លោកជំទាវអនុរដ្ឋលេខាធិការ យ៉ើ អាស៊ីគីន អញ្ជើញដឹកនាំក្រុមការងារ ចុះពិនិត្យ ការប្រមូលផលស្រូវនិងតម្លៃស្រូវ សែនក្រអូប និង OM និងជួបជាមួយរោងម៉ាស៊ីនកិនស្រូវ នៅស្រុកមង្គលបូរី ខេត្តបន្ទាយមានជ័យ

ចេញ​ផ្សាយ​ ១៨ មករា ២០២៥ 2561

នៅថ្ងៃទី១៦-១៧ខែមករា ឆ្នាំ២០២៥ លោកជំទាវ យ៉ើ អាស៊ីគីន អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក រុន សុផាន់ណារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ មន្ត្រីជំនាញ និងអាជ្ញាធរមូលដ្ឋាន បានចុះពិនិត្យការប្រមូលផលស្រូវនិងតម្លៃស្រូវសែនក្រអូប និងOM នៅទីវាល ព្រមទាំងជួបប្រជាកសិករ នៅឃុំបន្ទាយនាង និងឃុំចំណោម ស្រុកមង្គលបូរី  ខេត្តបន្ទាយមានជ័យ។

ដំណើរចុះពិនិត្យនេះធ្វើឡើងក្នុគោលបំណង ស្វែងយល់ពីការបង្កបង្កើនផលស្រូវប្រាំង តម្លៃ ការចំណាយ និងចំណូលក្នុងការដាំដុះស្រូវរបស់ប្រជាកសិករ និងការចងក្រងគ្នាជាក្រុមផលិត សម្រាប់ផ្គត់ផ្គង់ស្រូវជូនរោងម៉ាស៊ីនកិនស្រូវក្នុងស្រុក។

បន្ទាប់ពីបានពិនិត្យជាក់ស្តែង និងបានជួបជាមួយប្រជាកសិករ លោកជំទាវអនុរដ្ឋលេខាធិការ បានបញ្ជាក់ពីស្ថានភាពតម្លៃស្រូវអង្ករនៅកម្ពុជា ក៏ដូចជាទីផ្សារពិភពលោក ឱ្យប្រជាកសិករបានជ្រាប ព្រមទាំងបានជំរុញ និងលើកទឹកចិត្តប្រជាកសិករឱ្យធ្វើការដាំដុះពូជស្រូវក្នុងស្រុកដូចជា ពូជ ស្រូវសែនក្រអូប ស្រូវស្រង៉ែជាដើម ដែលធ្វើឱ្យកសិករអាចទទួលបានទិន្នផលខ្ពស់ តម្លៃសមរម្យ និងទទួលបានផលចំណេញ ច្រើន ហើយពូជស្រូវនេះមានទីផ្សារទាំងក្នុង និងក្រៅប្រទេស។

បន្ថែមពីនេះ លោកជំទាវអនុរដ្ឋលេខាធិការ ក៏បានណែនាំ និងលើកទឹកចិត្តដល់ប្រជាកសិករឱ្យចងក្រងគ្នាជាសហគមន៍កសិកម្មទំនើប ដើម្បីងាយស្រួលក្នុងការបង្កបង្កើនផល កាត់បន្ថយថ្លៃដើមផលិត ធានាបាននូវតម្លៃសមរម្យ រក្សាស្ថិរភាពថ្លៃ និងរក្សាបានភាពចំណេញ។

លើសពីនេះ លោកជំទាវអនុរដ្ឋលេខាធិការ ក៏បានជួបពិភាក្សាជាមួយម្ចាស់រោងម៉ាស៊ីនកិនស្រូវ យិន ពូ និងរោងម៉ាស៊ីនកិនស្រូវ អ៊ីវ សារុន នៅឃុំបន្ទាយនាង ស្រុកមង្គលបូរី ពីស្ថានភាពតម្លៃ និងការទិញលក់ស្រូវនៅក្នុងឱកាសបុណ្យចូលឆ្នាំចិនខាងមុខនេះ ដោយរោងម៉ាស៊ីនកិនស្រូវទាំងពីរបញ្ជាក់ថា នៅតែបន្តទិញស្រូវរបស់ប្រជាកសិករដដែលមិនសម្រាកនោះទេ៕