ឯកឧត្តមរដ្ឋលេខាធិការ ឱម គឹមស៊ា អញ្ជើញដឹកនាំក្រុមការងារជួបសំណេះសំណាលសួរសុខទុក្ខកងទ័ពនៅទីបញ្ជាការវរសេនាតូចលេខ៣៣៧ ក្នុងខេត្តកោះកុង

ចេញ​ផ្សាយ​ ៨ មេសា ២០២៥ 3271

នៅថ្ងៃទី៧ ខែមេសា ឆ្នាំ២០២៥ ឯកឧត្ដម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ពីឯកឧត្តមរដ្ឋមន្ត្រី បានអញ្ជើញដឹកនាំគណៈប្រតិភូតំណាងក្រសួង រួមជាមួយឯកឧត្តមអភិបាលរង នៃគណៈអភិបាលខេត្តកោះកុង ដើម្បីជួបសំណេះសំណាលសួរសុខទុក្ខមេបញ្ជាការ មេបញ្ជាការរង នាយទាហាន នាយទាហានរង និងពលទាហាន នៅទីបញ្ជាការវរសេនាតូចលេខ៣៣៧ ក្នុងខេត្តកោះកុង។
ក្នុងដំណើរនេះ ឯកឧត្តមរដ្ឋលេខាធិការ ក៏បាននាំយកគ្រឿងឧបភោគ បរិភោគ និងថវិកា ដែលជាអំណោយរបស់ឯកឧត្តមរដ្ឋមន្ត្រី  រួមទាំងបន្លែជាអំណោយរបស់លោកជំទាវអភិបាលខេត្តកោះកុង ជូនដល់មេបញ្ជាការ មេបញ្ជាការរង នាយទាហា នាយទាហានរង និងពលទាហាននៅទីបញ្ជាការវរសេនាតូចលេខ៣៣៧ផងដែរ។ 
ជាមួយគ្នានេះ គណៈប្រតិភូដែលក្នុងនោះ មានតំណាងអង្គភាពនានា និងមន្ទីរកសិកម្មខេត្ត បានឯកភាពបំពេញតាមសំណូមពរទាំងអស់របស់កងវរសេនាតូច ដោយបានផ្តល់ជ្រូកមេ ៤ក្បាល និងបា១ក្បាល កូនត្រីអណ្តែង ១៣ ០០០ក្បាល កូនត្រីក្រាញ់ ១ ៥០០ក្បាល កូនកៅស៊ូជាង១០ហិកតា ព្រមទាំងគ្រាប់ពូជបន្លែមួយចំនួនទៀត៕