ឯកឧត្ដមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារជួបប្រជុំពិនិត្យវឌ្ឍនភាពការងារ ជំរុញ ផលិតកម្មដំណាំរដូវ និងសិក្សាកំណត់សហគមន៍ដែលមានសក្តានុពល និងសមត្ថភាពក្នុងការផលិតនិងផ្គត់ផ្គង់ផលិតផលបន្លែ នៅខេត្តកំពង់ចាម

ចេញ​ផ្សាយ​ ១២ ឧសភា ២០២៦ 3625

នាថ្ងៃទី១២ ខែឧសភា ឆ្នាំ២០២៦ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារនៅមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ដើម្បីជំរុញផលិតកម្មដំណាំរដូវ ដោះស្រាយបញ្ហាប្រឈមនានា ពិសេសផែនការផ្គត់ផ្គង់ផលិតកម្មបន្លែនៅកម្ពុជា និងការជំរុញការផលិតដំណាំរដូវជាអាទិភាព។
ក្នុងកិច្ចប្រជុំ លោកអនុប្រធានមន្ទីរកសិកម្ម បានធ្វើបទបង្ហាញអំពីលទ្ធផលការងារដែលសម្រេចបានកន្លងមក ក៏ដូចជាបង្ហាញពីតំបន់ដែលមានសក្ដានុពលខ្ពស់សម្រាប់ការផលិតដំណាំរដូវ។
ឯកឧត្ដមបណ្ឌិត ហ៊ាន វណ្ណហន បានសង្កត់ធ្ងន់ថា ការលើកកម្ពស់ផលិតកម្មដំណាំរដូវ មិនត្រឹមតែផ្ដោតលើការបង្កើនបរិមាណផលិតផលប៉ុណ្ណោះទេ ប៉ុន្តែត្រូវផ្ដោតលើគុណភាព ស្តង់ដារ និងសមត្ថភាពប្រកួតប្រជែងជាមួយផលិតផលនាំចូលពីបរទេសផងដែរ។ ដើម្បីសម្រេចគោលដៅនេះ ឯកឧត្ដមបានណែនាំឱ្យមន្ត្រីជំនាញប្រមូល និងគ្រប់គ្រងទិន្នន័យកសិកម្មឱ្យបានត្រឹមត្រូវ គ្រប់ជ្រុងជ្រោយ និងទាន់ពេលវេលា ពិសេសនៅតាមបណ្ដាស្រុកដែលមានសក្ដានុពលខ្ពស់ក្នុងការផលិត។
ទន្ទឹមនឹងនោះ ឯកឧត្ដមបណ្ឌិត បានណែនាំឱ្យក្រុមការងារជំនាញរៀបចំផែនការចុះតាមមូលដ្ឋាន ដើម្បីតាមដានវឌ្ឍនភាពការងារជាក់ស្ដែង ពិសេសលើប្រភេទដំណាំដែលងាយរងផលប៉ះពាល់ពីអាកាសធាតុ និងទីផ្សារ។ ជាមួយគ្នានេះ ឯកឧត្ដមបណ្ឌិតក៏បានណែនាំឱ្យក្រុមការងារយកចិត្តទុកដាក់លើការកែលម្អប្រព័ន្ធស្រោចស្រព ការផ្ដល់បច្ចេកទេសកសិកម្មទំនើបដល់ប្រជាកសិករ និងការពង្រឹងកិច្ចសហការជាមួយមន្ទីរ និងអាជ្ញាធរពាក់ព័ន្ធ ដើម្បីធានាបាននូវការអភិវឌ្ឍវិស័យកសិកម្មប្រកបដោយចីរភាព។
បន្ទាប់ពីកិច្ចប្រជុំ ឯកឧត្ដមបណ្ឌិត និងក្រុមការងារ បានចុះពិនិត្យជាក់ស្ដែងនៅទីតាំងចំនួន ២ ក្នុងភូមិព្រែកលីវ និងភូមិខ្ចៅ ឃុំរកាអារ ស្រុកកងមាស ខេត្តកំពង់ចាម។ ក្នុងឱកាសនោះ ក្រុមការងារបានជួបពិភាក្សាជាមួយអាជ្ញាធរស្រុក-ឃុំ មន្ត្រីកសិកម្ម និងប្រជាកសិករ ដើម្បីស្ដាប់នូវបញ្ហាប្រឈម និងតម្រូវការជាក់ស្ដែងរបស់បងប្អូនកសិករផងដែរ។
ជាចុងក្រោយ ឯកឧត្ដមបណ្ឌិតបានលើកទឹកចិត្តឱ្យអាជ្ញាធរ និងមន្ត្រីជំនាញបន្តគាំទ្រប្រជាកសិករ ទាំងផ្នែកបច្ចេកទេស ការផ្សព្វផ្សាយព័ត៌មានទីផ្សារ និងការប្រមូលទិន្នន័យកសិកម្មឱ្យបានច្បាស់លាស់។ ការងារទាំងនេះ គឺជាគន្លឹះសំខាន់ក្នុងការជំរុញផលិតកម្មកសិកម្មឱ្យអាចឆ្លើយតបតាមតម្រូវការទីផ្សារក្នុងស្រុក កាត់បន្ថយការនាំចូល និងបង្កើនជីវភាពរស់នៅរបស់ប្រជាកសិករឱ្យកាន់តែប្រសើរឡើង៕