ព័ត៌មានផ្សេងៗទៀត
កិច្ចប្រជុំដើម្បីត្រួតពិនិត្យ និងរិះរកវិធានការដោះស្រាយបញ្ហាប្រឈម និងជម្រុញការនាំចេញអង្ករកម្ពុជាទៅកាន់ទីផ្សារអន្តរជាតិឆ្នាំ២០១៤ និង២០១៥
ចេញផ្សាយ ២៥ មករា ២០១៨ 3816
នៅទីស្តីការក្រសួងកសិកម្មការពីថ្ងៃទី១៤ ខែតុលា ឆ្នាំ២០១៤នេះ ឯកឧត្ដម អ៊ុក រ៉ាប៊ុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានអញ្ជើញជាអធិបតីនៅក្នុងកិច្ចប្រជុំដើម្បីត្រួតពិនិត្យ និងរិះរកវិធានការដោះស្រាយបញ្ហាប្រឈម និងជម្រុញការនាំចេញអង្ករកម្ពុជាទៅកាន់ទីផ្សារអន្តរជាតិឆ្នាំ២០១៤ និង២០១៥។ មានប្រសាសន៍ស្វាគមន៍ និងបើកអង្គប្រជុំនាឱកាសនោះ ឯកឧត្ដមរដ្ឋមន្ត្រី អ៊ុក រ៉ាប៊ុន និងប្រធានក្រុមការងារទី៩ និងឧកញ្ញ៉ា លឹម ប៊ុនហេង សហប្រធានក្រុមការងារទី ៩តំណាងផ្នែកឯកជន បានមានប្រសាសន៍ថ្លែងអំណរគុណយ៉ាងជ្រាលជ្រៅដល់គ្រប់សមាសភាពចូលរួមនៅក្នុងកិច្ចប្រជុំនាពេលនោះ នៅក្នុងគោលបំណងដើម្បីត្រួតពិនិត្យពិភាគ្សារិះរកវិធានការដោះស្រាយបញ្ហាប្រឈម និងជម្រុញការនាំអង្ករកម្ពុជាទៅកាន់ទីផ្សារអន្តរជាតិឆ្នាំ ២០១៤ និងឆ្នាំ ២០១៥ ដែលកិច្ចប្រជុំនាឱកាសនោះរួមមានរបៀបវារៈដូចខាងក្រោម៖
- សេចក្តីថ្លែងហេតុ និងបទបង្ហាញដោយប្រធានលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ
- ចំណាប់អារម្មណ៍ពីតំណាងក្រសួងស្ថាប័នដែលពាក់ព័ន្ធ និងផ្នែកឯកជន
- បទបង្ហាញ និងពិភាគ្សារាល់បញ្ហាដែលពាក់ព័ន្ធនឹងការនាំអង្ករចេញ
- បទបង្ហាញរបស់ក្រុមការងារទី៩ផ្នែកឯកជន
- បទបង្ហាញរបស់សហព័ន្ធស្រូវអង្ករកម្ពុជា
- ពិភាគ្សារិះរកដំណោះស្រាយរាល់បញ្ហាទៅតាមករណីនិមួយៗ
ឯកឧត្ដមរដ្ឋមន្ត្រី អ៊ុក រ៉ាប៊ុន បានមានប្រសាសន៍សង្កត់ធ្ងន់ថាក្នុងរយៈពេល៩ខែដើមឆ្នាំ ២០១៤ នៅទូទាំងប្រទេស ការងារបង្កបង្កើនផលស្រូវរដូវវស្សាសម្រេចបានចំនួន 2514092 ហិកតាគឺស្មើនឹង 104,27 ភាគរយនៃផែនការ 2411207 ហិកតាហើយដើម្បីទទួលបាននូវប្រសិទ្ធិភាពនៃដំណោះស្រាយ ឯកឧត្ដមរដ្ឋមន្ត្រីបានសំណូមពរសមាជិកសមាជិកាអង្គប្រជុំរួមគ្នាលើកឡើងនូវបណ្តាបញ្ហាដែលរាំងស្ទះ និងលើកឡើងបណ្តាជម្រើសនៃដំណោះស្រាយនៅក្នុងគោលបំណងដើម្បីសម្រេចឲ្យបានជោគជ័យនូវគោលនយោបាយរបស់រាជរដ្ឋាភិបាលនៅក្នុងការនាំចេញអង្ករឲ្យបានមួយលានតោនក្នុងឆ្នាំ ២០១៥ខាងមុខនេះ៕
