ឯកឧត្តមរដ្ឋមន្រ្តី វេង សាខុន រួមដំណើរដោយ លោក Samiuela Tukuafu បានអញ្ជើញចុះ ពិនិត្យការងារគម្រោងកាត់បន្ថយភាពក្រីក្រ និងអភិវឌ្ឍន៏កសិកម្មខ្នាតតូចនៅតំបន់ទន្លេសាប ស្ថិតក្នុងខេត្តសៀមរាប

ចេញ​ផ្សាយ​ ១៩ កុម្ភៈ ២០១៨ 3594

នៅរសៀលថ្ងៃទី២២ ខែវិច្ឆិកា ឆ្នាំ២០១៦ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ រួមដំណើរដោយ លោក Samiuela Tukuafu ប្រធានធនាគារ អភិវឌ្ឍន៏អាស៊ីប្រចាំនៅកម្ពុជា បានអញ្ជើញចុះពិនិត្យការងារគម្រោងកាត់បន្ថយភាពក្រីក្រ និងអភិវឌ្ឍន៏កសិកម្មខ្នាតតូចនៅតំបន់ទន្លេសាប ស្ថិតក្នុងស្រុកក្រឡាញ់ ខេត្តសៀមរាប។ លោក ឆើញ ឆើត ជាកសិករមួយរូបក្នុងចំណោមកសិករដែលទទួលផលពីគម្រោងនេះ បានមានប្រសាសថា គ្រួសាររបស់លោកមានដីកសិកម្មប្រមាណ ៥ហិកតា ក្នុងនោះ ៣ហិកតា សម្រាប់ធ្វើស្រែ និង ២ហិកតា សម្រាប់ផលិតចំណីសត្វ ហើយក៏មានការចិញ្ចឹមមាន់ ជ្រូក និងគោ។ គាត់បានបញ្ជាក់ថា មុនពេលមានគម្រោង ជីវភាពរបស់គាត់មានភាពលំបាក ដោយឡែកក្រោយបានចូលរួមការបណ្តុះបណ្តាលពីគម្រោងរួចមក ២ឆ្នាំចុងក្រោយ ចំណូលរបស់គាត់មានការកើនឡើង រហូតដល់ទៅ ៨លានរៀលក្នុងមួយឆ្នាំ។ ទន្ទឹមនឹងនេះ ឯកឧត្តមរដ្ឋមន្រ្តី បានលើកទឹកចិត្តឲ្យកសិករ គិតគូរពីការចិញ្ចឹមគោបន្ថែម និងត្រី ដើម្បីធ្វើឲ្យស្ថានភាពគ្រួសារកាន់តែប្រសើរឡើង។ បន្ទាប់មក ឯកឧត្តមរដ្ឋមន្រ្តី បានបន្តដំណើរជួបសំណេះសំណាលជាមួយ សហគមកសិកម្មគោកត្រុំ ស្ថិតនៅភូមិគោត្រុំ ឃុំស្រណាល ស្រុកក្រឡាញ់ ខេត្តសៀមរាប ដើម្បីពិនិត្យមើលនូវស្ថានភាពការបង្កបង្កើនផល និងជីវភាពកសិករក្នុងសហគមន៏។ ឯកឧត្តមរដ្ឋមន្រ្តី បានលើកទឹកចិត្តឲ្យប្រជាកសិករទាំងអស់ ខិតខំយក ចិត្ត ទុក ដាក់លើការបង្កបង្កើនផល និងពង្រីកការដាំដុះដំណាំកសិកម្មចម្រុះបន្ថែម ដើម្បីបង្កើនជីវភាពឲ្យកាន់តែប្រសើរឡើង។