ព័ត៌មានផ្សេងៗទៀត
ឯកឧត្តមរដ្ឋលេខាធិការ ម៉ាន សុគ្រី អញ្ជើញចុះតាមដានស្ថានភាពផលិតកម្មស្រូវ នៅតាមបណ្តាក្រុង ស្រុក មួយចំនួន ក្នុងខេត្តកំពង់ធំ
ចេញផ្សាយ ១៥ សីហា ២០២៥ 269
នៅថ្ងៃទី១៤ ខែសីហា ឆ្នាំ២០២៥ ឯកឧត្តម ម៉ាន សុគ្រី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំមន្ត្រីជំនាញនៃមន្ទីរកសិកម្មខេត្ត លោក លោកស្រី ជាអភិបាលរងនៃរដ្ឋបាលក្រុង ស្រុក រដ្ឋបាលឃុំ សង្កាត់ និងមន្ត្រីកសិកម្មឃុំ សង្កាត់ នៃស្រុកតាំងគោក ស្រុកបារាយណ៍ ស្រុកសន្ទុក ស្រុកស្ទោង ស្រុកកំពង់ស្វាយ និងក្រុងស្ទឹងសែន ដើម្បីចុះតាមដានស្ថានភាពផលិតកម្មស្រូវដល់ទីតាំងផ្ទាល់នៅតាមបណ្តាក្រុង ស្រុកខាងលើ ក្នុងខេត្តកំពង់ធំ ដោយបានធ្វើការពិភាក្សាជាមួយប្រធានសហគមន៍អភិវឌ្ឍន៍កសិកម្មរស្មីកោះរះ (ឃុំស្រឡៅ ស្រុកតាំងគោក) ប្រជាកសិករ និងឈ្មួញកំពុងប្រមូលទិញស្រូវ។
ក្នុងឱកាសនោះ ឯកឧត្តមរដ្ឋលេខាធិការ បានគូសបញ្ជាក់ថា ស្ថានភាពផលិតកម្មស្រូវ នៅតាមបណ្តារក្រុង ស្រុក ក្នុងខេត្តកំពង់ធំ មានលក្ខណៈល្អប្រសើរ មិនមានបញ្ហាប្រឈមតម្លៃស្រូវនោះទេ។ ចំពោះការជំរុញឱ្យកសិករចូលរួមជាសហគមន៍កសិកម្មទំនើប កសិករមួយចំនួនបានលើកឡើងថា ពួកគាត់រង់ចាំមើលលទ្ធផលវិជ្ជមានក្នុងផលិតកម្មកសិកម្ម និងស្ថានភាពទីផ្សាររបស់សហគមន៍កសិកម្មទំនើបជាមុនសិន ទើបសម្រេចចិត្តចូលរួមជាមួយសហគមន៍កសិកម្មទំនើបនេះ។
បើតាមឯកឧត្តមរដ្ឋលេខាធិការ សហគមន៍អភិវឌ្ឍន៍កសិកម្ម និងកសិករដែលមិនទាន់ចូលរួមជាសហគមន៍កសិកម្មទំនើប បានប្រើប្រាស់ពូជស្រូវសម្រាប់ផលិតកម្មមានប្រភេទពូជស្រូវ OM5451 OM49 OM18 IR85។ល។ ដែលអាចផលិតបានពីរទៅបីដងក្នុងមួយឆ្នាំ ហើយបច្ចុប្បន្នប្រភេទស្រូវខាងលើ ត្រូវបានឈ្មួញក្នុងស្រុកប្រមូលទិញនឹងដឹកយកទៅលក់នៅប្រទេសវៀតណាម។
ទន្ទឹមនឹងនេះ ក្រសួងកសិកម្ម រុក្ខាប្រមាញ់ និងនេសាទ បានពង្រាយមន្ត្រីកសិកម្មឃុំ-សង្កាត់ ដោយសារពួកគាត់ ជាតួអង្គយ៉ាងសំខាន់ក្នុងការគាំទ្រដល់ការកសាង ទ្រទ្រង់ដំណើរការរបស់សហគមន៍កសិកម្ម និងជំរុញ គាំទ្រផលិតកម្មកសិកម្មរបស់កសិករ និងអ្នកប្រកបរបរកសិកម្មផងដែរ។
ជាទីបញ្ចប់ ឯកឧត្តមរដ្ឋលេខាធិការ ក៏បានណែនាំឱ្យមន្ត្រីកសិកម្មឃុំ-សង្កាត់ ត្រូវចុះជាប់ជាមួយប្រជាកសិករ ក្តាប់ឱ្យបាននូវស្ថានភាពផលិតកម្មក្នុងវិស័យកសិកម្មនឹងរាយការណ៍ឱ្យលឿននូវបញ្ហាប្រឈមនានា ពីផលប៉ះពាល់ក្នុងការផលិត កសិកម្ម ជាពិសេសស្ថានភាពទីផ្សារ និងតម្លៃកសិផលនៅលើទីផ្សារ។ មន្ត្រីកសិកម្មឃុំ-សង្កាត់ ត្រូវចុះជួយពន្យល់ណែនាំដល់សមាជិកសហគមន៍កសិកម្មទំនើបបន្ថែមទៀត ឱ្យពួកគាត់បានយល់ដឹងលក្ខខណ្ឌនៃការទទួល និងផ្តល់ឱ្យសហគមន៍វិញនូវពូជ ជី និងការបង់ប្រាក់ចំណេញ ដែលទទួលបានពីផលិតកម្មកសិកម្ម ជៀសវាងបង្កអរិយភាពដោយសារតែការមិនបានយល់ដឹង៕
