ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចុះពិនិត្យកសិដ្ឋានចិញ្ចឹមសត្វ និងស្ថានភាពដំណាំស្រូវ ក្រោយការជួយអន្តរាគមន៍ទឹកជួយសង្រ្គោះស្រូវ នៅខេត្តសៀមរាប

ចេញ​ផ្សាយ​ ៣ មីនា ២០២៥ 3246

ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានដឹកនាំមន្ត្រីជំនាញចុះពិនិត្យកសិដ្ឋានចិញ្ចឹមជ្រូករបស់លោក ហេង គឹមឡុង ស្ថិតនៅភូមិត្រពាំងវែង ឃុំគោកធ្លកលើ ស្រុកជីក្រែង ខេត្តសៀមរាប។

ឯកឧត្តមរដ្ឋលេខាធិការ បានពន្យល់ណែនាំឱ្យម្ចាស់កសិដ្ឋានត្រូវទុកដាក់កាកសំណល់ឱ្យបានត្រឹមត្រូវតាមបច្ចេកទេស ចៀសវាងប៉ះពាល់ក្លិនដល់អ្នកជិតខាង ព្រមទាំងបានណែនាំអំពីការប្រើប្រាស់អាងប្រព្រឹត្តិកម្មជីវឧស្ម័នជាមួយនិងម៉ាស៊ីនភ្លើង។

ទន្ទឹមនឹងនោះ ឯកឧត្តមរដ្ឋលេខាធិការ ក៏បានគូសបញ្ជាក់ អំពីគោលនយោបាយរបស់រាជរដ្ឋាភិបាល ផ្តល់ការអនុគ្រោះថ្លៃអគ្គិសនីដល់វិស័យកសិកម្ម ចាប់ពីម៉ោង៩:០០ យប់ ដល់ម៉ោង ៧:០០ ព្រឹក។ ដូច្នេះស្នើឱ្យម្ចាស់កសិដ្ឋានទាក់ទងអាជ្ញាធរអគ្គិសនី ភ្ជាប់ប្រើប្រាស់ការអនុគ្រោះថ្លៃអគ្គិសនីសម្រាប់វិស័យកសិកម្ម កាត់បន្ថយថ្លៃដើមផលិត ដើម្បីទទួលបានផលចំណេញបន្ថែមពីមុខរបរចិញ្ចឹមជ្រូករបស់គាត់។

នាដំណើរបេសកកម្មនោះ ឯកឧត្តមរដ្ឋលេខាធិការ បានបន្តចុះទៅពិនិត្យស្ថានភាពប្រមូលផលស្រូវ ដែលក្រុមការងារមន្ទីរកសិកម្មខេត្តសៀមរាប បានជួយអន្តរាគមន៍ទឹក សម្រាប់ជួយសង្គ្រោះស្រូវដែលរងផលប៉ះពាល់ដោយគ្រោះរាំងស្ងួតចំនួន ៥០០ហិកតា ស្ថិតនៅឃុំស្ពានត្នោត ស្រុកជីក្រែង នាពេលកន្លងមក។ ជាលទ្ធផល ស្រូវដែលបានជួយសង្គ្រោះនោះ ទទួលបានផលល្អ និងបានច្រូតកាត់ ដោយពុំមានការខូចខាតឡើយ៕