ព័ត៌មានផ្សេងៗទៀត
ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញជាអធិបតីក្នុងពិធីបរិច្ចាគឈាមក្រោមប្រធានបទ "ផ្តល់ឈាម សង្គ្រោះជីវិតខ្ញុំ"
ចេញផ្សាយ ៤ ធ្នូ ២០២៥ 494
នាព្រឹកថ្ងៃទី៤ ខែធ្នូ ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបរិច្ចាគឈាម ក្រោមប្រធានបទ "ផ្តល់ឈាម សង្គ្រោះជីវិតខ្ញុំ" នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។
ឯកឧត្តមរដ្ឋលេខាធិការ បានកោតសរសើរក្រុមការងារ ស.ស.យ.ក វិស័យកសិកម្ម ដឹកនាំដោយ ឯកឧត្តមអនុរដ្ឋលេខាធិការ ហៃ រស្មី ដែលបានសហការរៀបចំកម្មវិធីផ្តល់ឈាមចំនួន៥លើករួចមកហើយ ដោយបានផ្តល់ឈាមសរុបចំនួន ៨០០ប្លោក ហើយលើកនេះជាលើកទី៦ ដែលមានការចូលរួមបរិច្ចាគឈាមពីថ្នាក់ដឹកនាំ និងមន្ត្រីរាជការ និងនិស្សិតជាច្រើននាក់។
ឯកឧត្តម ក៏បានកោតសរសើរកិច្ចសហការល្អរបស់មជ្ឈមណ្ឌលជាតិផ្តល់ឈាម ដែលបានបង្កលក្ខណ:ងាយស្រួលដល់ថ្នាក់ដឹកនាំ និងមន្ត្រីក្រសួង ក្នុងការចូលរួមបរិច្ចាគឈាមយ៉ាងទៀងទាត់ និងបានជួយសម្របសម្រួលទាន់ពេលវេលា នៅពេលថ្នាក់ដឹកនាំ និងមន្ត្រីរាជការ ព្រមទាំងគ្រួសារមានតម្រូវការឈាមត្រឡប់មកវិញ។ ជាក់ស្តែង កន្លងមកក្រសួងបានទទួលឈាមចំនួន ១៦៦ប្លោកពីមជ្ឈមណ្ឌលជាតិផ្តល់ឈាម ដើម្បីជួយសង្គ្រោះជីវិតថ្នាក់ដឹកនាំ មន្រ្តីរាជការក្រសួងកសិកម្ម ព្រមទាំងក្រុមគ្រួសារ និងមិត្តភក្តិ ក្នុងនោះក៏មានសមាជិកក្រុមគ្រួសាររបស់ឯកឧត្តមផ្ទាល់ផងដែរ។
ទន្ទឹមនឹងការថ្លែងអំណរគុណដល់អ្នកចូលរួមបរិច្ចាគឈាមនាពេលនេះ ឯកឧត្តមរដ្ឋលេខាធិការ បានបន្តលើកទឹកចិត្តឱ្យមានការចូលរួមផ្តល់ឈាមកាន់តែច្រើន និងទូលំទូលាយថែមទៀត ពីព្រោះឈាមមានប្រភពតែមួយគត់ គឺបានពីការបរិច្ចាគរបស់សប្បុរសជនទាំងអស់គ្នា និងមិនអាចមានរោងចក្រណាផលិតបានឡើយ៕
