លោករដ្ឋមន្ត្រី រួមជាមួយអភិបាលរងខេត្ត និងសហការីបានអញ្ជើញមកពិនិត្យស្ថានីយផលិតពូជស្រូវបល័ង្គ នៅសង្កាត់ដំរី ជាន់ខ្លា ក្រុងស្ទឹងសែន

ចេញ​ផ្សាយ​ ២២ កក្កដា ២០១៩ 3686

នេះជាកម្មវិធីចុងក្រោយនៃដំណើរបេសកកម្មរយ:ពេលពីរថ្ងៃចុងសប្តាហ៍ជុំវិញបឹងទន្លេសាបរបស់ឯកឧត្តមរដ្ឋមន្រ្តី វេង សាខុន និងសហការី។ នៅរសៀលថ្ងៃដដែល លោករដ្ឋមន្ត្រី រួមជាមួយអភិបាលរងខេត្ត និងសហការីបានអញ្ជើញមកពិនិត្យស្ថានីយផលិតពូជស្រូវបល័ង្គ នៅសង្កាត់ដំរី ជាន់ខ្លា ក្រុងស្ទឹងសែន។ លោកប្រធានមន្ទីរបានឲ្យដឹងថា បច្ចុប្បន្នស្ថានីយមានផ្ទៃដី ១១ហត ក្នុងនោះមានជាដីស្រែសម្រាប់ទុកផលិតពូជស្រូវ អគាររដ្ឋបាល ឃ្លាំង រោងជាង។ល។ ស្ថានីយមានតួនាទីជាកន្លែងផលិតពូជស្រូវទុកសម្រាប់ចែកជូនប្រជាកសិករ និងជាថ្នាលបណ្តុះបណ្តាលបច្ចេកទេសកសិកម្មសមស្របមួយផងដែរ។

បន្ទាប់ពីបានចុះពិនិត្យស្ថានភាពជារួច លោកនៅតែមានអារម្មណ៍គិតគូពីការចុះអន្តរាគមន៍ជួយកសិករដែលកំពុងទទួលរងនូវផលប៉ះពាល់ដោយគ្រោះរាំងស្ងួតនៅតាមបណ្តាខេត្តដែលលោកបានអញ្ជើញចុះទៅពិនិត្យឃើញផ្ទាល់ក្នុងរយ:ពេល២ ថ្ងៃកន្លងទៅនេះ។ អញ្ចឹងហើយលោកបានចេញបញ្ជាឲ្យអគ្គនាយកដ្ឋានកសិកម្ម នាយកដ្ឋានវិស្វកម្មកសិកម្ម និងមន្ទីរប្រមូលគ្រឿងចក្រទាំងអស់ចុះមកអន្តរាគមន៍ភ្ជួរដីជូនកសិករនៅថ្ងៃចន្ទស្អែកនេះជាបន្ទាន់ ព្រមទាំងនាំយកស្រូវពូជមកចែកជូនកសិករនៅតំបន់ដែលឯកឧត្តមបានសន្យាជាមួយប្រជាជន ។ ទន្ទឹមនឹងនេះមន្ទីកសិកម្ម រុក្ខា ប្រមាញ់ និងនេសាទ គួរធ្វើតាមក្រោយ ដើម្បីធ្វើយ៉ាងណាឲ្យទាន់សភាពការ។ ថ្ងៃចុងក្រោយនៃដំណើរបេសកកម្មនេះ ឯកឧត្តមរដ្ឋមន្ត្រី បានស្នើសុំ ដល់អ្នកពាក់ព័ន្ធទាំងអស់ ត្រូវជួយដល់ប្រជាកសិករឲ្យបានទាន់ពេលវេលា នៅតំបន់កំពុងប្រឈមនឹងគ្រោះរាំងស្ងួត ។