ឯកឧត្តមបណ្ឌិតរដ្ឋលេខាធិការ មាស ពិសិដ្ឋ ដឹកនាំសិក្ខាសាលាស្តីពី «ការរៀបចំផែនការសកម្មភាព និងថវិកា ឆ្នាំ២០២៦ របស់កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) និងគម្រោងការបង្កើនភាពធន់នឹងអាកាសធាតុក្នុងខ្សែច្រវាក់តម្លៃកសិកម្មនៅកម្ពុជា (CERA)»

ចេញ​ផ្សាយ​ ១៧ កញ្ញា ២០២៥ 557

នៅថ្ងៃទី១៦ ខែកញ្ញា ឆ្នាំ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធី ASPIRE-AT បានអញ្ជើញដឹកនាំសិក្ខាសាលាស្តីពី «ការរៀបចំផែនការសកម្មភាព និងថវិកា ឆ្នាំ២០២៦ របស់កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) និងគម្រោងការបង្កើនភាពធន់នឹងអាកាសធាតុក្នុងខ្សែច្រវាក់តម្លៃកសិកម្មនៅកម្ពុជា (CERA)» នៅមន្ទីរកសិកម្ម រុក្ខាប្រមាញ់ និងនេសាទ ខេត្តកំពត។
នៅចំពោះមុខអង្គពិធី ឯកឧត្តម បានកោតសរសើរ និងវាយតម្លៃខ្ពស់ចំពោះការចូលរួមយ៉ាងសកម្មរបស់សិក្ខាកាមទាំងអស់ ដែលសុទ្ធសឹងជាតួអង្គសំខាន់ក្នុងដំណើរការគ្រប់គ្រង និងអនុវត្តកម្មវិធី ASPIRE-AT សិក្ខាសាលានេះពិតជាបានសម្រេចទៅតាមគោលបំណង និងលទ្ធផលដែលបានរំពឹងទុក។ 
ឆ្លៀតក្នុងឱកាសនេះដែរ ឯកឧត្តមក៏បានផ្តល់ការណែនាំបន្ថែម និងតម្រង់ទិសដល់តួអង្គអ្នកពាក់ព័ន្ធទាំងអស់របស់ ASPIRE-AT ដើម្បីធ្វើឱ្យប្រាកដថា ផែនការសកម្មភាព និងថវិកាដែលបានរៀបចំសម្រាប់ឆ្នាំ២០២៦ មានភាពសមស្រប អាចទទួលយកបាន ឆ្លើយតបទៅនឹងគោលបំណងគម្រោង និងចំណុចដែលបានព្រមព្រៀងជាមួយក្រុមបេសកកម្មគាំទ្រការអនុវត្ត និងច្នៃបង្កើតការបន្ថែមហិរញ្ញប្បទានរបស់ IFAD។
ជាចុងបញ្ចប់ ឯកឧត្តមបានគូសបញ្ជាក់ថា មន្ទីរកសិកម្ម រុក្ខាប្រមាញ់ និងនេសាទខេត្តកំពត នឹងពង្រឹងផលិតកម្ម និងការគ្រប់គ្រងផល តាមរយៈយន្តការដ៏មានប្រសិទ្ធភាព ពីកសិករទៅកសិករ (F2F) និងសម្របសម្រួលផ្តល់កម្ចី សហការជាមួយសេវាករទី១ ស្រង់ និងផ្ទៀងផ្ទាត់ទិន្នន័យ សម្របសម្រួលប្រជុំសហគមន៍កសិកម្មជាដើម៕