ព័ត៌មានផ្សេងៗទៀត
ឯកឧត្តមរដ្ឋមន្ត្រីសរសើរពីទំនាក់ទំនងជាមួយបារាំង
ចេញផ្សាយ ២២ មករា ២០១៨ 3997
ឯកឧត្តមរដ្ឋមន្ត្រីក្រសួងកសិកម្ម បានធ្វើការកត់សម្គាល់ និងកោតសរសើរពីទំនាក់ទំនងប្រកបដោយផ្លែផ្កា រវាងកម្ពុជាបារាំង ដែលក្នុងនោះមានក្រសួងកសិកម្មផងដែរ។ កាលពីព្រឹកថ្ងៃទី២៣ ខែមីនា ឯកឧត្ដមបណ្ឌិតច័ន្ទ សារុន បានទទួលជួបសវនាការ ជាមួយលោកហ្គ្រីសស្ទៀនខូណាន់ (Christ ianConnan) ឯកអគ្គរដ្ឋទូតបារាំងប្រចាំកម្ពុជា និងសហការី ដើម្បីពិភាក្សាការងារមួយចំនួន ទាក់ទងទៅនឹងជំនួយរបស់បារាំង ដែលបានជួយលើវិស័យកសិកម្មនាពេលកន្លងនៅទីស្ដីការក្រសួងកសិកម្ម ។
លោកហុក ណារិត នាយកខុទ្ទកាល័យឯកឧត្ដមរដ្ឋមន្ដ្រី បានប្រាប់ថា ក្នុងជំនួបនោះ ឯកឧត្ដមបណ្ឌិតច័ន្ទ សារុន បានជម្រាបជូន លោកទូតអំពីចំណងទាក់ទងការទូត ដែលមានជាយូរអង្វែងមកហើយ ក្នុងចំណងការទូតនេះ បារាំង បានជួយកម្ពុជា ជាបន្ដបន្ទាប់ជាពិសេស បានជួយក្នុងដំណើរការកិច្ចព្រមព្រាងទីក្រុងប៉ារីស។
មិនត្រឹមតែប៉ុណ្ណោះ បារាំងបានជួយកម្ពុជា លើវិស័យជាច្រើនដូចជាការចងក្រងក្រមព្រហ្មទណ្ឌនីតិវិធីក្រមព្រហ្មទណ្ឌ និងជំនួយបារាំងមកកម្ពុជាក្នុងឆ្នាំៗ មិនតិចជាង២៥លានដុល្លារ នេះមិនគិតដល់វិស័យឯកជន ដែលបារាំង បានជួយក្នុងឆ្នាំៗ មិនតិចជាង៤០ឥ៤៥លានដុល្លារ។
ឯកឧត្ដមបានបន្ដថា តាមការកត់សម្គាល់ ក្រោយពីកិច្ចព្រមព្រៀងទីក្រុងប៉ារីស ជំនួយអភិវឌ្ឍន៏បារាំងមកកម្ពុជា មិនតិចជាង៦០០លានដុល្លារក្នុងនោះ ក៏បានជួយដល់វិស័យកសិកម្មផងដែរ ដោយបានជួយដល់មន្ដ្រីកសិកម្មក្នុងការបណ្ដុះបណ្ដាល និងកម្មសិក្សាទៅរៀននៅប្រទេសបារាំង ជួយអភិវឌ្ឍន៏វិស័យកៅស៊ូ ក្នុងនោះក៏មានកៅស៊ូគ្រួសារជាច្រើន ហើយបច្ចុប្បន្ននេះទៀតសោត បារាំងបានជួយបច្ចេកទេសថ្មីពិសេសក្នុងការដាំដុះដំណាំដោយមិនបាច់ភ្ជួរដូ(DMC)។
ក្រៅពីនោះបានជួយក្នុងវិស័យបសុព្យាបាលតាមរយះអង្គការសុខភាពពិភពលោក ហើយនិងវិស័យឯកជនបារាំង បានជួយម៉ាស៊ីនកិនស្រូវទំនើបនៅឧដុង្គខេត្ដកំពង់ស្ពឺដែលដំណើរការ២៤ម៉ោងដោយបានស្រូបកម្លាំងពលកម្មខ្មែរជាង៣០០នាក់ ។
ឯកឧត្ដមរដ្ឋមន្ដ្រី បានបន្ថែមថា ដោយឡែកកិច្ចសហប្រតិបត្ដិការ រវាងកម្ពុជា និងបារាំងឈានមកដល់រូបភាពថ្មី ក្នុងនោះក្នុងឆ្នាំ២០១០កន្លងទៅ រដ្ឋមន្ដ្រីការបរទេសបារាំង និងឧបនាយករដ្ឋមន្ដ្រីហោ ណាំហុង រដ្ឋមន្ដ្រីក្រសួងការបរទេស បានចុះហត្ថលេខាលើកិច្ចព្រមព្រៀងសហប្រតិបត្ដិការ២០១១-២០១៣ ដែលផ្ដោតទៅលើកសិកម្មកសិ-ឧស្សាហកម្ម និងទេសចរណ៏ដែលក្នុងនោះទេសចរណ៏បារាំងជាង១០ម៉ឺននាក់ បានមកលេងកម្ពុជា ។
