ព័ត៌មានផ្សេងៗទៀត
អញ្ជើញកសិករជិត៣០០នាក់មកបង្រៀនការធ្វើស្រែបែប ប.វ.ស
ចេញផ្សាយ ១៦ មករា ២០១៨ 4130
កសិករចំនួន២៦០នាក់ ដែលជ្រើសរើសយកមកពី១៥ឃុំ ទូទាំងស្រុកត្រាំកក់ ត្រូវបានយកមកបង្រៀនបច្ចេកទេសថ្មី ក្មុងការធ្វើស្រែតាមបែបគោលការណ៏ធម្មជាតិ ដែលហៅកាត់ថា ប.វ.ស ។ ការបង្រៀននេះបានធ្វើឡើងនៅភូមិតាសួន ឃុំត្រពាំងធំកំពុងដំណើរការយ៉ាងល្អ ។
ឯកឧត្ដមបណ្ឌិត ច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញទៅពិនិត្យមើលការបង្រៀនដល់កសិករទាំងនោះកាលពីដើមសប្ដាហ៏។
ឯកឧត្ដមរដ្ឋមន្ដ្រី បានលើកទឹកចិត្ដដល់ពួកគេ តាមការកោតសរសើររសើរ និងបង្ហាញនូវអ្វីដែលចំណេញ និងខាតប្រសិនជាយើងធ្វើស្រែតាមទម្លាប់ និងធ្វើស្រែដោយអនុវត្ដន៏បច្ចេកទេសប.វ.ស.ស្ទូងស្រូវមួយដើម។ ឯកឧត្ដមបានបន្ដទៀតថា នេះជាវគ្គជាក់ស្ដែងមួយ ហើយតាមរយៈវគ្គនេះ កសិករទាំង២៦០នាក់នឹងត្រូវជួយផ្សព្វផ្សាយ ជួយអប់រំ ជួយផ្ដល់នូវការអនុវត្ដន៏ដល់កសិករដ៏ទៃទៀត ។
វគ្គដែលមានរយៈពេលខ្លីនេះបង្រៀនដោយអ្នកជំនាញកសិកម្ម ។ ការបង្រៀនបានគួបផ្សំនឹងការទៅពិនិត្យនិងអនុវត្ដជាក់ស្ដែងនៅក្នុងស្រែ ។ ឯកឧត្ដមរដ្ឋមន្ដ្រីបានលើកឡើងថា ប្រទេសដែលមានធនធានសម្បូរបែបមិនប្រាកដថា ជាប្រទេសអ្នកមានទេ ឧទាហរណ៏ប្រទេសនីហ្សេរីយ៉ា ជាដើម ។
ផ្ទុយទៅវិញប្រទេសដែលមិនសម្បូរធនធានធម្មជាតិ ក៏អាចក្លាយជាអ្នកមានបានដែរដូចជាប្រទេសសិង្ហបូរីជាដើម ។ ប្រទេសអ៊ីស្រាអែលមិនសម្បូរទឹក តែជាប្រទេសដែលមានកសិកម្មជឿនលឿន ។ ឯកឧត្ដមបានរំលឹកទៀតថា ដោយឡែកកម្ពុជារយៈពេលប៉ុន្មានឆ្នាំចុងក្រោយនោះវិស័យកសិកម្មមានការប្រែប្រួលច្រើន ។ កសិករកាន់តែមានការយល់ដឹង, ទិន្នផលកាន់តែកើនឡើង,បច្ចេកទេសដាំដុះក៏កាន់តែរីកចម្រើនដែរ ។ ឯកឧត្ដមរដ្ឋមន្ដ្រីបានអំពាវនាវឱ្យសិក្ខាកាមយកចិត្ដទុកដាក់ស្ដាប់គ្រូ សួរ គ្រូនិងមានការកត់ត្រាច្បាស់លាស់ ៕
