ព័ត៌មានផ្សេងៗទៀត
ជួយបង្កើតនអាជីព និងបង្រៀនដល់កសិករអំពីការធ្វើកសិកម្ម
ចេញផ្សាយ ១៧ មករា ២០១៨ 4703
ឯកឧត្ដមបណ្ឌិត ច័ន្ទសារុន រដ្ឋមន្ដ្រី ក្រសួងកសិកម្ម រុក្ខាប្រមាញ់ និងនេសាទ បានប្រាប់ដល់មន្ដ្រី របស់ឯកឧត្ដម នៅខេត្ដសៀមរាប ដោយស្នើឱ្យសម្លឹងមើលកសិករណា ដែលពុំទាន់មានអាជីព ដោយយកមកជួយបណ្ដុះបណ្ដាល វិជ្ជាជីវៈឱ្យពួកគេ ជាមួយនឹងការផ្ដល់មធ្យោបាយ សម្រាប់ការធ្វើកសិកម្មមួយចំនួនផង។
ខណៈអញ្ជើញចុះទៅពិនិត្យការចិញ្ចឹមមាន់ និងកន្ធាយក្នុងស្រុក ជាលក្ខណៈគ្រួសារ និងពិនិត្យ ប.វ.ស របស់កសិករសេង ហេង និងជួបជាមួយប្រជាកសិករ និងភ្នាក់ងារសុខភាពសត្វភូមិចំនួន២០០នាក់ នៅភូមិថ្នល់កែង ឃុំស្ពានត្នោត ស្រុកជីក្រែង កាលពីថ្ងៃទី២៦ខែកញ្ញា ឯកឧត្ដមរដ្ឋមន្ដ្រីក្រសួងកសិកម្ម បានប្រាប់មន្ដ្រីរបស់ឯកឧត្ដម នៅទីនោះថា កាលរិយាល័យពេទ្យសត្វខេត្ដ ត្រូវធ្វើស្ថិតិសត្វ ឱ្យបានត្រឹមត្រូវឡើងវិញ។
មានស្ថិតិត្រឹមត្រូវ ទើបធ្វើការអភិវឌ្ឍន៏បាន ហើយពិនិត្យ ថាតើកសិករមួយណា ដែលគេក្រគ្មានអាជីព គឺត្រូវជួយគាត់ឱ្យប្រកាន់យក របរចិញ្ចឹមសត្វ ចិញ្ចឹមត្រី ដោយយើងជាអ្នកផ្ដល់ពូជនិងបច្ចេកទេស ធ្វើយ៉ាងណា កុំឱ្យពួកគាត់នៅទំនេរ គ្មានការងារធ្វើ ដែលនាំឱ្យទៅរកការធ្វើចំណាកស្រុក។
ឯកឧត្ដមបន្ដទៀតថា មន្ទីរកសិកកម្ម ត្រូវធ្វើការជ្រើសរើស ភូមិគំរូ ដែលទី១អប់រំកសិករឈប់ចិញ្ចឹមលែង ទី២ឱ្យភូមិនោះដាំដំណាំ និងស្មៅជាចំណីសត្វ ដើម្បីផ្គត់ផ្គង់ឱ្យបានគ្រប់គ្រាន់ពេញមួយឆ្នាំ។ ឧស្សាហ៏ណាត់ជួបពេទ្យសត្វភូមិ ជួបគ្នាញឹកញាប់ ប្រយោជន៏ឱ្យគេបានផ្លាស់ប្ដូរបទពិសោធន៏បច្ចេកទេសគ្នាទៅវិញទៅមក។ ឯកឧត្ដមបន្ដថា យើងបានបណ្ដុះបណ្ដាលពួកគាត់ ហើយចាំបាច់ត្រូវរក្សាធនធាននេះ ឱ្យនៅគង់វង្ស និងត្រូវបង្កើនសមត្ថភាពរបស់គេជាប់ជានិច្ច។
នាពេលនោះឯកឧត្ដមរដ្ឋមន្ដ្រី ក៏បានកោតសរសើរ ដល់កសិករសេង ហេង ដែលបានខិតខំប្រឹងប្រែងតស៊ូ ដើម្បីរំដោះគ្រួសារចេញពីភាពក្រីក្រ រហូតដល់មានលទ្ធភាពបញ្ជូនកូនស្រីចំនួន៣នាក់ បានរៀននៅសាកលវិទ្យាល័យទៀតផង។ នេះជាគំរូដ៏ល្អ ក្នុងស្រទាប់កសិករ។
ការតស៊ូបានទទួលជោគជ័យរបស់កសិករសេង ហេង មកទល់ថ្ងៃនេះ មិនមែនជាការស្រមៃទេ គឺបានមកពីការខិតខំតស៊ូទ្រាំ ពុះពារការលំបាក ដូច្នេះសូមឱ្យការខិតខំនេះ ជាគំរូដល់បងប្អូនប្រជាកសិករយើង នៅក្នុងភូមិដ្ឋាននេះ ក៏ដូចជាបងប្អូនប្រជាកសិករ នៅទូទាំងប្រទេសធ្វើយ៉ាងនេះ គឺដើម្បីរើបម្រះចេញពីភាពក្រីក្រ (ស៊ូទ្រាំនឿយ កុំស៊ូទ្រាំក្រ)។
ទាក់ទងនឹងការងារបច្ចេកទេស ប.វ.ស ឯកឧត្ដមរដ្ឋមន្ដ្រីបានបញ្ជាក់ថា គ្រាប់ពូជធានា ដល់គុណភាពសំណាប សំណាបល្អធានា ដល់សន្ទូងមានសុខភាពល្អ។ សន្ទូងល្អ គឺទទួលបានទិន្នផលខ្ពស់។ ក៏ប៉ុន្ដែត្រូវមានការថែទាំឱ្យបានល្អ ទឹក ជី ស្មៅ និងសត្វល្អិតជាប់ជាប្រចាំ។ រឿងសំខាន់មួយទៀត មុនជ្រើសរើសមកប្រើ ត្រូវសួរនាំពីមន្ដ្រីជំនាញ ចៀសវាងមានបញ្ហាទៅថ្ងៃមុខ ព្រោះពូជល្អបានលួចនាំចូល ដោយគ្មានការអនុញ្ញាត ហើយត្រូវបានចុះបញ្ជីកម្មសិទ្ធិបញ្ជារួចហើយនៅប្រទេសគេ។
ក្នុងករណីយើងផលិតបានច្រើនចង់ធ្វើការនាំចេញនោះ គេចោទប្រកាន់យើង។ ករណីនេះសូមឱ្យអគ្គនាយកដ្ឋានកសិកម្ម និង ( ពិនិត្យស្រាវជ្រាវ និងពិចារណាឱ្យបានដិតដល់។ មន្ដ្រីកសិកម្មខេត្ដ ត្រូវរកស្រែដើម្បីប្រើពូជបង្ហាញ ឱ្យកសិករធ្វើការជ្រើសរើស តើពូជមួយណាស័ក្ដិសម នឹងទីតាំងភូមិសាស្ដ្ររបស់គាត់។ ត្រូវនាំគ្នាចងជាក្រុមផលិតពូជស្រូវណាមួយ ឱ្យបានច្បាស់លាស់ ដើម្បីតម្រូវឱ្យទីផ្សារ ៕