លោកខុទ្ទកាល័យបានឱ្យដឹងទៀតថា ជាការឆ្លើយតបហ្គ្រីសស្ទៀនខូណាន បានជម្រាបឯកឧត្ដមកសិកម្មដែរថា ឯកសារដែលបានចុះហត្ថលេខាមានសារសំខាន់ណាស់ព្រោះថា ឯកសារនេះបានតម្រង់ទិស ទៅលើវិស័យកសិកម្មនិងកសិ-ឧស្សាហកម្ម ដែលវិស័យនេះកម្ពុជា មានសក្កានុពលខ្ពស់ ហើយកសិកម្មបារាំងក៏មានសារសំខាន់ផងដែរ ។ លោកទូតក៏បានជម្រាប់ជូនដែលថា នៅថ្ងៃទី៣០ ខែមីនាខាងមុខនេះ នឹងមានរៀបចំសិក្ខាសាលាមួយ ដើម្បីបង្ហាញនូវផ្នែកជាច្រើន ដែលនឹងពិចារណារួមគ្នា ទៅលើការវិនិយោគបារាំងជាច្រើនផងដែរ ហើយឯកឧត្ដមបណ្ឌិតច័ន្ទ សារុន និងធ្វើជាសហប្រធាន ក្នុងការបើកសិក្ខាសាលានេះ ។ ឯកឧត្ដមបានបន្ដថា ដោយឡែកកិច្ចសហការរបស់យើង គឺមានគម្រោងជាច្រើន ជាពិសេសការនាំអង្ករពីកម្ពុជា ទៅកាន់ប្រទេសបារាំង និងប្រទេសនៅសហគមន៏អ៊ឺរ៉ុបផ្សេងទៀត និងមានការកើនឡើងរហូតដល់២០០ភាគរយ ហើយនិងបានកត់សម្គាល់ផងដែរពីប្រជាជនបារាំងលើដំណាំម្រេចពោត ។
បន្ទាប់មក ភាគីទាំងពីរបានពិភាក្សា លើចំណុចជាច្រើនលើវិស័យកសិកម្ម ដូចជាការអនុវត្ដន៏យុទ្ធសាស្ដ្រកសិកម្ម និងទឹកដែលបារាំងធ្វើជាសហប្រធានជជែក ពិភាក្សាលទ្ធផល ដែលបារាំងនិងផ្ដលហិរញ្ញប្បទានដល់ការការពារធនធានព្រៃឈើ នៅតំបន់ជួរភ្នំក្រវាញ ដែលក្នុងនោះមានជម្រើសតាមរយះ Trust Fund ឆ្នាំ២០១១ ឬហិរញ្ញប្បទានដាំដុះព្រៃឈើឡើងវិញ ដែលក្នុងនោះយើងនឹងធ្វើការអប់រំដល់ប្រជាជន រកស៊ីកាប់ឈើ និងធ្វើធ្យូង ឱ្យមានការរួមចំណែកទទួលខុសត្រូវ ក្នុងកិច្ចការពារអភិរក្សព្រៃឈើផងដែរ ។
ជាមួយគ្នានោះ ឯកឧត្ដមរដ្ឋមន្ដ្រី បានសុំបារាំងជួយ៣ចំណុច ទី១: បន្ដជួយដល់វិស័យកៅស៊ូកម្ពុជា ជាពិសេសក្នុងការបណ្ដុះបណ្ដាលធនធានមនុស្ស ក្នុងផ្នែកស្រាវជ្រាវកៅស៊ូ និងមន្ទីរពិសោធន៏កៅស៊ូកម្ពុជា។ ទី២: ជួយដល់សាកលវិទ្យាល័យភូមិន្ទកសិកម្ម និងទី៣: ជួយដល់លទ្ធភាពបង្កើតនូវមន្ទីរពិសោធន៏ និងបណ្ដុះបណ្ដាលអ្នកបច្ចេកទេសពេទ្យសត្វកម្ពុជា នៅក្នុងមន្ទីរពិសោធន៏ ដើម្បីឱ្យកម្ពុជាមានលទ្ធភាពវិភាគនូវជំងឺផ្ដាសាយបក្សីជាដើមក៏ដូចជាសមត្ថភាពក្នុងការវិភាគចំណីសត្វដែលត្រូវបាននាំចូលមកកម្ពុជា ។ ចំពោះសំណើរនេះ បារាំងរីករាយនឹងយកបញ្ហានេះទៅពិចារណាដើម្បីជួយឧបត្ថម្ភ ៕
