ឯកឧត្តម​​បណ្ឌិត អ៊ុក រ៉ាប៊ុន ជួប​ពិភាក្សា​ជាមួយ​ ឯកឧត្តម Hossein Alvandi ឯកអគ្គរដ្ឋទូត​នៃ សាធារណ​រដ្ឋអ៊ី​ស្លាម​អ៊ីរ៉ង់

ចេញ​ផ្សាយ​ ២៣ មករា ២០១៨ 3474

ឯកឧត្ដមបណ្ឌិត អ៊ុក រ៉ាប៊ុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានទទួលស្វាគមន៍ និងអរគុណយ៉ាង ជ្រាលជ្រៅចំពោះឯកឧត្ដម Hossein Alvandi ឯកអគ្គរដ្ឋទូតនៃ សាធារណរដ្ឋអ៊ីស្លាមអ៊ីរ៉ង់ ដែលបានជូនពរនិងអបអរសាទរ ចំពោះរាជរដ្ឋាភិបាលនីតិកាលទី៥នៃរដ្ឋសភាក្នុងការបន្ដដឹកនាំព្រះរាជាណាចក្រកម្ពុជាប្រកបដោយសន្ដិភាព ស្ថិរភាពនិងមានកិច្ច អភិវឌ្ឍប្រកបដោយមោទនភាព ក្នុងជំនួបសវនាការដែលបានប្រព្រឹត្ដទៅកាលពីថ្ងៃទី០២ ខែមិថុនា ឆ្នាំ២០១៤ នៅទីស្ដីការ ក្រសួងកសិកម្ម រុក្ខាប្រមាញ់ និងនេសាទ។

ឯកឧត្ដមទូតបានរំលឹកអំពីទំនាក់ទំនងការទូតកម្ពុជា-អ៊ីរ៉ង់ដែលមានជាយូរមកហើយ ប៉ុន្ដែពុំទាន់មានកិច្ចសហប្រតិបត្ដិ ការជាក់លាក់នៅឡើយជាពិសេសលើផ្នែកសេដ្ឋកិច្ច ហើយថ្នាក់ដឹកនាំថ្មីនៃប្រទេសអ៊ីរ៉ង់ដែលបានឡើងកាន់ដំណែងកាលពីឆ្នាំមុនកន្លងមកនេះបាន និងកំពុងយកចិត្ដទុកដាក់ពង្រឹង និងធ្វើឱ្យចេញជាផ្លែផ្កានូវកិច្ចសហប្រតិបត្ដិការអន្ដរជាតិ ហើយក្នុងឋានៈជាឯកអគ្គ រដ្ឋទូត ឯកឧត្ដម មានភារកិច្ចច្រើនដើម្បីសម្រេចគោលបំណងនេះ។

ឯកឧត្ដមយល់ឃើញអំពី សារសំខាន់នៃកិច្ចការផ្នែកកសិ ពាណិជ្ជកម្ម ពោលគឺ ការនាំចេញ និងនាំចូលរវាងប្រទេសទាំង២នូវកសិផល និង សម្ភារកសិកម្ម ដោយអ៊ីរ៉ង់មានសម្ភារ និងធាតុ ចូលកសិកម្មជាច្រើនដែលមានគុណភាព និងតម្លៃសមរម្យ ក៏ដូចជាការទាក់ទាញ ក្រុមហ៊ុនអ៊ីរ៉ង់មកធ្វើវិនិយោគលើដំណាំស្រូវ និង កសិផលផ្សេងៗទៀត សម្រាប់នាំចេញទៅអ៊ីរ៉ង់ផ្ទាល់។ ជាមួយនេះ អ៊ីរ៉ង់ក៏មានលទ្ធភាព ច្រើនក្នុងការផ្ដល់ការគាំទ្របច្ចេកទេស កសិកម្ម និងសម្របសម្រួលផ្ដល់អាហារូបករណ៍ដល់កម្ពុជាផងដែរ តាមរយៈ ការបណ្ដុះបណ្ដាល ទស្សនកិច្ចសិក្សារយៈពេលខ្លី ការផ្លាស់ប្ដូរជំនាញ និងបទពិសោធន៍ទាក់ទងនឹងផលិតកម្ម និងការស្រាវជ្រាវ កសិកម្មជាដើម។

ដើម្បីធ្វើឱ្យសម្រេចជាផ្លែផ្កានូវ កិច្ចសហប្រតិបត្ដិការខាងលើក្នុងនាមរដ្ឋមន្ដ្រីក្រសួងកសិកម្មអ៊ីរ៉ង់ ឯកឧត្ដមឯកអគ្គរដ្ឋទូត បានគោរពអញ្ជើញឯកឧត្ដមរដ្ឋមន្ដ្រី ដឹកនាំគណៈប្រតិភូដែលមានអ្នកជំនាញពាក់ព័ន្ធ និងក្រុមហ៊ុនឯកជនទៅធ្វើទស្សនកិច្ចនៅប្រទេសអ៊ីរ៉ង់ ដើម្បីស្វែងយល់អំពីភាព សមស្របនិងសក្ដានុពលភាពនានាសម្រាប់កិច្ចសហប្រតិបត្ដិការក្នុងវិស័យកសិកម្មរវាងប្រទេសទាំងពីរ។ ជាការឆ្លើយតប ឯកឧត្ដមរដ្ឋមន្ដ្រីបានថ្លែងអំណរគុណ និងអបអរសាទរចំពោះបំណងនៃការពង្រឹងកិច្ចសហប្រតិបត្ដិការ ព្រមទាំងការអញ្ជើញឱ្យទៅធ្វើទស្សនកិច្ចនាពេលខាងមុខ។ ឯកឧត្ដមនឹងពិនិត្យលទ្ធភាពពេលវេលា តាមជាក់ស្ដែង និងធ្វើទំនាក់ ទំនងជាបន្ដ តាមរយៈក្រសួងការបរទេស និងសហប្រតិបត្ដិការអន្ដរជាតិ។

ឆ្លៀតឱកាសនោះឯកឧត្ដមរដ្ឋមន្ដ្រីបានជម្រាបអំពី គោលនយោបាយរបស់ក្រសួង ពិសេសយុទ្ធសាស្ដ្រចតុកោណដំណាក់កាលទី៣របស់រាជរដ្ឋាភិបាលកម្ពុជា ក្នុងការគាំទ្រការវិយោគ ការបង្កើនផលិតភាព ពិពិធភាវូបនីយកម្ម និងពាណិជ្ជូបនីយកម្មកសិកម្ម សំដៅកាត់បន្ថយភាពក្រីក្ររបស់ប្រជាពលរដ្ឋ និងអភិវឌ្ឍ សេដ្ឋកិច្ចជាតិ ព្រមទាំងការសម្រេចនូវគោលនយោបាយរបស់រាជរដ្ឋាភិបាលក្នុងការនាំចេញអង្ករឱ្យបានយ៉ាងតិច ១ លានតោន នៅ ឆ្នាំ២០១៥ ទន្ទឹម នឹងការយកចិត្ដទុកដាក់ខ្ពស់លើការបង្កើនផលិតកម្មសត្វ ជលផល ព្រមទាំងកសិផលជាច្រើនទៀតដែលអាចនឹង នាំចេញទៅ ប្រទេសអ៊ីរ៉ង់បាន។ កិច្ចសវនាការនេះ បានប្រព្រឹត្ដទៅក្នុងបរិយាកាសរីករាយ ស្និិទ្ធស្នាល និងកិច្ចសហប្រតិបត្ដិការខ្ពស់។