ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យលោក Philipe GUERRER នាយកក្រុមហ៊ុន អេស៊ាន ខនសតស្យូមគ្រុម (ASIAN Consortium Group) ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ៨ មីនា ២០១៨ 3722

នៅទីស្តីការក្រសួងកាលពីរសៀលថ្ងៃ០៧ រោចខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៧ ខែកុម្ភៈ ឆ្នាំ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យលោក Philipe GUERRER នាយកក្រុមហ៊ុន អេស៊ាន ខនសតស្យូមគ្រុម (ASIAN Consortium Group) និងសហការីចូលជួបសម្តែងការគួរសមនិងពិភាក្សាការងារទាក់ទងនិងការធ្វើអាជីវកម្មជីជីវសាស្រ្ត។ លោក Philipe GUERRER បានជម្រាបជូនឯកឧត្តមជ្រាបថាក្រុមហ៊ុននេះគឺជាក្រុមហ៊ុនផលិតនិងលក់ចែកចាយជីជីវសាស្រ្តនៅទូទាំងពិភពលោក ពិសេសនៅសហភាពអឺរ៉ុប។ ដោយសារកម្ពុជាមានសក្តានុពលលើធនធានធម្មជាតិដែលអាចធ្វើការអភិវឌ្ឍន៍វិស័យកសិកម្មឲ្យមានការរីកចម្រើន ក្រុមហ៊ុនមានបំណងនាំចូលប្រភេទជីនេះមកប្រទេសកម្ពុជាសម្រាប់ប្រើប្រាស់លើដំណាំកសិកម្ម ព្រោះវាមានគុណសម្បត្តិដូចជា៖ គ្មានសំណល់ជាតិពុលក្នុងផលិតផល អាចប្រើប្រាស់បានគ្រប់កម្រិតនៃផលិតកម្ម ធ្វើការបង្វែរ ឬកែទម្លាប់ពីការប្រើជីគីមីដែលធ្វើឲ្យប៉ះពាល់ដល់សុខភាពអ្នកបរិភោគ បំពុលបរិស្ថាន បំផ្លាញគុណភាពដី និងដំណាំ ក្រៅពីនេះផលិតផលនេះអាចជួយបង្កើនទិន្នផល ការពារដំណាំពីការបំផ្លាញសត្វចង្រៃ ពិសេសបង្កើនភាតរបរិស្ថានបានយ៉ាងល្អ។ លោក Philipe GUERRER បានបញ្ជាក់បន្ថែមថាក្រោយបានគោលការណ៍នាំចូលពីក្រសួង ក្រុមហ៊ុននឹងបញ្ជូនមន្រ្តីបច្ចេកទេសមកធ្វើបទបង្ហាញស្តីពីការប្រើប្រាស់ផលិតផលឲ្យបានត្រឹមត្រូវ សមស្របតាមបច្ចេកទេសជូនអតិថិជន។ នាឱកាសនេះឯកឧត្តមរដ្ឋមន្រ្តី វេង សាខុន បានសម្តែងនូងការគាំទ្រផលិតផលរបស់ក្រុមហ៊ុន ដោយសារតែ បច្ចុប្បន្នទីផ្សារផលិតផលកសិកម្មកម្ពុជាទាំងក្នុងនិងក្រៅប្រទេសមាននិន្នាការឆ្ពោះទៅរកការប្រើប្រាស់និងបរិភោគផលិតផលសរីរាង្គ។ ម៉្យាងទៀតដោយសារទីផ្សារសហភាពអឺរ៉ុបបានទទួលស្គាល់ផលិតផលនេះរួចហើយ ដូច្នេះក្នុងពេលអនាគតបើប្រជាកសិករប្រើប្រាស់ផលិតផលនេះ នោះវានឹងបង្កលក្ខណៈងាយស្រូលក្នុងការផ្សាភ្ជាប់ទីផ្សារវាងផលិតផលកសិកម្មកម្ពុជាជាមួយអឺរ៉ុប។ មានមតិផ្តាំផ្ញើរ ឯកឧត្តមរដ្ឋមន្រ្តីស្នើឲ្យក្រុមហ៊ុនសហការជាមួយសាកលវិទ្យាល័យភូមិន្ទកសិកម្ម កសិដ្ឋាន និងខេត្តគោលដៅសំខាន់ៗដែលមានសក្តានុពលក្នុងការផលិតបន្លែ និងផ្លែឈើសរីរាង្គដើម្បីសាកល្បងអនុវត្តពិនិត្យលើគុណភាព សុវត្ថិភាព គុណសម្បត្តិ និងគុណវិបត្តិរបស់ផលិតផល រួចធ្វើការផ្សព្វផ្សាយជូន ដល់អតិថិជនមុននិងធ្វើការចែកចាយលើទីផ្សារ។ ក្រៅពីនោះ ក្រុមហ៊ុនគួរពិចារណាលើខ្សែសង្វាក់ផលិតកម្មបន្លែ និងផ្លែឈើតាំងពីការផលិត វេចខ្ចប់ និងទីផ្សារដើម្បីបង្កើនតម្លៃបន្ថែម ក៏ដូចជាការបង្កើនប្រាក់ចំណូលក្នុងគ្រួសារ កាត់បន្ថយភាពក្រីក្រ និងចំណាកស្រុក។ ជំនួបពិភាក្សានេះត្រូវបានបញ្ចប់ក្នុងបរិយាកាសយោគយល់ និងសហការគ្នាល្អប្រសើរ។