ឯកឧត្តមរដ្ឋមន្រ្តី វេង សាខុន បានអនុញ្ញាតឲ្យ លោក Stein R.HANSEN ជានាយកនិងជាតំណាង (UNIDO) និងគណៈប្រតិភូ ចូលជួបដើម្បីពិភាក្សាអំពីកិច្ចសហប្រតិបត្តិការលើវិស័យជលផលនិងកសិ-ឧស្សាហកម្ម

ចេញ​ផ្សាយ​ ២៤ កុម្ភៈ ២០១៨ 3463

កាលពីវេលាម៉ោង ៣និង៣០នាទីរសៀល ថ្ងៃទី១៤ ខែមីនា ឆ្នាំ២០១៧ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យ លោក Stein R.HANSEN ជានាយកនិងជាតំណាង United Industrial Development Organization (UNIDO) ប្រចាំតំបន់ដែលមានការិយាល័យនៅទីក្រុងបាងកកនិងគណៈប្រតិភូ ចូលជួបដើម្បីពិភាក្សាអំពីកិច្ចសហប្រតិបត្តិការលើវិស័យជលផលនិងកសិ-ឧស្សាហកម្ម នៅទីស្ដីការក្រសួងកសិកម្ម រុក្ខាប្រមាញ់ និងនេសាទ។ លោក Stein R.HANSEN បានសំណូមពរឲ្យមានការបន្តការសហការនិងការគាំទ្ររវាងក្រសួងកសិកម្ម រុក្ខាប្រមាញ់និងនេសាទ និងUNIDO ដើម្បីចូលរួមអភិវឌ្ឍសង្គមកម្ពុជាតាមរយៈការផ្តល់ជូននូវការគាំទ្រផ្នែកបច្ចេកទេសដល់ប្រជាជនកម្ពុជា ឲ្យទទួលបាននូវឱកាសការងារ ការកែលម្អកម្រិតជីវភាព និងការការពារបរិស្ថាន។ ជាមួយគ្នានេះដែរ UNIDO ក៏បានផ្តល់ជាយោបល់ផងដែរថាគួរតែជំរុញឲ្យមានការបង្កើតអាជីវកម្មថ្មីសម្រាប់ក្រុម សហគ្រិនវ័យក្មេង(Business Startup) ក្នុងវិស័យជលផលនិងកសិ-ឧស្សាហកម្ម។ ស្របពេលគ្នានេះដែរ UNIDO ក៏បានចូលរួមចាប់អារម្មណ៍ចង់ឲ្យកម្ពុជាប្រើប្រាស់ឲ្យអស់លទ្ធភាពនូវធនធានធម្មជាតិដែលមានស្រាប់ដូចជា ផលិតផលអាហារមួយ អាចនៅសល់កាកសំណល់យកទៅប្រើប្រាស់ជា Biogas បម្រើឲ្យសេវាសាធារណៈបាន។

ឯកឧត្តមរដ្ឋមន្រ្តី បានសម្តែងនូវការស្វាគមន៍យ៉ាងកក់ក្តៅចំពោះវត្តមានរបស់លោក Stein R.HANSEN និងគណៈប្រតិភូ ហើយឯកឧត្តមរដ្ឋមន្រ្តី ក៏មានភាពសាទរផងដែរ ដែល UNIDO នឹងបន្តគាំទ្រដល់ការអភិវឌ្ឍន៍នៅកម្ពុជានិងនៅតែបន្តជាដៃគូល្អរបស់ក្រសួងកសិកម្ម រុក្ខាប្រមាញ់និងនេសាទ។

ឯកឧត្តមរដ្ឋមន្ត្រីក៏បានបន្ថែមផងដែរថា បើនៅតែមានការបន្តគាំទ្រពី UNIDO កម្ពុជានឹងបោះជំហាននៃការរីកចម្រើនទៅមុខបន្ថែមទៀត ជាពិសេសទៅលើវិស័យជលផលនិងកសិ-ឧស្សាហកម្ម។ លើសពីនេះឯកឧត្តមរដ្ឋមន្ត្រីបានបន្ថែមថា UNIDO គួរស្វែងរកដៃគូវិនិយោគលើវិស័យកសិ-ឧស្សាហកម្មដើម្បីឲ្យមានការកែច្នៃផលិតផលកសិកម្មសម្រាប់ការនាំចេញដែលជាការងារចាំបាច់ក្នុងការបង្កើនគុណតម្លៃបន្ថែមនៃផលិតផលក៏ដូចជាបង្កើនចំណូលនិងឱកាសការងារឲ្យដល់ប្រជាជនកម្ពុជាផងដែរ។

ឯកឧត្តមរដ្ឋមន្ត្រីក៏បានស្នើឲ្យ UNIDO ជួយផ្តល់នូវចំណេះដឹងដែលជាបច្ចេកវិទ្យាថ្មីៗនិងផ្តល់ការសហការជាមួយសាកលវិទ្យាល័យដែលបណ្តុះបណ្តាលលើវិស័យកសិកម្មនៅកម្ពុជា ហើយសាកលវិទ្យាល័យទាំងនេះនឹងផ្ទេរបន្តនូវចំណេះដឹងនិងបច្ចេកវិទ្យាទៅដល់និស្សិតកម្ពុជាដែលជាធនធានមនុស្សចាំបាច់ក្នុងការអភិវឌ្ឍន៍ប្រទេសជាតិ។