ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យលោកស្រី ចំរើន មុតិតា តំណាងឲ្យធនាគារពិភពលោក និងជាប្រធានក្រុមការងារ ចូលជួបសម្តែងការគួរសម ពិភាក្សាការងារ

ចេញ​ផ្សាយ​ ៧ មីនា ២០១៨ 3843

នៅទីស្តីការក្រសួងព្រឹកថ្ងៃពុធ ១០រោច ខែមិកសិរ ឆ្នាំរកា ព.ស ២៥៦១ ត្រូវនិងថ្ងៃទី១៣ ខែធ្នូ ឆ្នាំ២០១៧ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខា ប្រមាញ់ និងនេសាទ បានអនុញ្ញាឲ្យលោកស្រី ចំរើន មុតិតា តំណាងឲ្យធនាគារពិភពលោក និងជាប្រធានក្រុមការងារ និងសហការីចូលជួបសម្តែងការគួរសម ពិភាក្សាការងារ រួចស្នើសុំអនុសាសន៍ជាគន្លឹះសំខាន់ៗមួយចំនួនដើម្បីកសាងគម្រោងថ្មីមួយស្តីពី “ការធ្វើពិពិធកម្មកសិកម្មកម្ពុជា Cambodia Agriculture Sector Diversification Project” ឲ្យបានរលូននិងទទួលបានជោគជ័យ។ តាមអ្វីដែលលោកស្រីចំរើន មុតិតា ជម្រាបជូនឯកឧត្តមរដ្ឋមន្រ្តីជ្រាបថា បេសកកម្មរបស់ក្រុមការងារនាពេលនេះគឺមានបំណង រៀបចំផែនការសកម្មភាពនៃដំណើរការបឋមរបស់គម្រោង កំណត់សមាសភាពពាក់ព័ន្ធចូលរួម កំណត់ប្រព័ន្ធតាមដាននិងវាយតម្លៃ ឯកភាពលើការគ្រប់គ្រងគម្រោង រៀបចំធ្វើទស្សនកិច្ចនៅតាមបណ្តាខេត្តដែលមានសក្តានុពល សម្របសម្រួល និងរៀបចំកិច្ចប្រជុំដើម្បីអនុម័តសម្រេច។ គម្រោងនេះក៏នឹងមានភាគីពាក់ព័ន្ធសំខាន់មានជាអាទិ៍ វិស័យឯកជន ដៃគូអភិវឌ្ឍ ។ នាឱកាសនេះឯកឧត្តមរដ្ឋមន្រ្តី បានជម្រាបជូនក្រុមការងារពីការវិវឌ្ឍវិស័យកសិកម្មក្នុងរយៈពេលប៉ុន្មានឆ្នាំចុងក្រោយ និងបញ្ហាប្រឈមមួយចំនួនដូចជាការធ្លាក់ចុះកម្លាំងពលកម្មដោយសារការធ្វើចំណាកស្រុក តម្លៃពលកម្មកើនឡើង ទិន្នផលកសិកម្មនៅមានកម្រិតទាបបើធៀបជាមួយប្រទេសជិតខាង ស្របពេលដែលសេចដ្ឋកិច្ចជាតិមានការរីកចម្រើន ចំនួនប្រជាជនមានការកើនឡើង ទីផ្សារកសិផលលក្ខណៈប្រកួតប្រជែងខ្លាំង ការវិនិយោគលើវិស័យនេះក៏នៅមានកម្រិត ខណៈដែលវិស័យនេះមានសក្តានុពលឬឱកាសសម្រាប់ធ្វើការវិនិយោគ។ ដើម្បីអភិវឌ្ឍវិស័យអទិភាពមួយនេះក្នុងចំណោមវិស័យផ្សេងៗទៀតដែលរាជរដ្ឋាភិបាលបានកំណត់រួចក្នុងយុទ្ធសាស្រ្តចតុកោណ ឯកឧត្តមរដ្ឋមន្រ្តីបានជូនអនុសាសន៍ ជាគន្លឹះដល់ក្រុមការងារគម្រោងរបស់ធនាគារពិភពលោកយកទៅពិនិត្យពិចារណា ធ្វើយ៉ាងណាឲ្យការអនុវត្តគម្រោងដំណើរបានរលូននិងទទួលបានជោគជ័យ ទាំងម្ចាស់ជំនួយ និងអ្នកទទួលជំនួយ(កសិករ) ក្នងខេត្តគោលដៅ។ អនុសាសន៍ទាំងនោះរួមមាន៖

ទី១- គួរសិក្សានិងធ្វើការកែសម្រួលលើប្រព័ន្ធស្រោចស្របកសិកម្ម ធ្វើយ៉ាងងាយស្រួលដល់កសិករក្នុងការ ប្រើប្រាស់ ដោយគួរតែសិក្សាពីលទ្ធភាពអាចទាញយកទឹកពីប្រភពទឹកដែលមានស្រាប់ដូចជាអាងទឹក ទន្លេ បឹង ត្រពាំង ឬអណ្តូង។ គួរបង្កើនសមត្ថភាពដល់អ្នកប្រើប្រាស់លើការងារគ្រប់គ្រងទឹក ការប្រើប្រាស់ទឹកឲ្យបានសមស្រប។

ទី២-គួរសិក្សាពីលទ្ធភាពនៃការផ្លាស់ប្តូរមុខដំណាំ គឺត្រូវធ្វើយ៉ាងណាដាំដុះដំណាំទៅតាមតម្រូវការទីផ្សារ សមស្របទៅតាមស្ថានភាព និងគុណភាពដី និងលក្ខណៈអំណោយផលក្នុងការស្រោចស្របទឹក។

ទី៣-គួរសិក្សាពីលទ្ធភាពនៃការអនុវត្តពិពិធកម្មកសិកម្មទំនើបដើម្បីធានាបានទាំងបរិមាណ និងគុណភាព ដើម្បីបង្កើនចំណូលក្នុងគ្រួសារ ដែលសមាជិកចេះតែកើនឡើង និងកំណើនសេដ្ឋកិច្ច មានកើនឡើងជារៀងរាល់ឆ្នាំ។

ទី៤-ជំរុញការប្រើប្រាស់បច្ចេកវិទ្យាកសិកម្មទំនើបដែលមានលក្ខណៈសមស្របទៅតាមលទ្ធភាពនិងស្ថានភាពរបស់កសិករ ដើម្បីធានាបាននូវនិរន្តរភាពនៃការផលិត និងការផ្គត់ផ្គង់។ ទី៥-គួរសិក្សាពីយន្តការនៃការផលិតតាំងពីការជ្រើសរើសពូជ ការដាំដុះ បច្ចេកវិទ្យាក្រោយពេលប្រមូលផល ការដឹកជញ្ជូន ការស្តុកទុក ឃ្លាំងសម្ងួត ការកែច្នៃ និងការនាំចេញ។ កិច្ចពិភាក្សាត្រូវបានបញ្ចប់ក្នុងបរិយាកាស ស្និតស្នាល និងសហការណ៍យ៉ាងល្អ ប្រសើរដោយឈរលើគោលការណ៍រួមក្នុងការធ្វើទំនើបកម្មវិស័យកសិកម្មកម្ពុជានាពេលអនាគតដ៏ខ្លី។