ព័ត៌មានផ្សេងៗទៀត
ឯកឧត្ដមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារចុះពិនិត្យ និងវាយតម្លៃផលប៉ះពាល់ និងខូចខាតដោយទឹកជំនន់ នៅស្រុកខ្សាច់កណ្តាល ខេត្តកណ្តាល
ចេញផ្សាយ ២៤ តុលា ២០២៥ 351
នៅថ្ងៃទី២៤ ខែតុលា ឆ្នាំ២០២៥ ឯកឧត្តម តូច ប៊ុនហ៊ួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមដំណើរដោយ ឯកឧត្តម សុទ្ធ គឹមកុលមុនី អគ្គលេខាធិការរងគណៈកម្មាធិការជាតិគ្រប់គ្រងគ្រោះមហន្តរាយ លោក បណ្ឌិត គង់ គា ប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្ម លោក ប៊ុន ទូនស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាល និងសហការី អាជ្ញាធរមូលដ្ឋានស្រុក មន្ត្រីកសិកម្មឃុំ នៅស្រុកខ្សាច់កណ្តាល បានចុះពិនិត្យស្ថានភាពនៃផលប៉ះពាល់ដំណាំស្រូវដោយសារទឹកជំនន់ ស្ថិតនៅឃុំព្រែកប្រសព្វ និងឃុំរកាជន្លឹង ស្រុកខ្សាច់កណ្តាល ខេត្តកណ្តាល។
នាដំណើរចុះពិនិត្យនោះ ឯកឧត្តមរដ្ឋលេខាធិការ បានណែនាំមន្ទីរកសិកម្មខេត្តកណ្តាល អាជ្ញាធរមូលដ្ឋានស្រុក ឃុំ និងមន្ត្រីកសិកម្មឃុំ ត្រូវវាយតម្លៃផលប៉ះពាល់ជាក់ស្តែង និងកំណត់អត្តសញ្ញាណគ្រួសារកសិករ ដែលរងការខូចខាតដំណាំស្រូវ និងងាយរងគ្រោះ ដើម្បីសុំកិច្ចអន្តរាគមន៍ពីប្រព័ន្ធស្បៀងបម្រុងកម្ពុជា ដើម្បីដាំដុះឡើងវិញឱ្យបានទាន់ពេលវេលា បន្ទាប់ពីទឹកស្រក។
សូមបញ្ជាក់ថា បើតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តកណ្តាល ទឹកជំនន់ដែលបានធ្វើឱ្យជន់លិចដំណាំស្រូវសរុបចំនួន៨ ស្រុក-ក្រុង ក្នុងនោះរួមមាន៖ ស្រុកកៀនស្វាយ ស្រុកខ្សាច់កណ្តាល ស្រុកលើកដែក ស្រុកល្វាឯម ស្រុកមុខកំពូល ស្រុកពញាឮ ស្រុកស្អាង និងក្រុងអរិយក្សត្រ ដែលប៉ះពាល់សរុបមានចំនួន៥៩ ឃុំ-សង្កាត់ និងមានចំនួន២៦៦ភូមិ៕
