ព័ត៌មានផ្សេងៗទៀត
ឯកឧត្តមបណ្ឌិត អ៊ុក រ៉ាប៊ុន ជួបពិភាក្សាជាមួយឯកឧត្តមឯកអគ្គរដ្ឋទូតកាណាដា
ចេញផ្សាយ ២៣ មករា ២០១៨ 3442
ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសម្តែងនូវកិច្ចស្វាគមន៍យ៉ាងកក់ក្តៅចំពោះឯកឧត្តម Philip Calvert ឯកអគ្គរដ្ឋទូតកាណាដានៅក្នុងជំនួបសវនាការកាលពីរសៀលនៃថ្ងៃទី០៧ ខែវិច្ឆិកា ឆ្នាំ២០១៣ នៅក្រសួងកសិកម្ម រុក្ខាប្រមាញ់ និងនេសាទ។
ឯកឧត្តមរដ្ឋមន្ត្រី បានជម្រាបជូនអំពីស្ថានភាពវិស័យកសិកម្មនៅកម្ពុជាដែលមានប្រជាពលរដ្ឋប្រមាណ៨០%រស់នៅតំបន់ជនបទកំពុងប្រកបមុខរបរកសិកម្ម ដំណាំផ្សេងៗ ពិសេសដំណាំស្រូវដែលកម្ពុជាត្រូវនាំចេញឱ្យបានយ៉ាងតិចជាង១លានតោននៅឆ្នាំ២០១៣។
ក្រៅពីនេះ ក៏បានជម្រាបជូនផងដែរអំពីសន្ទុះនៃការអភិវឌ្ឍវិស័យកៅស៊ូដែលផ្ទៃដីដាំដុះមានប្រហែល៣១ម៉ឺនហ.ត រីឯការនាំជ័រកៅស៊ូចេញក៏មានកំណើនគួរកត់សម្គាល់។រីឯការនាំអង្ករចេញក្នុងរយៈពេល១០ខែដើមឆ្នាំនេះគឺមានកំណើនប្រហែល៣០ម៉ឺនតោនហើយ ខណៈដែលរយៈពេល១០ខែដើមឆ្នាំ២០១២មានតែជាង១៤ម៉ឺនតោនប៉ុណ្ណោះ។
ឯកឧត្តមរដ្ឋមន្ត្រីក៏បានជម្រាបជូនផងដែរអំពីការអភិវឌ្ឍវារីវប្បកម្មនិងការគ្រប់គ្រងព្រៃឈើដោយនិរន្តរភាពដើម្បីបន្ស៉ាំទៅនឹងការប្រែប្រួលអាកាសធាតុក៏ដូចជាតម្រូវការនៃការបណ្តុះបណ្តាលធនធានមនុស្ស ការផ្តល់អាហារូបករណ៍ ការស្រាវជ្រាវ ការផ្លាស់ប្តូរបទពិសោធន៍ផ្នែកបច្ចេកទេសវិទ្យាសាស្ត្រ ដើម្បីបង្កើនល្បឿននៃការអភិវឌ្ឍវិស័យកសិកម្ម និងការធ្វើសមាហរណកម្មកម្ពុជាទៅក្នុងសហគមន៍អាស៊ានឆ្នាំ២០១៥នេះ ហើយក៏មិនអាចមើលរំលងអំពីការកាត់បន្ថយភាពក្រីក្របានដែរតាមគោលនយោបាយរបស់រាជរដ្ឋាភិបាលកម្ពុជា។
ឯកឧត្តមទូត បានគាំទ្រទាំងស្រុងដោយបានជម្រាបជូនអំពីកិច្ចសហប្រតិបត្តិការ យ៉ាងល្អប្រសើរ ជាមួយក្រសួងកសិកម្ម រុក្ខាប្រមាញ់ និងនេសាទ និងការបន្តរឹតចំណងនៃកិច្ចសហប្រតិបត្តិការនេះតទៅទៀតជាអាទិ៍ ការនាំចេញកសិផលពិនិត្យលទ្ធភាពអំពីការអភិវឌ្ឍធនធានមនុស្ស ជាមួយសាកលវិទ្យាល័យកសិកម្មនៅកាណាដា ការនាំចូលជ្រូកពីកាណាដាមកកម្ពុជា ការគ្រប់គ្រងព្រៃឈើដោយនិរន្តរភាពដើម្បីឆ្លើយតបទៅនឹងការប្រែប្រួលអាកាសធាតុ។ល។ ព្រមទាំងបានលើកផងដែរអំពីកិច្ចសហប្រតិបត្តិការជាមួយប្រទេសមួយចំនួនដើម្បីរួមគ្នាដោះស្រាយបញ្ហារបាំងពាណិជ្ជកម្ម។ ឯកឧត្តមទូតនឹងត្រៀមលក្ខណៈក្នុងការរៀបចំ Trade Agreement ជាមួយកម្ពុជាដើម្បីផលប្រយោជន៍យូរអង្វែងនៃប្រទេសទាំងពីរ។
ឯកឧត្តមបណ្ឌិតរដ្ឋមន្ត្រីបានគាំទ្រទាំងស្រុងនូវខ្លឹមសារនៃចំណាប់អារម្មណ៍របស់ឯកឧត្តមទូត ហើយក្រសួងកសិកម្ម រុក្ខាប្រមាញ់ និងនេសាទ ត្រៀមលក្ខណៈជាស្រេចដើម្បីបង្កលក្ខណៈងាយស្រួលក្នុងការពង្រឹងកិច្ចសហប្រតិបត្តិការក្នុងវិស័យកសិកម្មនេះនាអនាគតកាលប្រកបដោយក្តីសង្ឃឹម។
