ឯកឧត្តមបណ្ឌិតរដ្ឋលេខាធិការ យ៉ង សាំងកុមារ អញ្ជើញដឹកនាំក្រុមការងារ ចុះគាំទ្រ​តម្រង់​ទិសការអនុវត្តន៍ការងារដំបូង របស់មន្ត្រីកសិកម្មឃុំ-សង្កាត់ នៅខេត្តត្បូងឃ្មុំ

ចេញ​ផ្សាយ​ ៧ មេសា ២០២៥ 2615

នៅថ្ងៃទី៧ ខែមេសា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការ ក្រសួង​កសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តម ខាត់ សុធី អនុរដ្ឋ​លេខាធិការ រួមជាមួយមន្ត្រីនៃនាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ បានចុះគាំទ្រ តម្រង់ទិសការអនុវត្តន៍ការងារដំបូងរបស់មន្ត្រីកសិកម្មឃុំ-សង្កាត់​ទាំង​ចាស់ ទាំងថ្មី សរុបចំនួន៥៥នាក់។
នាឱកាសជួបប្រជុំតម្រង់ទិសនោះ ឯកឧត្តមបណ្ឌិត យ៉ង សាំង កុមារ បានគូសបញ្ជាក់​អំពីចំណុចមួយចំនួនរួមមាន៖ ១.រចនាសម្ព័ន្ធការងារ ការទំនាក់ទំនង ការសហការ​ជាមួយអាជ្ញាធរមូលដ្ឋាន និងអង្គភាពពាក់ព័ន្ធ។ ២.យុទ្ធសាស្ត្រ​បញ្ច​កោណ​ដំណាក់​កាលទី១ នៃរាជរដ្ឋាភិបាលនីតិកាលទី៧ និងចក្ខុវិស័យជាតិ ក្នុង​ការជំរុញកំណើន​សេដ្ឋកិច្ច ដើម្បីក្លាយជាប្រទេសមានចំណូល​មធ្យមកម្រិតខ្ពស់​ឆ្នាំ២០៣០ និងជា​ប្រទេស​​មានចំណូលខ្ពស់នៅឆ្នាំ២០៥០។ ៣.គោលនយោបាយ​អាទិភាព​ទាំង៦ ជា​ពិសេស​គោលនយោបាយអាទិភាពទី៥ និងទី៦ ។ ៤. តួនាទី​ភារកិច្ច​​មន្ត្រី​កសិកម្ម​ឃុំសង្កាត់។
ទន្ទឹមនឹងនោះ ឯកឧត្តមបណ្ឌិតរដ្ឋលេខាធិការ បានលើកទឹកចិត្តដល់មន្ត្រីកសិកម្ម​ឃុំទាំងចាស់ និងថ្មី សូមបំពេញការងារនៅថ្នាក់មូលដ្ឋានឱ្យបានល្អ សហការជាមួយ​ភាគីពាក់ព័ន្ធ សំដៅធ្វើយ៉ាងណាបម្រើកសិករ ដោយស្មោះត្រង់ សម្រេចបាននូវការ​បង្កើន​​​ប្រាក់ចំណេញខ្ពស់ ពីវិស័យកសិកម្ម ដើម្បីសម្រេចក្ខុវិស័យខាងលើ។
សូមបញ្ជាក់ថា គិតត្រឹមថ្ងៃទី៧ ខែមេសា នេះ ដំណើរការចុះតម្រង់​ទិសដំបូង​ដល់​មន្ត្រីកសិកម្មឃុំថ្មីវគ្គ២ អនុវត្តបានចំនួន២០ខេត្តរួចមកហើយ។ នៅសល់ខេត្ត​ចំនួន​៤ទៀត ក្នុងតំបន់មេគង្គលើដែលមាន៖ ខេត្តក្រចេះ ខេត្តស្ទឹងត្រែង ខេត្តរតនគិរី និង​ខេត្តមណ្ឌលគិរី នឹងបន្តចុះអនុវត្តបន្ថែមទៀត៕