ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ខាត់ សុធី អញ្ជើញដឹកនាំក្រុមការងារចុះចែកកុំព្យូទ័របន្ទះ(Tablet) ដល់មន្ត្រីកសិកម្មឃុំសង្កាត់ថ្មី ចំនួន៣៥០នាក់ នៃខេត្តទាំង២៣ ទូទាំងប្រទេស
ចេញផ្សាយ ១៣ ធ្នូ ២០២៥ 126
ចាប់ពីថ្ងៃទី៩ ដល់ថ្ងៃទី១២ ខែធ្នូ ឆ្នាំ២០២៥ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំនាយកដ្ឋានផ្សព្វផ្សាយកសិកម្មចុះចែកកុំព្យូទ័របន្ទះ(Tablet) ដល់មន្ត្រីកសិកម្មឃុំសង្កាត់ថ្មី ចំនួន៣៥០នាក់ នៃខេត្តទាំង២៣ ទូទាំងប្រទេស។ កម្មវិធី រៀបចំឡើងដោយនាយកដ្ឋានផ្សព្វផ្សាយកសិកម្ម សហការជាមួយ មជ្ឈមណ្ឌលព័ត៌មាន និងឯកសារកសិកម្ម និងជាមួយមន្ទីរកសិកម្ម រុក្ខាប្រមាញ់ និងនេសាទខេត្ត។
នាឱកាសនោះ ឯកឧត្តម ខាត់ សុធី បានគូសបញ្ជាក់ថា ការផ្តល់ជូន កុំព្យូរទ័របន្ទះ (TABLET)នេះ គឺដើម្បីជួយសម្រួលការអនុវត្តការងារប្រចាំថ្ងៃ របស់មន្រ្តីកសិកម្មឃុំ-សង្កាត់ ឱ្យកាន់តែមានប្រសិទ្ធភាព និងការប្រើប្រាស់ កម្មវិធី Farmbook app ក្នុងការប្រមូលទិន្នន័យកសិកម្ម តម្លៃកសិផល របស់ប្រជាកសិករ នៅតាមមូលដ្ឋានឃុំសង្កាត់ ឱ្យកាន់តែមានភាពល្អ ប្រសើរបន្ថែមទៀត។
ឯកឧត្តមអនុរដ្ឋលេខាធិការ ក៏បានតម្រង់ទិសដល់មន្ត្រីកសិកម្មឃុំទាំងអស់ត្រូវប្រើប្រាស់ Tabletនេះ បញ្ចូលទិន្នន័យក្នុងFarmbook App ឱ្យបានត្រឹមត្រូវ និងផ្ទៀងផ្ទាត់ទិន្នន័យរបស់ខ្លួនជាមួយមូលដ្ឋានភូមិ ឃុំ ឱ្យមានសុក្រិតភាព ដើម្បីងាយស្រួលលើកផែនការ សម្រាប់អនុវត្តឱ្យចំទិស និងជំរុញផ្សព្វផ្សាយបច្ចេកទេសកសិកម្មនិងផ្សព្វផ្សាយទស្សនទាននៃសហគមន៍កសិកម្មទំនើប ការរក្សាស្ថិរភាពថ្លៃនិងបង្កើនប្រាក់ចំណេញដល់កសិករ គឺផ្អែកលើគុណភាពកសិផល ទិន្នផលខ្ពស់ និងថ្លៃដើមផលិតកម្មទាប ដែលឆ្លើយតបយ៉ាងមានប្រសិទ្ធភាពនៃគោលនយោបាយអាទិភាពរបស់ក្រសួងកសិកម្ម រុក្ខាប្រមាញ់ និងនេសាទ។
សូមបញ្ជាក់ថា គិតមកដល់ពេលនេះ ក្រសួងកសិកម្ម រុក្ខាប្រមាញ់ និងនេសាទ បានផ្តល់ជូនកុំព្យូរទ័របន្ទះ (TABLET)សរុបចំនួន១៦០០ដល់មន្រ្តីកសិកម្មឃុំ-សង្កាត់ ទាំងមន្រ្តីចាស់ និងថ្មី ទូទាំងប្រទេសហើយ សម្រាប់ការងារគ្រប់គ្រងព័ត៌មាន និងទិន្នន័យកសិកម្ម ដ៏មានសារសំខាន់នេះ៕
