ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំកម្លាំងចម្រុះ ចុះបង្ក្រាបបទល្មើសជលផលនៅក្នុងឃុំចំនួនពីរនៃខេត្តកំពង់ចាម

ចេញ​ផ្សាយ​ ១២ សីហា ២០២៥ 326

នៅថ្ងៃទី១២ ខែសីហា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំពីឯកឧត្តមរដ្ឋលេខាធិការ ហាស់ សារ៉េត  បានអញ្ជើញដឹកនាំកម្លាំងអធិការដ្ឋានរដ្ឋបាលជលផលមេគង្គ ខណ្ឌរដ្ឋបាលជលផលកំពង់ចាម សហការជាមួយអាជ្ញាធរស្រុកជើងព្រៃ កម្លាំងប៉ុស្តិ៍នគរបាលរដ្ឋបាលសូទិព្វ និងព្រៃចារ ដោយមានការសម្របសម្រួលពីឯកឧត្តម ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ដោយចុះបង្ក្រាបបទល្មើសជលផល នៅឃុំសូទិព្វ និងឃុំព្រៃចារ ស្ថិតក្នុងស្រុកជើងព្រៃ ខេត្តកំពង់ចាម។

វត្ថុតាងដែលក្រុមការងាររឹបអូស និងបំផ្លាញចោល នៅចំណុចបឹងជ្រោយ ឃុំសូទិព្វ ស្រុកជើងព្រៃ ខេត្តកំពង់ចាម រួមមាន ឧបករណ៍លូស្បៃមុងចំនួន ៦មាត់  របាំងស្បៃមុងប្រវែង ១៨០ម៉ែត្រ បង្គោលចម្រឹងចំនួន ៩០ដើម និងចាក់លែងកូនត្រីចម្រុះចូលក្នុងបឹងធម្មជាតិវិញ។

ចំណែក វត្ថុតាងដែលរឹបអូសបាននៅចំណុចទំនប់តំបន់ ឃុំព្រៃចារ ស្រុកជើងព្រៃ ខេត្តកំពង់ចាម រួមមាន ឧបករណ៍លូស្បៃមុងចំនួន ១៤មាត់  របាំងស្បៃមុងប្រវែង ៤២០ម៉ែត្រ បង្គោលចម្រឹងចំនួន ២១០ដើម និងចាក់លែងកូនត្រីចម្រុះចូលក្នុងបឹងធម្មជាតិវិញ។

ជាចុងបញ្ចប់ ឯកឧត្តមអនុរដ្ឋលេខាធិការ បានគូសបញ្ជាក់ថា  ក្រុមការងារជំនាញនឹងបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តារស្រុកក្នុងខេត្តកំពង់ចាម និងផ្សព្វផ្សាយដល់ប្រជានេសាទឈប់នេសាទដោយប្រើប្រាស់ឧបករណ៍ខុសច្បាប់៕