ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ ថ្លែងសុន្ទរកថាគន្លឹះនៅក្នុងសន្និសីទអន្តរជាតិស្តីពី “Reducing Food Loss and Waste”
ចេញផ្សាយ ២៥ កក្កដា ២០២៥ 2656
នាព្រឹកថ្ងៃទី២៥ ខែកក្កដា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា បានថ្លែងសុន្ទរកថាគន្លឹះនៅក្នុងសន្និសីទអន្តរជាតិស្តីពី “Reducing Food Loss and Waste” នៅទីក្រុងជីនណាន ខេត្តសានទុង សាធារណរដ្ឋប្រជាមានិតចិន។
ថ្លែងទៅកាន់អង្គសន្និសីទដែលមានការចូលរួមពីប្រទេសជាសមាជិក G20 ដៃគូអភិវឌ្ឍន៍ និងអង្គការអន្តរជាតិនានា ឯកឧត្តមរដ្ឋលេខាធិការ បានរំលេចពីសារៈសំខាន់នៃសន្និសីទ ជាពិសេសប្រធានបទដ៏គួរឱ្យចាប់អារម្មណ៍ស្តីពី “ការកាត់បន្ថយការបាត់បង់ស្បៀង និងកាកសំណល់ចំណីអាហារ”ដែលគួរលើកមកពិភាក្សា និងស្វែងរកវិធានការសកលរួមគ្នា ស្របពេលដែលប្រជាជននៅលើពិភពលោកនាពេលបច្ចុប្បន្ន បាននិងកំពុងជួបប្រឈមនឹងភាពអត់ឃ្លាន និងកង្វះខាតអាហារូបត្ថម្ភ។
ដើម្បីរួមចំណែកលើកិច្ចការងារនេះ រាជរដ្ឋាភិបាលកម្ពុជាអាណត្តិទី៧ តាមរយៈក្រសួងកសិកម្ម រុក្ខាប្រមាញ់ និងនេសាទ បានដាក់ចេញនូវគោលនយោបាយសហគមន៍កសិកម្មទំនើប ដែលនឹងបង្កើនផលិតកម្មកសិកម្មដែលមានការគ្រប់គ្រងច្បាស់លាស់ និងហេដ្ឋារចនាសម្ព័ន្ធគ្រប់គ្រាន់ ដើម្បីធានានូវស្ថេរភាពនៃការផលិត ការរក្សាទុក និងការផ្គត់ផ្គង់ទៅកាន់ទីផ្សារ សំដៅជួយបង្កើនសេដ្ឋកិច្ចជាតិ កាត់បន្ថយការផលិតលើស និងកាកសំណល់សេសសល់ក្រោយការប្រមូលផល។ កម្មវិធី និងគំនិតផ្ដួចផ្ដើម ជាច្រើនទៀតបាននិងកំពុងអនុវត្ត ឬអភិវឌ្ឍន៍ ដូចជាការពង្រាយមន្ត្រីកសិកម្មឃុំ ការបង្កើតApp ដើម្បីភ្ជាប់កសិករទៅទីផ្សារ ដែលរួមចំណែកដល់ការកាត់បន្ថយការបាត់បង់ស្បៀង និងកាកសំណល់ចំណីអាហារ។
ជាទីបញ្ចប់ ឯកឧត្តមរដ្ឋលេខាធិការ បានបង្ហាញពីជំហរគាំទ្ររបស់ក្រសួងលើការចូលរួមកាត់បន្ថយការបាត់បង់ស្បៀង និងកាកសំណល់ចំណីអាហារជាមួយដៃគូពាក់ព័ន្ធ ព្រមទាំងកៀរគរវិនិយោគិនអន្តរជាតិចូលរួមវេទិកា និងពិព័រណ៌កសិកម្មកម្ពុជាឆ្នាំ២០២៥(CAFE25) ដែលនឹងរៀបចំនៅកម្ពុជា ក្នុងអំឡុងខែវិច្ឆិកា ឆ្នាំ២០២៥ ដើម្បីសិក្សាពីសក្តានុពល និងឱកាសវិនិយោគកសិកម្មនៅកម្ពុជា ដោយផ្ដោតលើផ្នែកកែច្នៃ វេចខ្ចប់ និងដឹកជញ្ជូន សំដៅកាត់បន្ថយការបាត់បង់ពីការនាំចេញវត្ថុធាតុដើម បង្កើតតម្លៃបន្ថែម និងប្រាក់ចំណេញ៕
