ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំក្រុមការងារចុះពិនិត្យការប្រមូលផលស្រូវប្រាំងរបស់ប្រជាកសិករ និងដេប៉ូធ្វើអាជីវកម្មថ្នាំ និងជីកសិកម្ម ស្ថិតនៅខេត្តសៀមរាប

ចេញ​ផ្សាយ​ ២២ មករា ២០២៥ 2612

នៅថ្ងៃទី២១ ខែមករា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំមន្ត្រីជំនាញនៃមន្ទីរកសិកម្ម ខេត្តសៀមរាប   មន្ត្រីកសិកម្មឃុំ និងលោក ម៉ូវ ជា អភិបាល នៃគណៈអភិបាលស្រុកជីក្រែង អាជ្ញាធរភូមិ ឃុំ ប្រជាកសិករ និងអាជីវករម្ចាស់ដេប៉ូ សរុបចំនួន៦៧នាក់ បានចុះពិនិត្យមើលការប្រមូលផលស្រូវប្រាំងរបស់ប្រជាកសិករ និងដេប៉ូធ្វើអាជីវកម្មថ្នាំ និងជីកសិកម្ម ព្រមទាំងស្វែងយល់ដំណើរការរោងម៉ាស៊ីនកិនស្រូវ នៅស្រុកជីក្រែង ខេត្តសៀមរាប។

ដំណើរនៃការចុះពិនិត្យនេះ ធ្វើឡើងក្នុងគោលបំណង ផ្សព្វផ្សាយដល់ប្រជាកសិករអំពីការជ្រើសប្រភេទពូជ    ស្រូវសម្រាប់ការដាំដុះ និងស្ថានភាពតម្លៃស្រូវលើទីផ្សារ ព្រមទាំងជួយសម្របសម្រួល និងដោះស្រាយបញ្ហានានារបស់ប្រជាកសិករ។

នាឱកាសនោះ ឯកឧត្តមរដ្ឋលេខាធិការ ឃុន សាវឿន បានណែនាំឱ្យប្រជាកសិករប្រើពូជស្រូវកម្ពុជា សម្រាប់ដាំដុះដំណាំស្រូវ ដែលជាពូជស្រូវមានស្ថិរភាពតម្លៃទៅតាមទីផ្សារ និងបម្រើឱ្យការនាំចេញផងដែរ។ ទន្ទឹមនេះ ឯកឧត្តមរដ្ឋលេខាធិការ ក៏បានជំរុញឱ្យប្រជាកសិករចូលរួមចងក្រងជាសហគមន៍កសិកម្មទំនើប ដើម្បីទទួលបានអត្ថប្រយោជន៍ ហើយមិនព្រួយបារម្ភទុនវិនិយោគ ជាពិសេសតម្លៃលក់ផលិតផលកសិកម្ម។

កម្មវិធីបន្ទាប់នាថ្ងៃដដែលនោះ ឯកឧត្តមរដ្ឋលេខាធិការ ក៏បានបន្តដឹកនាំក្រុមការងារចុះពិនិត្យស្វែងយល់ពីការលក់ធាតុចូលកសិកម្ម  នៅតាមដេប៉ូលក់ជី និងថ្នាំកសិកម្មមួយចំនួនស្ថិតនៅទីរួមស្រុកជីក្រែងផងដែរ។ បន្ថែមពីនេះ ឯកឧត្តមរដ្ឋលេខាធិការបានណែនាំឱ្យម្ចាស់ដេប៉ូ ត្រូវធ្វើអាជីវកម្មលក់ជី និងថ្នាំកសិកម្ម ដែលបានចុះកិច្ចបញ្ជីការទទួលស្គាល់ត្រឹមត្រូវតាមច្បាប់ និងណែនាំអំពីរបៀបប្រើប្រាស់ឱ្យបានត្រឹមត្រូវតាមស្តង់ដារបច្ចេកទេសដល់កសិករអ្នកប្រើប្រាស់។

ជាទីបញ្ចប់ ឯកឧត្តមរដ្ឋលេខាធិការ បានណែនាំឱ្យមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទ និងមន្រ្តីកសិកម្មឃុំ ត្រូវបន្តផ្តល់ការគាំទ្របច្ចេកទេសកសិកម្ម និងដោះស្រាយរាល់បញ្ហារបស់ប្រជាកសិករ ដែលបានជួបប្រទះ ព្រមទាំងស្នើឱ្យម្ចាស់រោងកិនស្រូវជួយគាំទ្រ និងទទួលទិញផលិតផលស្រូវពីកសិករក្នុងតម្លៃសមរម្យថែមទៀតផង៕