ព័ត៌មានផ្សេងៗទៀត
លោកជំទាវ អ៊ឹម រចនា អញ្ជើញដឹកនាំកិច្ចប្រជុំពិគ្រោះយោបល់អំពី «ការរៀបចំផែនការសកម្មភាពការពារប្រភេទធនធានជលផលសមុទ្រកំពុងរងគ្រោះ» នៅខេត្តកំពត
ចេញផ្សាយ ២៨ មីនា ២០២៦ 2132
នៅថ្ងៃទី២៧ ខែមីនា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំពិគ្រោះយោបល់អំពី «ការរៀបចំផែនការសកម្មភាពការពារប្រភេទធនធានជលផលសមុទ្រកំពុងរងគ្រោះ» ដែលកិច្ចប្រជុំធ្វើឡើងនៅសាលប្រជុំសហគមន៍នេសាទព្រែកត្នោត ក្នុងខេត្តកំពត។
កិច្ចប្រជុំពិគ្រោះយោបល់នេះ រៀបចំដោយនាយកដ្ឋានអភិរក្សជលផល នៃអគ្គនាយកដ្ឋានជលផល សហការជាមួយអង្គការ WEA, ActionAid និង NGO Forum និងមានការចូលរួមពីលោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល និងមន្រ្តីជំនាញនៃអគ្គនាយកដ្ឋានជលផល ខណ្ឌរដ្ឋបាលជលផលតំបន់ឆ្នេរ លោក ទុយ សេរីវឌ្ឍនា នាយកកម្មវិធីអង្គការសម្ព័ន្ធភាពសត្វព្រៃ និងដៃគូពាក់ព័ន្ធជាច្រើនទៀត ព្រមទាំងតំណាងសហគមន៍មូលដ្ឋាន សរុបអ្នកចូលរួមប្រមាណជាង៦០នាក់។
លោកជំទាវ អ៊ឹម រចនា បានគូសបញ្ជាក់ថា កិច្ចប្រជុំពិគ្រោះយោបល់នេះ ធ្វើឡើងជាបន្តពីកិច្ចប្រជុំលើកទី១ រៀបចំធ្វើកាលពីឆ្នាំ២០២៥ ដែលសម្រេចបានការកំណត់មូលហេតុនិងកត្តាគម្រាមកំហែង ដល់ជីវិតថនិកសត្វសមុទ្រ និងវារីសត្វ។ នៅក្នុងកិច្ចប្រជុំលើកទី២នេះ លោកជំទាវបានយកបញ្ហាដែលកំណត់បានមកក្រាលលើតុ ហើយអនុញ្ញាតឲ្យអ្នកចូលរួមទាំងអស់ផ្ដល់ធាតុចូល ដើម្បីរៀបចំផែនការសកម្មភាពរយៈពេល៥ឆ្នាំ សម្រាប់ការពារវារីសត្វកំពុងរងគ្រោះថ្នាក់ ក៏ដូចជាប្រភេទសត្វសមុទ្រជិតផុតពូជ ដែលមានដូចជា៖ ផ្សោត ជ្រូកទឹក និងអណ្តើកសមុទ្រ និងសេះសមុទ្រ ដែលមានវត្តមាននៅខេត្តជាប់តំបន់ឆ្នេរទាំង៤របស់កម្ពុជា។
ជាលទ្ធផលនៃកិច្ចពិភាក្សារយៈពេល១ថ្ងៃ ក្រុមការងារពាក់ព័ន្ធទាំងអស់ បានកំណត់យុទ្ធសាស្រ្ត និងដាក់ចេញនូវយន្តការរួមគ្នា គាំទ្រដល់កិច្ចការគ្រប់គ្រង ការពារ ស្រាវជ្រាវជីវចម្រុះ អភិរក្ស និងអភិវឌ្ឍធនធានជលផលសមុទ្រ។ នាយកដ្ឋានអភិរក្សនៃអគ្គនាយកដ្ឋានជលផល នឹងយកលទ្ធផលនៃកិច្ចពិភាក្សានេះ ទៅសិក្សា វិភាគ និងចងក្រង មុននឹងដាក់ចេញនូវ «ផែនការសកម្មភាពរយៈពេល ៥ឆ្នាំ» ដើម្បីធានាថា ធនធានជលផលដែលកំពុងរងគ្រោះ ទទួលបានការការពារអភិរក្ស ប្រកបដោយប្រសិទ្ធភាព និងប្រសិទ្ធផល សម្រាប់សុខភាពប្រព័ន្ធអេកូឡូស៊ី រួមចំណែកលើកកម្ពស់ជីវភាពសហគមន៍មូលដ្ឋាន វឌ្ឍនភាពសេដ្ឋកិច្ច និងមនុស្សជំនាន់ក្រោយ៕
