ឯកឧត្ដមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារលេខាធិការដ្ឋានគ្រប់គ្រងគ្រោះមហន្តរាយប្រចាំក្រសួង ពិនិត្យ និងវាយតម្លៃដំណាំស្រូវរងផលប៉ះពាល់ និងខូចខាតដោយទឹកជំនន់នៅខេត្តព្រៃវែង

ចេញ​ផ្សាយ​ ១៨ តុលា ២០២៥ 630

នៅថ្ងៃទី១៧ ខែតុលា ឆ្នាំ២០២៥ ឯកឧត្តម តូច ប៊ុនហ៊ួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ
អមដំណើរដោយ ឯកឧត្តម ស្រ៊ុន សុខុម ទីប្រឹក្សាក្រសួង និង លោក គង់ គា ប្រធាននាយកដ្ឋានដំណាំស្រូវ បានអញ្ជើញចុះពិនិត្យ និងវាយតម្លៃស្ថានភាពនៃផលប៉ះពាល់ដំណាំស្រូវដោយទឹកជំនន់ នៅស្រុកពារាំង និងស្រុកកំពង់ត្របែក ខេត្តព្រៃវែង។ 
ក្នុងឱកាសចុះពិនិត្យនេះ ឯកឧត្តមរដ្ឋលេខាធិការ បានជួបពិភាក្សា និងណែនាំអាជ្ញាធរស្រុក មន្ទីរកសិកម្មខេត្ត និងមន្ត្រីកសិកម្មឃុំ ចុះវាយតម្លៃផលប៉ះពាល់ជាក់ស្តែង និងកំណត់អត្តសញ្ញាណគ្រួសារកសិករដែលមានការខូចខាតដំណាំស្រូវ និងងាយរងគ្រោះ ដើម្បីស្នើសុំកិច្ចអន្តរាគមន៍ពីប្រព័ន្ធស្បៀងបម្រុងកម្ពុជា សម្រាប់ការដាំដុះឡើងវិញបន្ទាប់ពីទឹកស្រក។ 
តាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ក្នុងឆ្នាំ២០២៥ នេះ ទឹកជំនន់បានកើតឡើងចំនួន២លើក ដោយបង្កផលប៉ះពាល់ដំណាំស្រូវរបស់ប្រជាកសិករចំនួន ៩ស្រុក គឺស្រុកបាភ្នំ កំពង់ត្របែក កញ្ជ្រាច ពាមជរ ពាមរក៍ ព្រះស្តេច ពោធិរៀង និងស្រុកស៊ីធរកណ្តាល លើផ្ទៃដីសរុបចំនួន ៩ ២០៣ហិកតា ក្នុងនោះ ដំណាំស្រូវដែលខូចខាត មានចំនួន ៦ ៥៥៥ហិកតា ស្មើនឹង ៦ ៤៣៩គ្រួសារ៕