ថ្នាក់ដឹកនាំក្រសួងកសិកម្ម អញ្ជើញដឹកនាំសិក្ខាសាលាផ្សព្វផ្សាយស្តីពី «ការបញ្ជ្រាបយេនឌ័រ និងការលុបបំបាត់ពលកម្មកុមារក្នុងអនុវិស័យជលផល» នៅខេត្តកំពត

ចេញ​ផ្សាយ​ ១៨ កញ្ញា ២០២៦ 40

នៅថ្ងៃទី១៧ ខែកញ្ញា ឆ្នាំ២០២៦ ឯកឧត្តម សុខ វិសាល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាសមាជិកគណៈកម្មាធិការជាតិប្រឆាំងពលកម្មកុមារ (គ.ជ.ព.ក) បានអញ្ជើញជាអធិបតីភាពក្នុងសិក្ខាសាលាផ្សព្វផ្សាយស្តីពី «ការបញ្ជ្រាបយេនឌ័រ និងការលុបបំបាត់ពលកម្មកុមារក្នុងអនុវិស័យជលផល នៅខេត្តតំបន់ឆ្នេរ» ដែលបានប្រព្រឹត្តទៅនៅសាលប្រជុំសណ្ឋាគារខេមរា ខេត្តកំពត។
សិក្ខាសាលានេះរៀបចំឡើងក្នុងគោលបំណង ដើម្បីបញ្ជ្រាប និងផ្សព្វផ្សាយផែនការយុទ្ធសាស្ត្រស្តីពីសមភាពយេនឌ័រ ព្រមទាំងការលុបបំបាត់ពលកម្មកុមារក្នុងអនុវិស័យជលផល ជូនដល់ភាគីពាក់ព័ន្ធ និងសហគមន៍មូលដ្ឋាន។ ជាពិសេសប្រជានេសាទបានយល់ដឹងបន្ថែមអំពីច្បាប់ និងការទប់ស្កាត់ពលកម្មកុមារ។ ជាមួយគ្នានេះ តំណាងសហគមន៍នេសាទសន្យាផ្សព្វផ្សាយបន្ត ឱ្យប្រជាពលរដ្ឋប្រុងប្រយ័ត្នចំពោះសកម្មភាពល្មើសច្បាប់នានាផងដែរ។
នៅក្នុងឱកាសនោះផងដែរ ឯកឧត្តម សុខ វិសាល បានថ្លែងអំណរគុណដល់ដៃគូអភិវឌ្ឍន៍ និងបានលើកសំណូមពរដល់តំណាងធនាគារអភិវឌ្ឍន៍អាស៊ី (ADB) ឱ្យបន្តផ្តល់កិច្ចគាំទ្រដល់ការរៀបចំសិក្ខាសាលាផ្សព្វផ្សាយដ៏មានសារៈសំខាន់នេះ ឱ្យបានកាន់តែទូលំទូលាយបន្ថែមទៀត នៅតាមសហគមន៍នេសាទក្នុងខេត្តកំពត ក៏ដូចជាបណ្តាខេត្តផ្សេងៗទៀតនៅតាមតំបន់ឆ្នេរសមុទ្រកម្ពុជា៕