ឯកឧត្ដមអនុរដ្ឋលេខាធិការ ប៉ែន ផល្លីកា អញ្ជើញចុះពិនិត្យការប្រើឧបករណ៍នេសាទក្នុងរដូវបើកនេសាទ ស្ថិតក្នុងភូមិសាស្ត្រខេត្តសៀមរាប

ចេញ​ផ្សាយ​ ១៣ មីនា ២០២៦ 3046

នៅថ្ងៃទី១២ ខែមីនា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្រ្តី ឌិត ទីណា បានអញ្ជើញដឹកនាំក្រុម ការងារជំនាញចុះត្រួតពិនិត្យ ទប់ស្កាត់ និងបង្រ្កាបបទល្មើសនេសាទក្នុងតំបន់គ្រប់គ្រងជលផលសហគមន៍នេសាទកំពង់ឃ្លាំង ខេត្តសៀមរាប។
ប្រតិបត្តិការនេះ មានការអមដំណើរដោយ លោកស្រី កែវសុភៈ នាយរងខណ្ឌ ផ្នែករដ្ឋបាលជលផលដំដែក ចុងឃ្នៀស និងសង្កាត់រដ្ឋបាលជលផលសូទ្រនិគមព្រមទាំងមានការអញ្ជើញចូលរួមពីកងកម្លាំងទប់ស្កាត់ និងបង្រ្កាបបទល្មើសនេសាទកងពលតូច ង ៧០ តំបន់ប្រតិបត្តិការសឹករងខេត្ត ការិយាល័យកសិកម្ម ធនធានធម្មជាតិ និងបរិស្ថានស្រុក ឧទ្យានុរក្សតំបន់ប្រើប្រាស់ច្រើនយ៉ាង និងសហគមន៍នេសាទកំពង់ឃ្លាំង ។ 
 ក្នុងដំណើរនេះ ឯកឧត្តមអនុរដ្ឋលេខាធិការ បានគូសបញ្ជាក់ថា ជាលទ្ធផលក្រុមការងារ បានត្រួតពិនិត្យកាណូតអូសលៀសចំនួន ១៤គ្រឿង ដោយឈ្នាងអូសលៀសមានក្រឡា ៣ស.ម កញ្រ្ចែងរ៉េងក្រឡា១,៣ស.ម សមស្របតាមការកំណត់ ព្រមទាំងបានចាក់លែងលៀសដែលមានទំហំតូចជាងការកំណត់ចំនួន ២០០គក្រ ចូលទន្លេសាបវិញ។ 
ជាមួយគ្នានេះ ក្រុមការងារក៏បានត្រួតពិនិត្យឧបករណ៍លបលូបានចំនួន ២០របាំង បានបង្ហាញថាមានលក្ខណសមស្របទៅនឹងគោលការណ៍ដែលបានកំណត់ទាំងក្រឡា ទាំងប្រវែង និងទីតាំងដែលបានកំណត់ ដោយរបាំងសាច់អួនមានប្រវែង មិនលើសពី២៥០ម៉ែត រីឯក្រឡាចាប់មិនតូចជាង ៣សង់ទីម៉ែត្រផងដែរ។  
ក្នុងប្រតិបត្តិការត្រួតពិនិត្យនេះ ឯកឧត្តមក៏បានជួបសំណេះសំណាលជាមួយប្រជាជនដែលកំពុងនេសាទឱ្យបន្តការប្រើប្រាស់ឧបករណ៍ស្របច្បាប់ដូច្នេះបន្តទៀតដើម្បីធានានូវការរកទទួលទានឱ្យប្រព្រឹត្តទៅដោយរលូនដោយគ្មានការខាតបង់ថវិកា។ ទន្ទឹមនោះដែរ ឯកឧត្តមក៏បានថ្លែងអរគុណចំពោះបងប្អូនប្រជានេសាទ ចំពោះការគោរពច្បាប់បានល្អ និងឱ្យពួកគាត់ជួយផ្សព្វផ្សាយបន្តដល់អ្នកនេសាទផ្សេងទៀត ដើម្បីជួយទប់ស្កាត់បទល្មើស និងចូលរួមអភិរក្ស ដើម្បីអភិវឌ្ឍន៍ធនធានជលផលក្នុងបឹងទន្លេសាបឱ្យមានចីរភាព 
មុននឹងបញ្ចប់បេសកកម្មក្នុងថ្ងៃនេះ ឯកឧត្តមក៏បានថ្លែង អំណរគុណ និងសូមសរសើរដល់ក្រុមចម្រុះរបស់យើងដែលជានិច្ចកាលតែងតែខិតខំប្រឹងប្រែងទប់ស្កាត់បទល្មើសជលផលបានយ៉ាងសកម្មដូចភ្លៀងរលឹម ជាពិសេសកងកម្លាំងប្រដាប់អាវុធ ដែលតែងតែចុះល្បាតជាប្រចាំទាំងយប់ទាំងថ្ងៃ៕