ឯកឧត្តម ហ៊ាន វណ្ណហន អញ្ជើញជាអធិបតីបើកសិក្ខាសាលាយេនឌ័រលើកកម្ពស់តួនាទីបុរស-ស្ត្រី នៅខេត្តក្រចេះ

ចេញ​ផ្សាយ​ ២៦ មីនា ២០២៦ 1574

នៅព្រឹកថ្ងៃទី២៦ ខែមីនា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបើកសិក្ខាសាលាបណ្ដុះបណ្ដាលស្ដីពីទស្សនទានយេនឌ័រ ក្នុងការលើកកម្ពស់តួនាទីបុរស-ស្ត្រី នៅទីរួមខេត្តក្រចេះ ក្រោមក្របខ័ណ្ឌគម្រោងកែលម្អសន្តិសុខទឹកកម្ពុជា (CaWSIP_MAFF)។
សិក្ខាសាលានេះ មានការចូលរួមពីគ្រប់កម្រិត រួមមាន ក្រុមការងារអនុវត្តគម្រោង CaWSIP-MAFF ថ្នាក់ជាតិ-ខេត្ត តំណាងយេនឌ័រ CaWSIP-MoWRAM ថ្នាក់ដឹកនាំមន្ទីរកសិកម្មខេត្តក្រចេះ អាជ្ញាធរស្រុក ឃុំ ភូមិ មន្ត្រីកសិកម្មឃុំ រហូតដល់សហគមន៍នៅក្នុងតំបន់អនុវត្តន៍គម្រោង។
ថ្លែងក្នុងការបើកសិក្ខាសាលា ឯកឧត្តមបណ្ឌិត ហ៊ាន វណ្ណហន បានគូសបញ្ជាក់ពីគោលបំណងស្នូលចំនួនបី គឺទី១.យល់ពីគោលគំនិតយេនឌ័រសំខាន់ៗ និងតួនាទីផ្សេងៗគ្នារបស់ស្ត្រី និងបុរសក្នុងវិស័យកសិកម្ម ហើយអាចអនុវត្តចំណេះដឹងនេះនៅក្នុងសកម្មភាពកសិកម្មប្រចាំថ្ងៃនៅក្នុងសហគមន៍។ ទី២.ការលើកកម្ពស់សមភាពយេនឌ័រនៅក្នុងសហគមន៍និងបម្រើជាចំណុចស្នូលសម្រាប់បន្តការយល់ដឹងអំពីយេនឌ័រ។ ទី៣.ពង្រឹងសិទ្ធិអំណាច និងការចូលរួមរបស់បុរស និងស្ត្រីនៅក្នុងសហគមន៍។
ឯកឧត្តមរដ្ឋលេខាធិការ បានបញ្ជាក់ថា សិក្ខាសាលានេះនឹងជួយឱ្យសិក្ខាកាមទាំងអស់យល់ច្បាស់ពីតួនាទី ឋានៈ និងសិទ្ធអំណាច ការផ្លាស់ប្តូរទម្លាប់ និងការសម្រេចចិត្ត របស់បុរស និងស្ត្រី ក្នុងវិស័យកសិកម្ម និងប្រកាន់យកសមភាព និងសមធម៌ក្នុងការសម្រេចចិត្តធ្វើកសិកម្មតាមគ្រួសារ និងជីវិតសហគមន៍ប្រចាំថ្ងៃ។
គួរបញ្ជាក់ផងដែរថា គម្រោងកែលម្អសន្តិសុខទឹកកម្ពុជា (CaWSIP) តែងតែយកចិត្តទុកដាក់ខ្ពស់លើការបញ្ជ្រាបយេនឌ័រ ក្នុងគ្រប់សកម្មភាពអភិវឌ្ឍន៍របស់ខ្លួន ដើម្បីធានាថាការគ្រប់គ្រងធនធានទឹក និងកសិកម្ម ផ្ដល់ផលប្រយោជន៍ស្មើៗគ្នាដល់ពលរដ្ឋគ្រប់រូប៕