ព័ត៌មានផ្សេងៗទៀត
ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញចូលរួមកិច្ចប្រជុំគណៈកម្មការសួនកសិ-ឧស្សាហកម្ម នៅកម្ពុជា (AIP)
ចេញផ្សាយ ៦ មីនា ២០២៦ 1344
នៅថ្ងៃទី៦ ខែមីនា ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោក ចាយ ជីម ប្រធាននាយកដ្ឋានកសិ-ឧស្សាហកម្ម បានចូលរួមកិច្ចប្រជុំគណៈកម្មការសួនកសិ-ឧស្សាហកម្មនៅកម្ពុជា ក្រោមអធិបតីភាព ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការ ដោយមានការអញ្ជើញចូលរួមពីតំណាងស្ថានទូតអូស្រ្តាលីប្រចាំនៅកម្ពុជា ក្រសួង-ស្ថាប័នពាក់ព័ន្ធ និងវិស័យឯកជន។
កិច្ចប្រជុំនេះមានគោលបំណងពិភាក្សាប្រមូលធាតុចូលបន្ថែមលើ «ឯកសារក្របខ័ណ្ឌអភិវឌ្ឍសួនកសិ-ឧស្សាហកម្មនៅកម្ពុជា» និងលើយន្តការដែលត្រូវអនុវត្តដើម្បីឈានទៅបង្កើត និងដំណើរការសួនកសិ-ឧស្សាហកម្ម នាពេលខាងមុខ។
ក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តម គង់ ច័ន្ទវាសនា បានថ្លែងនូវការគាំទ្រពេញលេញចំពោះឯកសារនេះ និងគូសបញ្ជាក់ពីការត្រៀមលក្ខណៈចូលរួមសហការអនុវត្តឱ្យបានជោគជ័យ។ ឯកឧត្តមបានបន្ថែមថា សួនកសិ-ឧស្សាហកម្មនឹងបង្កើតឱ្យមានទីផ្សារ និងតម្រូវការក្នុងស្រុកបន្ថែមសម្រាប់កសិផលកម្ពុជា ដោយជួយស្រូបយកកសិផលសំខាន់ៗមកកែច្នៃក្នុងសួនកសិ-ឧស្សាហកម្ម ដើម្បីនាំចេញ។ នេះគឺជាការគិតគូរ និងយកចិត្តទុកដាក់ខ្ពស់របស់រាជរដ្ឋាភិបាល ដល់វិស័យកសិកម្ម ជាពិសេស ដល់បងប្អូនប្រជាកសិករដែលត្រូវការទីផ្សារបន្ថែមសម្រាប់កសិផលដែលផលិតបាន។
ជាមួយនឹងកញ្ចប់លើកទឹកចិត្តពិសេសពីរាជរដ្ឋាភិបាល ទាំងផ្នែកហេដ្ឋារចនាសម្ព័ន្ធ និងការលើកទឹកចិត្តផ្នែកពន្ធ សួនកសិ-ឧស្សាហកម្មនេះនឹងទាក់ទាញឱ្យមានការបោះទុនវិនិយោគបន្ថែមនៅកម្ពុជា ដែលនឹងបង្កើតការងារផង បង្កើនតម្លៃបន្ថែមផង និងគាំទ្រកំណើនសេដ្ឋកិច្ចផង។
តំណាងក្រសួង-ស្ថាប័នពាក់ព័ន្ធបានផ្តល់ធាតុចូលបន្ថែមល្អៗដល់ឯកសារនេះ ដែលលេខាធិការដ្ឋានរបស់គណៈកម្មការនឹងធ្វើការបូកសរុប កែសម្រួល និងស្នើសុំការពិនិត្យសម្រេចចុងក្រោយរបស់រាជរដ្ឋាភិបាល នាពេលខាងមុខ៕
