប្បាយចិត្ត ដោយចាប់អារម្មណ៍សន្យានឹងរៀបចំខ្លួន ចូលរួមជាមួយនឹងគម្រោងបង្កើតសហគមន៍កសិកម្មទំនើបនៅតំបន់របស់ពួកគាត់៕
