ឯកឧត្តមអគ្គលេខាធិការ សរ ចិត្រា អញ្ជើញចូលរួមកិច្ចប្រជុំពិសេសឧត្តមមន្ត្រីកសិកម្មនិងព្រៃឈើអាស៊ានលើកទី៤៧ តាមប្រព័ន្ធវីដេអូ

ចេញ​ផ្សាយ​ ១៨ សីហា ២០២៦ 2369

នៅថ្ងៃទី១៨-១៩ ខែសីហា ឆ្នាំ២០២៦ ឯកឧត្តមបណ្ឌិត សរ ចិត្រា អគ្គលេខាធិការតំណាងដ៏ខ្ពង់ខ្ពស់របស់ ឯកឧត្តម ប្រាក់ ដាវីដ រដ្ឋលេខាធិការនៃក្រសួងកសិកម្ម រុក្ខាប្រមាញ់ និងប្រធាន SOM-AMAF បានអញ្ជើញចូលរួមកិច្ចប្រជុំពិសេសឧត្តមមន្ត្រីកសិកម្មនិងព្រៃឈើអាស៊ានលើកទី៤៧   និងកិច្ចប្រជុំពិសេសឧត្តមមន្ត្រីកសិកម្ម និងព្រៃឈើអាស៊ានបូកបី លើកទី២៥ រួមទាំងកិច្ចប្រជុំមន្ត្រីឧត្តមមន្ត្រីអាស៊ាន-ជប៉ុន លើកទី៣  និងកិច្ចប្រជុំឧត្តមមន្ត្រីអាស៊ាន-រុស្ស៊ី លើកទី១១  ដែលប្រព្រឹត្តទៅតាមរយៈប្រព័ន្ធវីដេអូ (Video Conference) ។
នាឱកាសនេះ ឯកឧត្តមបណ្ឌិត បានសម្តែងនូវការស្វាគមន៍យ៉ាងកក់ក្តៅបំផុតចំពោះគណៈប្រតិភូទាំងអស់នៃបណ្តាប្រទេសសមាជិកអាស៊ាន តំណាងលេខាធិការដ្ឋានអាស៊ាន ព្រមទាំងដៃគូសន្ទនា និងអង្គការអន្តរជាតិពាក់ព័ន្ធ ដែលបានអញ្ជើញចូលរួមកិច្ចប្រជុំយុទ្ធសាស្ត្រទាំងនេះ ដើម្បីរួមគ្នាពិនិត្យ និងពិភាក្សាលើរបៀបវារៈសំខាន់ៗជាច្រើន ដើម្បីត្រៀមដាក់ជូនកិច្ចប្រជុំរដ្ឋមន្ត្រីកសិកម្ម និងព្រៃឈើអាស៊ាន (48th AMAF) ពិនិត្យ និងអនុម័ត និងកត់សម្គាល់មួយចំនួនទៀត។
ជាមួយគ្នានេះ ក្នុងក្របខណ្ឌកិច្ចសហប្រតិបត្តិការជាមួយដៃគូ កិច្ចប្រជុំបានពិនិត្យ និងពិភាក្សាលើសេចក្តីព្រាងរបៀបវារៈនៃកិច្ចប្រជុំពាក់ព័ន្ធនានា ជាមួយប្រទេសដៃគូសន្ទនា (អាស៊ានបូកបី ជប៉ុន និងរុស្ស៊ី) ដែលនឹងត្រូវប្រព្រឹត្តទៅជាបន្តបន្ទាប់នៅថ្ងៃទី១៩ ខែសីហា ឆ្នាំ២០២៦ នេះ។ ទន្ទឹមនឹងនេះ កិច្ចប្រជុំក៏បានកត់សម្គាល់ និងផ្តល់ការណែនាំលើរបាយការណ៍វឌ្ឍនភាព ព្រមទាំងគំនិតផ្តួចផ្តើមសំខាន់ៗពីបណ្តាដៃគូអភិវឌ្ឍន៍ និងអង្គការអន្តរជាតិធំៗ ដូចជា ERIA, GIZ, EU TAF-GTEI, UK-FCDO, USABC, CGIAR, WOAH, ABAC និង SEARCA ដែលបានចូលរួមចំណែកយ៉ាងសកម្មក្នុងការជំរុញសន្តិសុខស្បៀង បរិវត្តកម្មឌីជីថល ការកាត់បន្ថយការបំភាយកាបូន និងការអភិវឌ្ឍវិស័យកសិកម្ម រុក្ខាប្រមាញ់ និងនេសាទ ក្នុងតំបន់អាស៊ានឱ្យកាន់តែមានភាពធន់ និងចីរភាពខ្ពស់ នាពេលអនាគត៕