ព័ត៌មានផ្សេងៗទៀត
ឯកឧត្តមរដ្ឋលេខាធិការ អុឹម ស៊ីថុល ដឹកនាំកិច្ចប្រជុំក្រុមការងាររាជរដ្ឋាភិបាលចុះមូលដ្ឋានស្រុកស្វាយចេក ខេត្តបន្ទាយមានជ័យ
ចេញផ្សាយ ១៨ ឧសភា ២០២៥ 2593
នៅរសៀលថ្ងៃទី១៧ ខែឧសភា ឆ្នាំ២០២៥ ឯកឧត្តម អុឹម ស៊ីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយចេក បានដឹកនាំកិច្ចប្រជុំក្រុមការងាររាជរដ្ឋាភិបាលចុះមូលដ្ឋានស្រុកស្វាយចេក ដើម្បីពិនិត្យលើការងារកែតម្រូវឯកសារ អត្រានុកូលដ្ឋានអត្តសញ្ញាណប័ណ្ណ សៀវភៅគ្រួសារ និង សៀវភៅស្នាក់នៅ តាមអនុសាសន៍ណែនាំដ៏ខ្ពង់ខ្ពស់របស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ព្រមទាំងពិភាក្សាលើបញ្ហាផ្សេងៗ នៅក្នុងមូលដ្ឋានស្រុកស្វាយចេក ខេត្តបន្ទាយមានជ័យ។
កិច្ចប្រជុំនេះ មានការចូលរួមពីឯកឧត្តម ឈើយ ចាន់ណា សមាជិកព្រឹទ្ធសភា ឯកឧត្តម អ៊ុង សំអាត រដ្ឋលេខាធិការ ឯកឧត្តម កែវ អូម៉ាលីស្ស រដ្ឋលេខាធិការ ឯកឧត្តម វ៉ា ពិសី អនុរដ្ឋលេខាធិការ ឯកឧត្តម សួន សុវណ្ណ ប្រធានរដ្ឋបាល ព្រៃឈើ ឯកឧត្តមឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្ត លោក ដា ទឹង ប្រធានក្រុមប្រឹក្សាស្រុកស្វាយ ចេក លោក លឿង សុភក្តិ អភិបាលនៃគណៈ អភិបាលស្រុកស្វាយចេក ព្រមទាំងមានការចូលរួមពីលោក -លោកស្រី ប្រធាន អនុប្រធាន សមាជិក ក្រុមការងារស្រុក ឃុំ និង ភូមិ។
នៅក្នុងកិច្ចប្រជុំ ឯកឧត្តម អុឹម ស៊ីថុល បានកោតសរសើរចំពោះអាជ្ញាធរមូលដ្ឋានគ្រប់លំដាប់ថ្នាក់ ដែលបានខិតខំបម្រើសេវាសាធារណៈជូនប្រជាពលរដ្ឋបានទាន់ពេលវេលា ប្រកបដោយស្មារតីទំនួលខុសត្រូវខ្ពស់។
ជាមួយគ្នានេះ ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយចេក ក៏បានលើកទឹកចិត្ត និងណែនាំឱ្យរដ្ឋបាលឃុំ ប៉ុស្ត៍ នគរបាលរដ្ឋបាលឃុំ និងអធិការដ្ឋាននគរបាលស្រុក ដោយមានការគាំទ្រពីក្រុមការងារ ទទួលបន្ទុកស្រុកនិងឃុំ ដើម្បីសម្រេចផែនការ កែតម្រូវឯកសារ ខាងលើតាមពេលវេលាដែលបានគ្រោងទុក។
ជាកិច្ចបន្ទាប់ នៅព្រឹកថ្ងៃទី១៨ ខែឧសភា ឆ្នាំ២០២៥ ឯកឧត្តម អុឹម ស៊ីថុល បានចុះពិនិត្យស្ថានភាពទូទៅ និងជួបជាមួយអាជ្ញាធរនៅតាមបណ្ដាឃុំមួយចំនួន នៃស្រុកស្វាយចេក ដើម្បីស្វែងយល់បន្ថែម ក្នុងគោលបំណងលើកកម្ពស់ការផ្ដល់សេវាសាធារណៈជូនប្រជាពលរដ្ឋ ៕
