ពិធីបិទសិក្ខាសាលាស្តីពីការពង្រឹងការងារគ្រប់គ្រងថ្នាំកសិកម្មនិងជីកសិកម្ម
ចេញផ្សាយ ១ កក្កដា ២០២៦ 1629
នាព្រឹកថ្ងៃទី ៣០ខែមិថុនា ឆ្នាំ២០២៦ ឯកឧត្តម គង់ ច័ន្ទវាសនា រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកធាតុចូលកសិកម្ម បានចូលរួមជាអធិបតីក្នុងពិធីបិទសិក្ខាសាលាស្តីពី "ការពង្រឹងការងារគ្រប់គ្រងថ្នាំកសិកម្ម និងជីកសិកម្ម" ដែលមានការចូលរួមពីថ្នាក់ដឹកនាំ និងមន្រ្តីជំនាញចំនួន១០០នាក់។
ឯកឧត្តម គង់ ច័ន្ទវាសនា បានវាយតម្លៃខ្ពស់ចំពោះលទ្ធផលនៃសិក្ខាសាលាក្នុងរយៈពេលមួយថ្ងៃកន្លះនេះ ដែលសិក្ខាកាមចូលរួមទាំងអស់បានផ្លាស់ប្តូរយោបល់យ៉ាងផុលផុសលើការងារគ្រប់គ្រងថ្នាំកសិកម្មនិងជីកសិកម្ម។ លើសពីនេះទៀត ឯកឧត្តមបានកោតសរសើរចំពោះថ្នាក់ដឹកនាំនៃអគ្គនាយកដ្ឋានក្សេត្រសាស្រ្ត មន្ទីរកសិកម្ម និងការិយាល័យនីតិកម្ម កសិកម្មរាជធានី-ខេត្ត ដែលខិតខំបំពេញការងារប្រកបដោយការទទួលខុសត្រូវក្នុងពេល៣ឆ្នាំកន្លងមក និងសម្រេចបានលទ្ធផលល្អប្រសើរជាច្រើន ក្រោយពេលក្រសួងបានកែសម្រួលភារកិច្ចអង្គភាព ទទួលបន្ទុកគ្រប់គ្រងជីនិងថ្នាំកសិកម្ម។
ឯកឧត្តមក៏បានថ្លែងអំណរគុណដល់ថ្នាក់ដឹកនាំ និងមន្រ្តីនៃនាយកដ្ឋាននីតិកម្មកសិកម្ម ដែលបានរៀបចំ ដឹកនាំតាំងពីពេលដំបូង ដោយបានបន្សល់ទុកស្នាដៃច្រើនក្នុងការរៀបចំច្បាប់ និងលិខិតបទដ្ឋានគតិយុត្តលើការងារគ្រប់គ្រងជីកសិកម្មនិងថ្នាំកសិកម្ម ដែលជាមូលដ្ឋានគ្រឹះសម្រាប់បន្តការអនុវត្តក្នុងពេលបច្ចុប្បន្ន។
ជាទីបញ្ចប់ ឯកឧត្តមរដ្ឋលេខាធិការបានណែនាំអង្គភាពជំនាញ និងមន្ទីកសិកម្មទូទាំងប្រទេស បន្តពង្រឹងការគ្រប់គ្រងជី និងថ្នាំកសិកម្ម ឱ្យកាន់តែមានប្រសិទ្ធភាព តាមរយៈការលើកកម្ពស់សេវាសាធារណៈ ការគាំទ្រដល់ក្រុមហ៊ុន និងសិប្បកម្មផលិតជីក្នុងស្រុក ការបង្កើនសកម្មភាពអធិការកិច្ចទប់ស្កាត់ការនាំចូល និងចរាចរផលិតផលខុសច្បាប់ គ្មានបញ្ជិកា ការចុះយកសំណាកមកពិនិត្យគុណភាព ការអប់រំណែនាំ និងអនុវត្តច្បាប់លើ (Facebook Page) ដែលផ្សព្វផ្សាយលក់ផលិតផលខុសច្បាប់ គ្មានបញ្ជិកាលើបណ្តាញសង្គម ដើម្បីជាប្រយោជន៍ជូនបងប្អូនកសិករ។
