ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំក្រុមការងារចម្រុះ ចុះពិនិត្យកសិដ្ឋានបំប៉ននិងចិញ្ចឹម បង្កង និងត្រីប្រា នៅក្នុងខេត្តតាកែវ

ចេញ​ផ្សាយ​ ១៥ សីហា ២០២៥ 512

នៅថ្ងៃទី១៥ ខែសីហា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ឋាប្រមាញ់ និងនេសាទ ដោយមានការចូលរូមពី ឯកឧត្តមអនុរដ្ឋលេខាធិការ ទឹម បូរក្ស និងក្រុមការងារ លោក ថាយ សុមុនី ប្រធាននាយកដ្ឋានអភិវឌ្ឍន៍វារីវប្បកម្ម នៃរដ្ឋបាលជលផល ជំនាញការបរទេសក្រុមហ៊ុនNIRAS (IT2) នៃកម្មវិធី CaPFish Aquaculture/IT2 លោក ញ៉ិប ស្រ៊ន ប្រធានកសិកម្មខេត្តតាកែវ លោក អ៊ុក ហាក់  នាយរងខណ្ឌរដ្ឋបាលជលផលតាកែវ  ដើម្បីចុះពិនិត្យកសិដ្ឋានបំប៉ននិងចិញ្ចឹម បង្កង និងត្រីប្រា ក្នុង ខេត្តតាកែវ។

ក្នុងដំណើរទស្សនកិច្ចនេះ ក្រុមការងារបានចុះពិនិត្យទីតាំងកសិដ្ឋានរបស់លោក ចាន់ ពង្ស ស្ថិតក្នុងភូមិភ្នំបុរី ឃុំព្រែកផ្ទោល ខេត្តតាកែវ ទី២.កសិដ្ឋានរបស់លោកស្រី អ៊ុន ចន្ធី ភូមិតាផ ឃុំព្រែកផ្ទោល ស្រុកអង្គរបុរី ខេត្តតាកែវ ទី៣. កសិដ្ឋានរបស់លោក លឹម ស៊ុនឆៃ ភូមិទួលសាំង ឃុំអង្គរបុរី ខេត្តតាកែវ ទី៤. កសិដ្ឋានរបស់លោក កង គឺមហៃ ភូមិតាអី ឃុំបាស្រែ ស្រុកអង្គរបុរី ខេត្តតាកែវ ទី៥. កសិដ្ឋានរបស់លោកស្រី វ៉ិត ថាវី ភូមិព្រៃចង្រៀក ឃុំស្រង៉ែរ ស្រុកទ្រាំង ខេត្តតាកែវ និងទី៦.កសិដ្ឋានរបស់លោក សាប់ សារុន ភូមិព្រៃដកពរ ឃុំសំបូរ ស្រុកទ្រាំង ខេត្តតាកែវ។

ជាមួយគ្នានេះ ក្នុងដំណើរទស្សនកិច្ចនេះ ក្រុមការងារបានជួបសំណេះសំណាលជាមួយកសិករចិញ្ចឹមបង្កង និងត្រីប្រា បានផ្តល់អនុសាសន៍ណែនាំអំពីបច្ចេកទេស តាមលក្ខណៈបច្ចេកទេស និងបង្ហាញអំពីខ្សែច្រវាក់ផលិតកម្ម លើដំណើរការកាត់បន្ថយថ្លៃដើមផលិត។

ទន្ទឹមនឹងនេះ ឯកឧត្តមរដ្ឋលេខាធិការបានសង្កត់ធ្ងន់ថា មន្ត្រីជំនាញជលផល ជាពិសេសរាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ នឹងបន្តយកចិត្តទុកដាក់ផ្តល់គាំទ្របច្ចេកទេស និងដោះស្រាយបញ្ហា និងសំណូមពរនានា របស់វារីវប្បករ ឬម្ចាស់កសិដ្ឋានបង្កាត់ភ្ញាស់ និងកសិដ្ឋានចិញ្ចឹមត្រី ឱ្យបានទាន់ពេលវេលា សំដៅធ្វើយ៉ាងណាឱ្យមានទិន្នផល និងទទួលប្រាក់ចំណេញសម្រាប់ផ្គត់ផ្គង់ជីវភាពគ្រួសារ៕