ឯកឧត្តមអនុរដ្ឋលេខាធិការ សុខ វិសាល អញ្ជើញដឹកនាំក្រុមការងារចុះពិនិត្យស្ថានភាពតម្លៃស្រូវ​ នៅខេត្តតាកែវ

ចេញ​ផ្សាយ​ ១៤ សីហា ២០២៥ 911

នៅថ្ងៃទី១៤ ខែសីហា ឆ្នាំ២០២៥ ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងាររួមដំណើរដោយ លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ អាជ្ញាធរស្រុក-ឃុំ មន្ត្រីកសិកម្មឃុំ ចុះពិនិត្យការប្រមូលផលស្រូវ នៅក្នុងឃុំធ្លក ស្រុកទ្រាំង និងឃុំរមេញ ស្រុកកោះអណ្ដែត ខេត្តតាកែវ។

ឯកឧត្តម​អនុរដ្ឋលេខាធិការ​ បានគូសបញ្ជាក់ថាការប្រមូលផលស្រូវដើមរដូវវស្សាទូទាំងខេត្តទទួលបានទិន្នផលល្អ​ តម្លៃសមរម្យ​ និងមានឈ្មួញកំពុងបន្តចុះទិញជាធម្មតា។ ក្រុមការងារបានបន្តចុះទៅពិនិត្យការនាំចេញស្រូវនៅច្រកកំពង់អំពិល ឃេីញថាស្រូវនៅខេត្តតាកែវប្រមាណ៧០% បាននាំចេញ​ និងបានអនុវត្តជាបន្តបន្ទាប់។

ឯកឧត្តមអនុរដ្ឋលេខាធិការ បានចុះជួបជាមួយកសិករក្នុងសហគមន៍កសិកម្មភ្នំដិនសែនសុខ ប្រមាណ ៤០នាក់ ស្ថិតនៅឃុំភ្នំដិន ស្រុកគិរីវង់​ និងបានសំណេះសំណាលអំពីស្ថានភាពតម្លៃទីផ្សាររបស់ស្រូវអង្ករទាំងក្នុងស្រុក​ និងអន្តរជាតិ ព្រមទាំងបានលេីកទឹកចិត្តចូលរួមជាសហគមន៍កសិកម្មទំនើប ដែលផ្តល់អត្ថប្រយោជន៍ជាច្រេីនក្នុងការការកាត់បន្ថយតម្លៃដើមផលិតកម្ម និងរកទីផ្សារទុកជាមុនតាមរយៈផលិតកម្មតាមកិច្ចសន្យា៕